រាជធានីភ្នំពេញ៖ កម្ពុជា និងមហាអំណាចរុស្ស៊ី បានពិភាក្សាអំពីការជំរុញកិច្ចសហប្រតិបត្តិការក្នុងវិស័យការពារជាតិ និងសន្តិសុខ តាមរយៈ​ការបន្តផ្លាស់ប្ដូរដំណើរទស្សនកិច្ច​នាយ​ទាហាន​ ការផ្លាស់ប្ដូរបទពិសោធ ចំណេះដឹង និងជំនាញ ដែលជាការបំពេញឱ្យគ្នាទៅវិញទៅមក សម្រាប់ជាឧត្តមប្រយោជន៍​នៃប្រទេសទាំងពីរ។ កិច្ចពិភាក្សាដ៏សំខាន់ កើតឡើងក្នុងជំនួបរវាងសម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា និងលោក ម៉ាកូហ្វជិន សឺហ្កេ ហ្គ្រីហ្ក័ររីវិច (MARKOVCHIN Sergei Grigorievich) មេបញ្ជាការរងកងទ័ពជើងគោករុស្ស៊ី នៅវិមានសន្តិភាព រាជធានីភ្នំពេញ កាលពីថ្ងៃទី២៨ ខែតុលា ឆ្នាំ២០២៦។

សម្ដេចនាយករដ្ឋមន្រ្តី បានថ្លែងអំណរគុណចំពោះសហព័ន្ធរុស្ស៊ី ដែលបានជួយបណ្ដុះបណ្ដាលធនធានមនុស្សនៅកម្ពុជា ជាបន្តបន្ទាប់ មក​ដល់បច្ចុប្បន្ននេះ​។ ជាមួយគ្នា សម្តេច បានបញ្ជាក់អំពី​ការ​គាំទ្រ​របស់​រាជរដ្ឋាភិបាលកម្ពុជា​ ក្នុង​ការ​បន្ត​ពង្រឹង​កិច្ច​សហប្រតិបត្តិការ​ក្នុង​វិស័យ​ការពារជាតិ​រវាង​ប្រទេស​ទាំងពីរ។ ចំណែក លោក ហ្គ្រីហ្ក័ររីវិច ក៏បានរំលេចឡើងអំពីវឌ្ឍនភាពនៃកិច្ចសហប្រតិបត្តិការក្នុងវិស័យសន្តិសុខ និងការពារជាតិរវាងប្រទេសទាំងពីរនាពេលកន្លងមក។

បន្ថែមពីនេះ លោក ហ្គ្រីហ្ក័ររីវិច បានវាយតម្លៃខ្ពស់ចំពោះកិច្ច​សហប្រតិបត្តិការ​ដ៏ល្អរវាងរុស្ស៊ី និងកម្ពុជា។ មេទ័ពរុស្ស៊ីរូបនេះ ថែមទាំងប្ដេជ្ញាបន្តពូនជ្រំទំនាក់ទំនងរវាងប្រទេសទាំងពីរ ឱ្យកាន់តែរឹងមាំ រីកចម្រើន និងយូរអង្វែងបន្តទៀត។ មុនចូលជួបសម្តេចនាយករដ្ឋមន្រ្តី លោក ហ្គ្រីហ្ក័ររីវិច បានជួបពិភាក្សាជាមួយលោក វង្ស ពិសេន អគ្គមេបញ្ជាការកងយោធពលខេមរភូមិន្ទកម្ពុជា។ ក្នុងជំនួបជាមួយលោក វង្ស ពិសេន មេទ័ពរុស្ស៊ី បានប្រកាសពីបំណងដ៏ពិសេសមួយរបស់រុស្ស៊ី គឺត្រៀមខ្លួនចាំជួយបណ្តុះបណ្តាលកងទ័ពកម្ពុជា «លើជំនាញផ្នែករថក្រោះ»៕