រាជធានីភ្នំពេញ៖ ថៃ នឹងបញ្ជូនតំណាងខ្លួនក្នុងនាមត្រឹមជាអ្នកសង្កេតការណ៍ប៉ុណ្ណោះ ឱ្យមកចូលរួមកិច្ចប្រជុំកំពូលហ្វ្រង់កូហ្វូនីលើកទី២០ ដែលកម្ពុជាធ្វើជាម្ចាស់ផ្ទះ ក្នុងរាជធានីភ្នំពេញ ចាប់ពីថ្ងៃទី១៤ ដល់ថ្ងៃទី១៦ ខែវិច្ឆិកា ឆ្នាំ២០២៦។ បច្ចុប្បន្ន ថៃ មិនមែនជាសមាជិកពេញសិទ្ធិនៃអង្គការហ្វ្រង់កូហ្វូនី (Francophonie) ឬសហគមន៍នៃប្រជាជាតិប្រើភាសាបារាំងនោះទេ។ 

ថៃ ក្លាយជាអ្នកសង្កេតការណ៍នៃអង្គការអន្តរជាតិនេះតាំងពីឆ្នាំ២០០៨មក។ ឋានៈជាអ្នកសង្កេតការណ៍ អាចចូលរួមប្រជុំ ប៉ុន្តែជាទូទៅ មិនមានសិទ្ធិក្នុងការចូលរួមពិភាក្សា បញ្ចេញមតិ ដេញដោល ឬចូលរួមអនុម័តសេចក្តីសម្រេចអ្វីឡើយ (និយាយឱ្យខ្លី និងងាយយល់ គឺបានត្រឹមអង្គុយស្តាប់ និងកត់ត្រាប៉ុណ្ណោះ។ លោក ស៊ីហស័ក្តិ ភួងកេតកែវ (Sihasak Phuangketkeow) រដ្ឋមន្ត្រីការបរទេសថៃ បានប្រកាសនៅឯវិមានរាជរដ្ឋាភិបាលថៃក្នុងថ្ងៃទី១០ ខែវិច្ឆិកា ឆ្នាំ២០២៦ អំពីការសម្រេចចិត្តបញ្ចូនមន្រ្តីសង្កេតការណ៍ មកចូលរួមកិច្ចប្រជុំកំពូលហ្វ្រង់កូហ្វូនីនៅកម្ពុជា។ 

បើពិនិត្យមើល​ គេនឹងអាចដឹងថា ថៃហាក់ដូចជាបារម្ភខ្លាំងខ្លាចកម្ពុជា និយាយការពិតក្នុងវេទិកាអន្តរជាតិកម្រិតខ្ពស់មួយនេះ អំពីការឈ្លានពានមកលើកម្ពុជា ដូច្នេះហើយ ទើបដាច់ចិត្តបញ្ជូនមន្រ្តីខ្លួនមកចូលរួមសង្កេតការណ៍។ កាសែតថៃ ខាវសត បានចុះផ្សាយដោយផ្អែកតាមសម្តីលោក សីហស័ក្តិ ថា កិច្ចប្រជុំកំពូលហ្វ្រង់កូហ្វូនី មានគោលបំណងពិភាក្សាអំពីបញ្ហានានាពាក់ព័ន្ធនឹងសហគមន៍ប្រើប្រាស់ភាសាបារាំង ហើយមិនគួរប្រើប្រាស់ជាវេទិកានេះ សម្រាប់ពិភាក្សាអំពីជម្លោះរវាងថៃ និងកម្ពុជានោះទេ។ លើសពីនេះ លោក ស្នើឱ្យកម្ពុជា ជៀសវាងការលើកយកភាពតានតឹងរវាងប្រទេសទាំងពីរមកពិភាក្សាក្នុងកិច្ចប្រជុំនេះ ដោយសំអាងហេតុផលថា ជម្លោះរវាងប្រទេសទាំងពីរ មិនស្ថិតក្នុងវិសាលភាពនៃកិច្ចប្រជុំឡើយ។ នេះជាភស្តតាងដែលបង្ហាញថៃ ដូចជាបារម្ភពិតមែន ទាំងដែលកិច្ចប្រជុំដ៏ធំមួយនេះ មិនទាន់មកដល់ផង។ 

ទោះយ៉ាងណាក៏ដោយ ថៃ គ្មានសិទ្ធិមកហាមឃាត់កម្ពុជាឡើយ។ ម្យ៉ាងទៀត វាជារឿងគួរអស់សំណើច ដែលថៃនៅតែបន្តរំលោភបំពានទឹកដីកម្ពុជានៅតាមបណ្តោយព្រំដែន តែបែរជាមកហាមកម្ពុជាម្តងហើយម្តងទៀត មិនឱ្យថ្លែងសារតាមវេទិកាអន្តរជាតិ អំពីទង្វើរំលោភបំពាននេះទៅវិញ។ ក្នុងកិច្ចសម្ភាសជាមួយទូរទស្សន៍ជាតិកម្ពុជា (ទទក) ស្តីពីការរៀបចំកិច្ចប្រជុំកំពូលហ្វ្រង់កូហ្វូនី លោកឧបនាយករដ្ឋមន្រ្តី ប្រាក់ សុខុន រដ្ឋមន្រ្តីការបរទេស ថ្លែងថា កម្ពុជា តែងផ្តល់សារសំខាន់ជានិច្ចដល់គោលការណ៍ច្បាប់អន្តរជាតិ ការសន្ទនា និងសន្តិវិធី ក្នុងការដោះស្រាយជម្លោះជាមួយថៃ។ 

ជាមួយគ្នា លោក​ ប្រាក់ សុខុន ចាត់ទុកកិច្ចប្រជុំកំពូលហ្វ្រង់កូហ្វូនី ជាឱកាសមាសសម្រាប់កម្ពុជា ដែលនឹងបង្ហាញឱ្យបណ្តាមេដឹកនាំ និងភ្ញៀវបរទេសមកពីទ្វីបទាំង៥ បានស្គាល់កម្ពុជាកាន់តែច្បាស់។ ក្នុងចំណោមបណ្តាមេដឹកនាំទាំងនោះ លោក អេម៉ានូអែល ម៉ាក្រុង (Emmanuel Macron) ប្រធានាធិបតីបារាំង ក៏នឹងមកចូលរួមកិច្ចប្រជុំដ៏ពិសេសនេះនៅកម្ពុជាផងដែរ៕