រដ្ឋធានីប្រ៊ូស្សែល៖ ត្រឹមរយៈពេលប៉ុន្មានសប្តាហ៍ ក្រោយពេលសហភាពអឺរ៉ុប និងចិន សម្រេចកិច្ចព្រមព្រៀងមួយ នៅក្នុងគោលបំណងទប់ស្កាត់សង្គ្រាមពាណិជ្ជកម្ម ដែលកំពុងគំរាមកំហែងពិភពលោកទាំងមូល ប៉ុន្តែ ភាគីទាំងពីរ ក៏មានជម្លោះនឹងគ្នា ជុំវិញបញ្ហាជាច្រើនក្នុងទំនាក់ទំនងរវាងរដ្ឋាភិបាលនៃរដ្ឋធានីប្រ៊ូស្សែល-រដ្ឋធានីប៉េកាំង...។

ក្នុងព្រឹត្តិការណ៍មួយនៅរដ្ឋធានីប្រ៊ូស្សែល ប្រទេសប៊ែលហ្ស៊ិក នាសប្តាហ៍នេះ មានការផ្លាស់ប្ដូរពាក្យសម្តីគំរាមកំហែងគ្នា ទៅវិញទៅមក ហើយការខ្វែងគំនិតគ្នា ក៏បានលេចឡើងយ៉ាងច្បាស់ផងដែរ ទោះកិច្ចព្រមព្រៀងពាណិជ្ជកម្មដ៏ផុយស្រួយនេះ ទើបតែបានចុះហត្ថលេខា កាលពីពេលថ្មីៗយ៉ាងណាក៏ដោយ ក៏ស្ថានការណ៍នេះ បានបង្ហាញយ៉ាងច្បាស់ថា ភាគីទាំងពីរ នៅតែបន្តត្រៀមខ្លួន សម្រាប់សង្គ្រាមពាណិជ្ជកម្ម នាពេលខាងមុខដដែល។ លោក កៃ រុន (Cai Run) ឯកអគ្គរដ្ឋទូតចិនប្រចាំនៅសហភាពអឺរ៉ុប បានព្រមានកាលពីថ្ងៃព្រហស្បតិ៍ថា៖«ប្រសិនបើសហភាពអឺរ៉ុប នៅតែទទូចអនុវត្តវិធាននូវការរឹតត្បិត និងរើសអើងប្រឆាំងនឹងប្រទេសចិននោះ រដ្ឋាភិបាលរដ្ឋធានីប៉េកាំង នឹងត្រូវចាត់វិធានការតបត ដើម្បីការពារផលប្រយោជន៍របស់ខ្លួនយ៉ាងដាច់ខាត»។

នៅក្នុងព្រឹត្តិការណ៍ដដែលនោះ រៀបចំឡើងដោយគណៈប្រតិភូចិន ប្រចាំនៅសហភាពអឺរ៉ុប លោក ស្ដេហ្វាណូ ហ្ក្រាសស៊ី (Stefano Grassi) មន្ត្រីជាន់ខ្ពស់មួយរូប ដែលជួយសម្របសម្រួលគោលនយោបាយរបស់គណៈកម្មការអឺរ៉ុប ចំពោះប្រទេសចិន ក៏បានរិះគន់តបតវិញផងដែរ៕