សុខភាព៖ ការឈឺសន្លាក់ មិនមែនទាល់តែដល់វ័យចំណាស់ទើបកើតមាននោះទ្បើយ បច្ចុប្បន្ន គេសង្កេតឃើញថា អ្នកមានវ័យអាយុតិចក៏អាចឈឺសន្លាក់បានដោយសារតែទម្លាប់ប្រចាំថ្ងៃមួយចំនួន។ ដូចនេះ បើចង់ឱ្យសន្លាក់មានសុខភាពល្អ សូមចៀសវាងទម្លាប់ទាំង៥យ៉ាង ដែលមានដូចខាងក្រោម…។
១.ការទទួលទានភេសជ្ជៈមានជាតិកាហ្វេអ៊ីនច្រើនជ្រុល៖។ យោងតាមការសិក្សាជាច្រើនបានបង្ហាញថា ការញ៉ាំជាតិកាហ្វេអ៊ីនតិចជាង៤០០មិល្លីក្រាមក្នុងមួយថ្ងៃ អាចជួយរក្សាសុខភាពសន្លាក់ឱ្យនៅរឹងមាំល្អ។ តែបើការទទួលទានជាតិកាហ្វេអ៊ីនច្រើនជ្រុលអាចបំផ្លាញសន្លាក់ពីព្រោះអាចរារាំងដល់ការលូតលាស់នៃឆ្អឹង។ ២.អង្គុយ ឬឈររយៈពេលយូរ៖ នៅពេលអង្គុយបង្កើនបន្ទុកនៅលើឆ្អឹងកង-ក ដើមទ្រូង និងចង្កេះ ដែលអាចបណ្ដាលឱ្យឈឺសន្លាក់ និងឈឺចាប់នៅខ្នងផ្នែកខាងក្រោម។ លើសពីនេះ ការឈរយូរពេក ក៏អាចបង្កជាបញ្ហាសន្លាក់ដូចគ្នាពីព្រោះ វាអាចធ្វើឱ្យសន្លាក់នៅឆ្អឹងខ្នង ត្រគាក ជង្គង់ ជើងចុករួយ និងប៉ះពាល់ដល់ការធ្វើចលនាជាដើម។ យូរៗទៅវាអាចបណ្ដាលឱ្យខូចខាតដល់សរសៃពួរ និងសរសៃចំណងឆ្អឹង។
៣.ការទទួលទានជាតិកាល់ស្យូមមិនគ្រប់គ្រាន់៖ អាហារធ្វើពីទឹកដោះគោផ្ទុកជាតិកាល់ស្យូម មានសារសំខាន់ណាស់សម្រាប់សុខភាពឆ្អឹង និងសន្លាក់។ តែបើទទួលទានជាតិកាល់ស្យូមមិនគ្រប់គ្រាន់ វាអាចធ្វើឱ្យឈឺសន្លាក់។ ដូចនេះ គប្បីបំពេញជាតិកាល់ស្យូម ដោយបរិភោគ អាហារដែលសម្បូរទៅដោយជាតិកាល់ស្យូមខ្ពស់ដូចជា អាហារធ្វើពីទឹកដោះគោ ទឹកដោះគោជូរ បន្លែស្លឹកបៃតង និងគ្រាប់ធញ្ញជាតិ ។ល។ នៅពេលរាងកាយទទួលបាន ជាតិកាល់ស្យូម គ្រប់គ្រាន់ វាអាចការពារពីការជំងឺពុកឆ្អឹង កង្វះបរិមាណ និងគុណភាពឆ្អឹង។ ៤.ទទួលទឹកមិនគ្រប់គ្រាន់៖ ទឹកមានសារសំខាន់ណាស់សម្រាប់ការបង្កើតសារធាតុរាវ synovial នៅក្នុងសន្លាក់ ដែលជួយឱ្យសន្លាក់មានរម្អិល និងបង្កើតការលូតលាស់នៃកោសិកាថ្មីៗនៅក្នុងឆ្អឹងខ្ចី។ នៅពេលដែលទទួលទឹកមិនគ្រប់គ្រាន់ ទឹករម្អិល នឹងត្រូវបានកាត់បន្ថយជាហេតុនាំឱ្យរលាកសន្លាក់ ឬឈឺចាប់នៅក្នុងសន្លាក់។
៥.ពាក់ស្បែកជើងកែងញឹកញាប់៖ យោងតាមការស្រាវជ្រាវបានបង្ហាញថា មានកម្លាំងកើនឡើងនៅពាសពេញសន្លាក់ជង្គង់ នៅពេលដែលពាក់ស្បែកជើងកែងខ្ពស់សម្ពាធនៅលើសន្លាក់ក៏កើតឡើងផងដែរ ប្រសិនបើពាក់ស្បែកជើងកែងជិត៤សង់ទីម៉ែត្រ។ ហេតុនេះហើយ គប្បីជៀសវាងពាក់ស្បែកជើងកែងខ្ពស់ញឹកញាប់ ឬរយៈពេលយូរពីព្រោះថា វាអាចធ្វើឱ្យសម្ពាធកើនឡើងនៅជង្គង់បណ្ដាលឱ្យមានការប្រែប្រួលខុសពីធម្មតានៃសន្លាក់៕ ដកស្រង់ពី៖ Hello គ្រូពេទ្យ
