រាជធានីភ្នំពេញ៖ អ្នកនាំពាក្យរដ្ឋបាលរាជធានីភ្នំពេញ បានចេញមុខបញ្ជាក់ថា ពាក់ព័ន្ធករណីសាលារៀននៅចាក់អង្រែក្រោម ក្នុងខណ្ឌមានជ័យ ទារប្រាក់ពីសិស្សានុសិស្ស៤ម៉ឺនរៀលក្នុងមួយខែ ពេលនេះ មន្ត្រីជំនាញ និងអាជ្ញាធរពាក់ព័ន្ធ កំពុងចុះធ្វើការស្រាវជ្រាវ និងដោះស្រាយយ៉ាងយកចិត្តទុកដាក់....។

លោកស្រី ដោ ស​ម្ភ​ស្ស អ្នកនាំពាក្យរដ្ឋបាលរាជធានីភ្នំពេញ ប្រាប់ការីនិពន្ធអង្គភាពសារព័ត៌មាន​ SBM News នៅរសៀលថ្ងៃទី០៣ ខែវិច្ឆិកា ឆ្នាំ២០២៦ នេះថា ករណី​នេះ ​រដ្ឋបាល​ខណ្ឌ​ មន្ទីរ​អប់រំ​ នាយក​សាលា​ និង​អ្នក​ពាក់ព័ន្ធ ​បាន​ប្រជុំ​ដោះស្រាយ​កាលពី​ព្រឹកមិញ​ហើយ​។ ចំពោះលទ្ធផលយ៉ាងណានោះ លោកស្រីមិនទាន់​ទទួល​បាន​នៅឡើយទេ​ ដោយទុកពេល​ឱ្យ​ក្រុមមន្ត្រីជំនាញ ​ធ្វើ​ការ​ចប់រួចរាល់សិន។ ការចេញមុខបំភ្លឺ និងបញ្ជាក់ពីតំណាងរដ្ឋបាលរាជធានីភ្នំពេញ ធ្វើឡើងបន្ទាប់ពីមានការបញ្ចេញមតិ រអ៊ូរទាំ និងរិះគន់ពីសំណាក់អាណាព្យាបាលសិស្ស ក៏ដូចជាមហាជននៅលើបណ្តាញសង្គម ជុំវិញការទារប្រាក់ពីសិស្សសាលា បង្កើតជាចម្ងល់ និងការព្រួយបារម្ភចំពោះការចំណាយផ្សេងៗ នៅក្នុងគ្រឹះស្ថានសិក្សា។ 

មហាជន ជាពិសេសអាណាព្យាបាលសិស្ស រំពឹងថា អាជ្ញាធរនឹងដោះស្រាយករណីនេះឱ្យបានឆាប់រហ័ស និងប្រកបដោយតម្លាភាព ដើម្បីធានាជួយសម្រាលបន្ទុកអាណាព្យាបាល និងរក្សាបាននូវបរិយាកាសសិក្សាដ៏ល្អប្រសើរ សម្រាប់សិស្សានុសិស្ស។ សូមជម្រាបផងដែរថា កាលពីម្សិលមិញ តាមរយៈគណនីហ្វេសប៊ុកដែលមានឈ្មោះថា Mean Va បានបង្ហោះវីដេអូឃ្លីប និងអះអាងថា គ្រូបង្រៀនថ្នាក់ទី១ នៃសាលាចាក់អង្រែក្រោម បានតម្រូវឱ្យអាណាព្យាបាលបង់ប្រាក់ក្នុងម្នាក់ៗ៤ម៉ឺនរៀលក្នុងមួយខែ ទើបអាចចូលរៀនបាន រូបគាត់ សុំបញ្ចុះតម្លៃសល់ត្រឹម២ម៉ឺនរៀល តែអ្នកគ្រូមិនព្រមឡើយ ដោយនៅតែទាមទារបង់ឱ្យគ្រប់ចំនួន។

បន្ទាប់មក បុរសជាអាណាព្យាបាលរូបនេះ បានរាយការណ៍ទៅលោកនាយកដែរ ប៉ុន្តែគ្មានដំណោះស្រាយឡើយ ដោយរុញរូបលោកមកជួបអ្នកគ្រូនោះវិញដដែល។ ទោះជាយ៉ាងណា វីដេអូឃ្លីបខាងលើ ត្រូវបានចែកចាយពាសពេញបណ្ដាញសង្គម ស្រាប់តែនៅរសៀលថ្ងៃទី០៣ ខែវិច្ឆិកានេះ ម្ចាស់គណនី Mean Va បានបង្ហោះសំណេរយ៉ាងដូច្នេះថា ខ្ញុំបាទជាអាណាព្យាបាលសិស្ស បានលុបឃ្លីបវីដេអូអ្នកគ្រូឱ្យសិស្សបង់លុយ៤0000៛ក្នុង១ខែ នៅសាលាបឋមសិក្សាហ៊ុនសែន ចាក់អង្រែក្រោមអាជ្ញាធរ អប់រំគ្រប់លំដាប់ បានមកដោះស្រាយជូនខ្ញុំហើយ អ្នកគ្រូក៏ទទួលសារភាពកំហុសខ្លួនដែរ៕