(រាជធានីភ្នំពេញ)៖ ក្នុងចំណោមរថយន្តគ្មានពន្ធជ្រកក្រោមផ្លាកលេខផ្សេងៗ ទាំងចង្កូតឆ្វេង និងចង្កូតស្តាំចំនួនជាង១ម៉ឺនគ្រឿង មានរថយន្តចំនួន៦,៩២២គ្រឿងហើយដែលចូលខ្លួនមកបង់ពន្ធអាករ និងកក់ប្រាក់។ ឯកឧត្តម គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានថ្លែងឱ្យដឹងនៅក្នុងសន្និសីទសារព័ត៌មាន «ស្តីពីវឌ្ឍនភាពនៃការងារប្រមូលពន្ធអាករលើរថយន្តគ្មានពន្ធ មានស្រាប់ក្នុងប្រទេស ជ្រកក្រោមផ្លាកលេខផ្សេងៗ» កាលពីព្រឹកថ្ងៃទី០៤ ខែឧសភា។
ឯកឧត្តម គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានលើកឡើងថា ចំណូលដែលគយប្រមូលបានពីរថយន្តគ្មានពន្ធជិត៧ពាន់គ្រឿងនោះ គឺមានសរុបចំនួន៦០លានដុល្លារអាម៉េរិក។ បើតាមឯកឧត្តម គុណ ញឹម ក្នុងចំណោមរថយន្តជិត៧ពាន់គ្រឿងដែលបានបង់ពន្ធរួច គឺមានរថយន្ត៤៦៩០គ្រឿងបានបង់ពន្ធ និងបង្វែរប្រាក់កក់ ទៅជាប្រាក់ពន្ធចូលជាតិចំនួន៤៦លានដុល្លារ ហើយបានទទួលបង្កាន់ដៃសម្រាប់ចុះបញ្ជីទៅធ្វើស្លាកលេខស្របច្បាប់។ ក្នុងចំណោមរថយន្តជាង៤ពាន់គ្រឿងដែលបង់ពន្ធចូលរដ្ឋ គឺមានរថយន្តចង្កូតស្តាំចំនួន២៣៥៩បានកែចង្កូតពីស្តាំមកឆ្វេង។
ទន្ទឹមនោះ នៅសល់តែរថយន្តចំនួន២២៣២គ្រឿងទៀត ដែលកំពុងស្ថិតក្នុងដំណើរកែចង្កូត ក្នុងរោងជាង ឬយាន្តដ្ឋានកែចង្កូតផ្សេងៗនៅភ្នំពេញ និងតាមបណ្តាខេត្តមួយចំនួន។ ឯកឧត្តម គុណ ញឹម បានបញ្ជាក់ថា រថយន្តដែលបានកក់ប្រាក់ ដែលមិនទាន់អាចបង្វិលទៅជាប្រាក់ពន្ធអាករចូលរដ្ឋមានចំនួនជាង១៣លានដុល្លារ។ អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានអះអាងថា រថយន្តចាស់ៗដែលចូលខ្លួនមកបង់ពន្ធ គឺគយបានបន្ធូរបន្ថយតម្លៃពន្ធចំនួន៣០ភាគរយក្នុងតារាងតម្លៃសម្រាប់ពិចារណាប្រើប្រាស់ជាមូលដ្ឋានក្នុងការគណនាពន្ធអាករ។ ចំណែករថយន្តដែលមានស៊េរីទាប និងមានសភាពចាស់ខ្លះ ក៏គយបានបន្ធូរបន្ថយបង់ដល់ទៅ៥០ភាគរយដែរ។
សម្រាប់៤ខែដើមឆ្នាំ២០២២ អគ្គនាយកដ្ឋានគយ ក៏បានបង្រា្កបរថយន្តដែលគ្មានពន្ធបានចំនួន១៧៨គ្រឿង ក្នុងនោះមានរថយន្តចង្កូតស្តាំចំនួន៧គ្រឿង គិតជាប្រាក់ពន្ធមានចំនួន៦៥ម៉ឺនដុល្លារ។ ទន្ទឹមនឹងត្រូវបង់ពន្ធអាករ ម្ចាស់រថយន្តក៏ត្រូវរងពិន័យពីអគ្គនាយកដ្ឋានគយផងដែរ ដោយក្នុងមួយគ្រឿងត្រូវបង់ប្រាក់ពិន័យចំនួន២១២០០ដុល្លារ។
កន្លងទៅអគ្គនាយដ្ឋានគយ និងរដ្ឋាករកម្ពុជា បានអនុគ្រោះពន្ធចំនួន១០ភាគរយសម្រាប់រថយន្តគ្មានពន្ធដែលជ្រកក្រោមផ្លាកលេខផ្សេងៗចាប់ពីខែកញ្ញា រហូតដល់បំណាច់ឆ្នាំ២០២១។ ចាប់ពីថ្ងៃទី០១ ខែមករា ដល់ថ្ងៃទី៣០ ខែមិថុនា ឆ្នាំ២០២២ រថយន្តចង្កូតឆ្វេងគ្មានពន្ធនឹងត្រូវបង់ពន្ធអាករពេញលេញ ដោយពុំមានការអនុគ្រោះបន្ធូរបន្ថយពន្ធ និងអាករទៀតឡើយ។
ចំពោះរថយន្តចង្កូតស្តាំគ្មានពន្ធ ក៏ត្រូវរួសរាន់មកតម្កល់ប្រាក់ពន្ធនិងអាករ ដើម្បីទទួលបានការអនុគ្រោះបន្ធូរបន្ថយពន្ធ និងអាករចំនួន ១០ភាគរយផងដែរ ហើយត្រូវរួសរាន់មកកែចង្កូតឱ្យយូរត្រឹមថ្ងៃទី៣០ ខែមិថុនា ឆ្នាំ២០២២។ ពោលពេលផុតឱសានវាទចាប់ពីថ្ងៃទី០១ ខែកក្កដា ឆ្នាំ២០២២ តទៅ រថយន្តគ្មានពន្ធនឹងរងនូវការបង្ក្រាបយ៉ាងតឹងរ៉ឹង និងម៉ឺងម៉ាត់ ហើយរថយន្តចង្កូតស្តាំ ក្រោយបង្ក្រាបបានត្រូវដោះបំបែកជាគ្រឿងបន្លាស់ ឬកម្ទេចចោល។
កាលពីពិធីបិទសន្និបាតបូកសរុបការងារឆ្នាំ២០២១ និងលើកទិសដៅការងារឆ្នាំ២០២២ របស់ក្រសួងមហាផ្ទៃ ថ្ងៃទី២៣ កុម្ភៈ ឆ្នាំ២០២២ សម្តចតេជោ ហ៊ុន សែន នាយករដ្ឋមន្ត្រីនៃកម្ពុជា បានព្រមានដុតរថយន្តដែលគ្មានពន្ធចោល ប្រសិនម្ចាស់រថយន្តមិនព្រមទៅបង់ពន្ធអាករតាមការអំពាវនាវរបស់សម្តេច និងអគ្គនាយករដ្ឋានគយកន្លងមក។ ជាមួយគ្នានេះសម្តេចបានសង្កត់ធ្ងន់ថា ចាប់ពីថ្ងៃទី១ ខែកក្កដា គឺមិនត្រូវឱ្យមានរថយន្តគ្មានពន្ធ និងរថយន្តចង្កូតស្តាំធ្វើដំណើរតាមផ្លូវទៀតឡើយ៕
