
រាជធានីព្រុចសែល៖ ក្នុងវេទិកាកម្រិតខ្ពស់ នៃសន្និសីទស្តីពីសកម្មភាពមីនអ៊ុយក្រែន ឆ្នាំ២០២៦ នៅរាជធានីព្រុចសែល ប្រទេសបែលហ្សិក កាលពីថ្ងៃទី១៦វិច្ឆិកា លោក ទេសរដ្ឋមន្ត្រី លី ធុជ អនុប្រធានទី១អាជ្ញាធរមីន បានសម្ដែងការសោកស្ដាយ និងព្រួយបារម្ភចំពោះផលប៉ះពាល់ពីជម្លោះ នាពេលកន្លងមក ដែលយោធាថៃឈ្លានពានអធិបតេយ្យកម្ពុជា ហើយបន្សល់ទុកនូវសំណល់ជាតិផ្ទុះជាច្រើន នៅបណ្តាខេត្តចំនួន៧ តាមបណ្តោយព្រំដែនកម្ពុជា-ថៃ…។

លោកទេសរដ្ឋមន្ត្រី គូសបញ្ជាក់ថា ជម្លោះ បានបង្កើតការគំរាមកំហែងដោយយុទ្ធភណ្ឌគ្រឿងផ្ទុះ ដល់ប្រជាពលរដ្ឋ និងសហគមន៍នៅតំបន់ព្រំដែន។ ស្ថានភាពនេះ បង្ហាញថា ការស្តារសុវត្ថិភាពលើដីដែលរងផលប៉ះពាល់ពីជម្លោះ ត្រូវការពេលវេលា ការប្តេជ្ញាចិត្ត និងការខិតខំប្រឹងប្រែងជាបន្តបន្ទាប់។ លោកទេសរដ្ឋមន្ត្រី ក៏បានលើកទ្បើងផងដែរថា៖ «សង្គ្រាមអាចបញ្ចប់នៅពេលណាមួយ ប៉ុន្តែគ្រោះថ្នាក់ដែលបង្កឡើងដោយសំណល់ជាតិផ្ទុះពីសង្គ្រាម អាចបន្តគំរាមកំហែងដល់អាយុជីវិតមនុស្សជាច្រើនជំនាន់ បើទោះបីជាសង្គ្រាម បានបញ្ចប់ទៅហើយក៏ដោយ»។ កម្ពុជា ជាប្រទេសធ្លាប់ឆ្លងកាត់សង្គ្រាមរាប់ទសវត្សរ៍ និងបានចំណាយពេលជាង៣០ឆ្នាំ ក្នុងការបោសសម្អាតមីន ក៏ដូចជាសំណល់ជាតិផ្ទុះពីសង្គ្រាម ដោយបានរកឃើញ និងបំផ្លាញយុទ្ធភណ្ឌផ្ទុះរាប់លានគ្រាប់។ ទោះបីជាមានវឌ្ឍនភាពគួរឱ្យកត់សម្គាល់ក៏ដោយ បេសកកម្មនេះ នៅមិនទាន់បញ្ចប់នៅឡើយ ខណៈប្រជាពលរដ្ឋ ជាពិសេស ប្រជាកសិករ នៅតែប្រឈមនឹងគ្រោះថ្នាក់ពីមីន និងសំណល់ជាតិផ្ទុះ ដែលបន្សល់ទុកតាំងពីអតីតកាល។

គួរជ្រាបថា តំបន់រងផលប៉ះពាល់ដោយសារសង្គ្រាមថៃឈ្លានពាន នៅតាមបណ្តាខេត្តទាំង៧រួមមាន ខេត្តព្រះវិហារ ឧត្តរមានជ័យ បន្ទាយមានជ័យ បាត់ដំបង ពោធិ៍សាត់ សៀមរាប និងកោះកុង ក្នុង២២ស្រុក-ក្រុង ស្មើនឹង៦០ឃុំ-សង្កាត់ មាន៣៣៥ភូមិ។ ទីតាំងទម្លាក់គ្រាប់បែកមានចំនួន២៦៥ពហុកោណ ស្មើនឹងផ្ទៃដីរងផលប៉ះពាល់ចំនួន ៤៨២៩ហិកតា និងទីតាំងគ្រាប់បែកចង្កោមចំនួន៣៨៥៨ពហុកោណ ស្មើនឹងផ្ទៃដីរងផលប៉ះពាល់ចំនួន២៦២ ៥០៦ហិកតា។ តាមការប៉ាន់ស្មាន យោធាថៃ អាចបាញ់គ្រាប់បែកចង្កោមប្រភេទគ្រាប់១៥៥មម ចំនួនប្រមាណ១២០ ០០០ ទៅ១៣០ ០០០គ្រាប់ និងមានកូនគ្រាប់បែកចង្កោមប្រភេទ M៤២ M៤៦ និងM៨៥ ប្រមាណ៦លានទៅ៧លានគ្រាប់ ហើយអាចមានកម្រិតមិនផ្ទុះ ប្រមាណ២៥ទៅ៣០ភាគរយ៕




