រដ្ឋធានីប៉េកាំង៖ កងនាវាផ្ទុកយន្ដហោះវាយប្រហាររបស់សហរដ្ឋអាម៉េរិក បានធ្វើដំណើររ ចូលមកកាន់សមុទ្ទចិនខាងត្បូង ស្របពេលកងនាវាផ្ទុកយន្ដហោះវាយប្រហាររបស់ចិន កំពុងធ្វើសកម្មភាពនៅតំបន់ប៉ាស៊ីហ្វិកខាងលិច ហើយសកម្មភាពរបស់កងទ័ពជើងទឹក នៃប្រទេសមហាអំណាចសេដ្ឋកិច្ចកំពូលពិភពលោកទាំង២ កំពុងបង្ហាញនូវការប្រកួតប្រជែងយុទ្ធសាស្ត្រ ដាក់គ្នាទៅវិញទៅមក...។

សារព័ត៌មាន The Defence Blog បានចេញផ្សាយនៅថ្ងៃព្រហស្បតិ៍ទី៥ ខែវិច្ឆិកានេះថា រូបភាពពីផ្កាយរណប បញ្ចេញដោយក្រុមហ៊ុនពាណិជ្ជកម្មរបស់ប្រទេសចិន ​Mizar Vision បង្ហាញពីកងនាវាផ្ទុកយន្ដហោះវាយប្រហាររបស់សហរដ្ឋអាម៉េរិក USS Theodore Roosevelt (យូអេសអេស ធេអូដ័រ រូសេវ៉ែល) មានលេខសម្គាល​ CVN 71 បានចូលមកដល់សមុទ្ទចិនខាងត្បូង កាលពីថ្ងៃពុធ នៅក្នុងដំណើររឆ្ពោះទៅកាន់តំបន់មជ្ឈិមបូព៌ា។ បើតាមក្រុមហ៊ុនពាណិជ្ជកម្មរបស់ចិន ​Mizar Vision អះអាងថា កងនាវាផ្ទុកយន្ដហោះវាយប្រហារនេះ អមដំណើររដោយនាវាចម្បាំងបំពាក់ប្រព័ន្ធមីស៊ីលនាំផ្លូវ USS Chosin (យូអេសអេស ឆូស៊ីន) មានលេខសម្គាល់​ CG 65 និងនាវាពិឃាដបំពាក់ប្រព័ន្ធមីស៊ីលនាំផ្លូវ USS Roosevelt  មានលេខស្គាល់​ DDG 80​។​

នៅថ្ងៃដដែលនោះរ កងទ័ពជើងទឹកសហរដ្ឋអាម៉េរិក ក៏បានបញ្ចេញរូបភាពមួយសន្លឹក បង្ហាញពីកងនាវាផ្ទុកយន្ដហោះវាយប្រហារ Theodore Roosevelt កំពុងធ្វើដំណើររទន្ទឹមគ្នា ជាមួយនឹងនាវាចាក់ប្រេង HMAS Stalwart (A304) នៃកងទ័ពជើងទឹកអូស្ត្រាលី​។ នៅក្នុងសេចក្តីអធិប្បាយភ្ជាប់ជាមួយរូបភាព កងទ័ពជើងទឹកសហរដ្ឋអាម៉េរិក បញ្ជាក់ថា កងនាវាផ្ទុកយន្តហោះនេះ ជាទីបញ្ជាការនៃក្រុមវាយប្រហារតាមផ្លូវអាកាសលេខ៩ (Carrier Strike Group 9) កំពុងធ្វើ​​ប្រតិបត្តិការជាប្រចាំ នៅក្នុងតំបន់ប្រតិបត្តិការ នៃកងនាវាទី៧របស់សហរដ្ឋអាម៉េរិក ​គ្របដណ្ដប់នៅលើតំបន់ប៉ាស៊ីហ្វិកខាងលិច និងសមុទ្ទចិនខាងត្បូង។ ទោះជាយ៉ាងណាក៏ដោយ កងទ័ពជើងទឹកសហរដ្ឋអាម៉េរិក មិនបានបញ្ជាក់អំពីទីតាំងពិតប្រាកដ នៃកងនាវាទាំងនោះឡើយ។​

បើតាមក្រុមមន្រ្ដីសហរដ្ឋអាម៉េរិក បានឱ្យដឹងថា កងនាវាផ្ទុកយន្ដហោះវាយប្រហារ​ Theodore Roosevelt បានធ្វើដំណើរចាកចេញពីមូលដ្ឋានកងទ័ពជើងទឹករបស់ខ្លួន នៅទីក្រុងសានឌីហ្គោ (​San Diego) រដ្ឋកាលីហ្វ័រញ៉ា សហរដ្ឋអាម៉េរិក កាលពីថ្ងៃទី២៧ ខែកញ្ញា។ កងនាវាផ្ទុកយន្ដហោះនេះ នឹងត្រូវដាក់ពង្រាយក្រោមការគ្រប់គ្រង​របស់ទីបញ្ជាការកណ្ដាលសហរដ្ឋអាម៉េរិក ដែលត្រួតត្រានៅតំបន់មជ្ឈិមបូព៌ា ហើយ​ត្រូវគេរំពឹងថា វា​នឹងចូលមកជំនួសកងនាវា​​​ផ្ទុកយន្ដហោះវាយប្រហារ USS George Washington (CVN 73) ដែលកំពុងធ្វើប្រតិបត្ដិការ​បិទផ្លូវសមុទ្ទ ទៅកាន់ប្រទេសអ៊ីរ៉ង់ ដោយកងទ័ពជើងទឹកសហរដ្ឋអាម៉េរិក នៅក្នុង​សមុទ្ទអារ៉ាប់។​

ស្របគ្នានឹងការចូលមកដល់ នៃកងនាវាផ្ទុកយន្ដហោះរបស់សហរដ្ឋអាម៉េរិក នៅក្នុងសមុទ្ទចិនខាងត្បូងនោះ កងនាវាផ្ទុកយន្ដហោះវាយប្រហាររបស់ចិន ក៏កំពុងធ្វើ​សកម្មភាព នៅពាសពេញតំបន់ជាច្រើន នៃតំបន់ប៉ាស៊ីហ្វិកខាងលិច ជាមួយនឹងនាវាផ្ទុកយន្ដហោះ Fujian និង Liaoning កំពុងប្រតិបត្ដិការ នៅតំបន់សមុទ្ទផ្សេងៗគ្នា ខណៈកងនាវាផ្ទុកយន្ដហោះរបស់ចិនមួយគ្រឿងទៀត ឈ្មោះ​ Shandong រៀបចំវិលត្រឡប់ទៅកាន់សមុទ្ទវិញ ក្រោយការជួសជុលអស់រយៈពេលជាច្រើនខែរួចមក។ សកម្មភាពរបស់កងនាវាផ្ទុកយន្ដហោះវាយប្រហាររបស់ប្រទេសមហាអំណាចអាស៊ី និងលោកខាងលិចទាំង២ នៅក្នុងដែនទឹកកណ្ដាលនាពេលនេះ កំពុងបង្ហាញអំពីការប្រកួតប្រជែងយុទ្ធសាស្ត្រ និងភូមិសាស្ត្រនយោបាយ រវាងរដ្ឋធានីប៉េកាំង និងរដ្ឋធានីវ៉ាស៊ីនតោន៕​