សុខភាព៖ អ្នកដែលមានបញ្ហាសន្លាក់ មិនត្រូវពិសាថ្នាំគ្មានវេជ្ជបញ្ជា ឬថ្នាំលក់តាមអនឡាញឡើយ ព្រោះភាគច្រើនថ្នាំទាំងនេះ មានលាយសារធាតុស្តេរ៉ូអ៊ីត (Steroids) ខ្ពស់ នាំឱ្យមានផលប៉ះពាល់ដល់សុខភាពកាន់តែធ្ងន់ធ្ងរ។ នេះបើតាមការផ្សាយរបស់មន្ទីរពេទ្យបង្អែកស្អាង។

​ផលវិបាកដែលទទួលបានពីការលេបថ្នាំមានលាយសារធាតុស្តេរ៉ូអ៊ីត រួមមាន៖ មុខឡើងប៉ោង, ឡើងបាយភ្នែក, ពុកឆ្អឹង, ប្រព័ន្ធការពាររាងកាយចុះខ្សោយងាយនឹងឆ្លងមេរោគផ្សេងៗ, ធ្វើឱ្យខូចតម្រងនោមធ្ងន់ធ្ងរ, រហូតដល់ត្រូវលាងឈាម, រលាក ឬធ្លាយក្រពះ, និងហូរឈាមក្នុងបំពង់អាហារ ។ល។ ដូច្នេះ ត្រូវឈប់ទិញថ្នាំគ្រាប់ផ្សំស្រាប់ៗ ឬថ្នាំដែលគ្មានលេខបញ្ជិកាពីក្រសួងសុខាភិបាល។ ត្រូវប្រឹក្សាជាមួយគ្រូពេទ្យជំនាញ ដើម្បីរកមូលហេតុពិតប្រាកដនៃជំងឺសន្លាក់។ ប្រើប្រាស់ថ្នាំតាមកម្រិត និងពេលវេលាដែលគ្រូពេទ្យកំណត់ឱ្យបានត្រឹមត្រូវ។ គួរជម្រាបថា មូលហេតុដែលបង្កឱ្យឈឺសន្លាក់ មានដូចជា៖ ទទួលទាន​ភេសជ្ជៈ​​មាន​ជាតិ​កាហ្វេអ៊ីន​ច្រើន​ជ្រុល​, អង្គុយ​ ឬ​ឈរ​រយៈពេល​យូរ, ទទួលទាន​ជាតិ​កាល់ស្យូមមិន​គ្រប់គ្រាន់​, ទទួល​ទានទឹក​មិនគ្រប់គ្រាន់ និងពាក់​ស្បែក​ជើង​កែង​ញឹកញាប់​។

ចំពោះអាហារដែលអ្នកជំងឺសន្លាក់មិនគួរទទួលទាន រួមមាន៖ ជាតិស្ករ សាច់កែច្នៃ និងសាច់ក្រហម អាហារដែលមានអំបិលច្រើន អាហារកែច្នៃ គ្រឿងស្រវឹង ប្រេងបន្លែមួយចំនួន អាហារដែលមានអំបិលច្រើន និងអាហារដែលមានសារធាតុហ្ក្លាយខេសិន ( glycation) កម្រិតខ្ពស់។ ចំណែកអាហារគួរបរិភោគ មានដូចជា៖ ខ្ទឹមស ខ្ញី ផ្កាខាត់ណាខៀវ ផ្លែបឺរី ទំពាំងបាយជូ ទឹកឈឺរី ស្ពៃខ្មៅ ត្រីខ្លាញ់ និងប្រេងអូលីវ៕