ទីក្រុងតៃប៉ិ៖ នៅក្នុងរយៈពេលប៉ុន្មានឆ្នាំចុងក្រោយនេះ រដ្ឋាភិបាលទីក្រុងប៉េកាំង បាននិងកំពុងតែបង្កើនសម្ពាធដ៏ខ្លាំងក្លាទៅលើតៃវ៉ាន់ ទាំងការទូត សេដ្ឋកិច្ច នយោបាយ ហើយតែងតែបញ្ជូននាវាចម្បាំង និងយន្ដហោះយោធាយ៉ាងច្រើន ទៅធ្វើសកម្មភាព​ឥតឈប់ឈរ នៅជុំវិញដែនកោះដែលគ្រប់គ្រងដោយខ្លួនឯងតាមបែបលទ្ធិប្រជាធិបតេយ្យមួយនេះ។

សារព័ត៌មាន ​Taiwan News បានផ្សាយ កាលពីព្រឹក ថ្ងៃសៅរ៍ ទី៣១ ខែតុលាថា តៃវ៉ាន់ បានតាមដានយន្ដហោះយោធាចិន ចំនួន១៣គ្រឿង និងនាវាចម្បាំងរបស់ពួកគេ ចំនួន៩គ្រឿង មកធ្វើសកម្មភាព នៅជិតដែនកោះរបស់ខ្លួន ចន្លោះពីវេលាម៉ោង៦ព្រឹក ថ្ងៃសុក្រ និងម៉ោង៦ព្រឹក ថ្ងៃសៅរ៍។​

បើតាមក្រសួងការពារជាតិតៃវ៉ាន់ បានឲ្យដឹងថា ជាការឆ្លើយតបវិញនោះ តៃវ៉ាន់ បានដាក់ពង្រាយយន្ដហោះយោធា នាវាចម្បាំង និងប្រព័ន្ធមីស៊ីល នៅតាមឆ្នេរសមុទ្ររបស់ខ្លួន ដើម្បីត្រៀមខ្លួនបង្ការទុកជាមុន។ ស្របគ្នានោះដែរ យន្ដហោះចម្បាំងរបស់កងទ័ពរំដោះប្រជាជនចិន ចំនួន៦គ្រឿង បានហោះឆ្លងកាត់ខ្សែបន្ទាត់មធ្យម នៅច្រកសមុទ្រតៃវ៉ាន់ នាតំបន់ភាគខាងជើង តំបន់ភាគកណ្ដាល និងតំបន់កំណត់អត្ដសញ្ញាណការពារ​ដែនអាកាសភាគនិរតី នៃដែនកោះមួយនេះ។​

នៅក្នុងខែតុលានេះ ​តៃវ៉ាន់បានតាមដានយន្តហោះចិន ចំនួន២០០លើក និងនាវាចិនចំនួន ៣៥៤ដង​​។ ប៉ុន្ដែបើគិតចាប់តាំងពីខែកញ្ញា ឆ្នាំ២០២០ រហូតមកដល់ពេលនេះ ​ប្រទេសចិនបានបង្កើនការប្រើប្រាស់យុទ្ធសាស្ត្រ «តំបន់ពណ៌ប្រផេះ» (gray zone tactics) ជាមួយនឹងការបង្កើនចំនួនយន្តហោះយោធា និងនាវាចម្បាំង មកធ្វើ​ប្រតិបត្តិការ នៅជុំវិញតៃវ៉ាន់ជាបន្តបន្ទាប់។

យុទ្ធសាស្ត្រ «តំបន់ពណ៌ប្រផេះ» ត្រូវ​បានគេកំណត់និយមន័យថា ជា«កិច្ចខិតខំប្រឹងប្រែងជាបន្ដបន្ទាប់​ ដែលលើសពីវិធានការទប់ស្កាត់ (deterrence) និងការធានាសន្តិសុខជាប្រក្រតី ជាមួយនឹង​មានគោលបំណងសម្រេចបាននូវគោលដៅសន្តិសុខរបស់ខ្លួន ដោយមិនចាំបាច់ប្រើប្រាស់កម្លាំងយោធាដោយផ្ទាល់ និងក្នុងកម្រិតធំនោះឡើយ»៕