រដ្ឋធានីណៃពិដោរ៖ សង្គ្រាមស៊ីវិលដ៏រ៉ាំរ៉ៃ នៅក្នុងប្រទេសមីយ៉ាន់ម៉ា អស់រយៈពេលជាង៥ឆ្នាំកន្លងមកនេះ បានសម្លាប់ជនស៊ីវិលជាងតិច ១០០ ០០០នាក់ ខណៈបច្ចុប្បន្ន របបសឹកមីយ៉ាន់ម៉ា កំពុងតែបង្កើនការវាយប្រហារតាមអាកាស ទៅលើតំបន់ជនស៊ីវិលរស់នៅបន្ដទៀត បណ្ដាលឲ្យចំនួនអ្នក​ស្លាប់កើនឡើងបន្ថែមទៀត ​​ទើបអង្គការសង្គមស៊ីវិលជាច្រើន កំពុងតែជំរុញដល់អង្គការសហប្រជាជាតិ និងពិភពលោក ​បង្កើតតំបន់គ្មានការហោះហើរ នៅក្នុងរដ្ឋរ៉ាឃីន (Rakhine) នៃប្រទេសអាស៊ានមួយនេះ។

សារព័ត៌មានភូមា The Irrawaddy បានផ្សាយ កាលពីព្រឹក ថ្ងៃសៅរ៍ ទី៣១ ខែតុលាថា អង្គការសង្គមស៊ីវិលជាច្រើន នៅក្នុងរដ្ឋរ៉ាឃីន ​កំពុងតេអំពាវនាវដល់អង្គការសហប្រជាជាតិ និងភាគីអន្តរជាតិនានា ឱ្យប្រកាសបង្កើតតំបន់ហាមឃាត់ការហោះហើរ (ឬ No-fly zone) នៅក្នុងរដ្ឋភាគខាងលិច នៃប្រទេសមីយ៉ាន់ម៉ា​ ស្របពេល​​ចំនួនជនស៊ីវិល ដែលបានស្លាប់ដោយសារការវាយប្រហារតាមផ្លូវអាកាសពីរបបយោធាមីយ៉ាន់ម៉ា ប្រឆាំងនឹងក្រុមចលនាតស៊ូ បានកើនឡើងដល់កម្រិតមួយ​ មិនធ្លាប់មានពីមុនមក។

របបយោធាមីយ៉ាន់ម៉ា បានទម្លាក់គ្រាប់បែក លើគោលដៅស៊ីវិលជាច្រើនកន្លែង នៅក្នុងរយៈពេលមួយខែកន្លងមកនេះ បន្ទាប់ពីមានការវាយប្រហារតាមផ្លូវអាកាសមួយ ទៅលើ​ផ្សារដ៏ធំមួយ កាលពីថ្ងៃទី២៨ ខែកញ្ញា ដោយបានសម្លាប់មនុស្សយ៉ាងហោចណាស់ចំនួន៥០នាក់ និងបានជំរុញ​ឱ្យមានការថ្កោលទោសយ៉ាងទូលំទូលាយ ពីសហគមន៍អន្តរជាតិ។​

អង្គការសប្បុរសធម៌សង្គមស៊ីវិលអារ៉ាកាន់ (The Arakan Civil Society Charitable Organizations) ហៅកាត់ ACSO​ ដែលជាក្រុមឆត្រ នៃអង្គការក្នុងស្រុក និងអន្ដរជាតិចំនួន៧០  កំពុងតែអំពាវនាវជាបន្ទាន់ដល់ក្រុមប្រឹក្សាសន្ដិសុខ អង្គការសហប្រជាជាតិ (​​UN Security Council) ហៅកាត់ UNSC​, សមាគមប្រជាជាតិអាស៊ាន, រដ្ឋាភិបាលអន្ដរជាតិ និងអង្គការមនុស្សធម៌ពិភពលោក ជួយគាំទ្រដល់សេចក្ដីថ្លែងការណ៍របស់ខ្លួន ជាមួយនឹងការចាត់វិធានការជាបន្ទាន់ ដើម្បីរារាំងដល់ការបាត់បង់ជីវិតរបស់ជនស៊ីវិលផ្សេងៗបន្ដទៀត។​

ក្រៅពីការទាមទារឱ្យមានតំបន់ហាមឃាត់ការហោះហើរនោះ ក្រុមអង្គការ ASCO ក៏កំពុងទាមទារឱ្យមានវិធានការដាក់ទណ្ឌកម្មជាអន្តរជាតិ ដើម្បីកាត់ផ្តាច់នូវការផ្គត់ផ្គង់ប្រេងឥន្ធនៈសម្រាប់យន្តហោះ អាវុធ និងសម្ភារយោធាផ្សេងៗទៀត ដែលទ្រទ្រង់ដល់ប្រតិបត្តិការវាយប្រហារតាមផ្លូវអាកាស នៃរបបយោធាមីយ៉ាន់ម៉ា​។​ ការអំពាវនាវបែបនេះ បានកើតឡើង ក្រោយពេលមានការកើនឡើង នៃការវាយប្រហារយ៉ាងរង្គាល ទៅលើតំបន់ជនស៊ីវិលរស់នៅ  ចាប់តាំងពីការវាយប្រហារលើផ្សារដ៏មមាញឹកមួយកន្លែង ដែលបានបណ្ដាលឲ្យកើត​សោកដកម្មយ៉ាងរន្ធត់​បំផុត។​

មន្រ្ដីរបស់ក្រុមអង្គការ ACSO បានប្រាប់ដល់សារព័ត៌មានភូមា The Irrawaddy ថា៖«ក្រុមការងារ នៃអង្គការមនុស្សធម៌ក្នុងស្រុករបស់យើង បានស្ថិតនៅទីនេះ ដោយផ្ទាល់ និងបានឃើញហេតុការណ៍សម្លាប់កុមារ និងស្ត្រីមានផ្ទៃពោះ នៅក្នុងការទម្លាក់គ្រាប់បែក នៅទីក្រុងឃីយោកតាវ (​Kyauktaw) ។ ករណីវាយប្រហារសម្លាប់យ៉ាងរង្គាលបែបនេះ កំពុងតែជំរុញ​ឲ្យពួកយើង​ មានការអំពាវនាវជាបន្ទាន់បែបនេះឡើង»។​

បណ្ដាអង្គការដែលកំពុងតែតាមដានជម្លោះនានា នៅក្នុងប្រទេសមីយ៉ាន់ម៉ា ​រួមទាំងគម្រោងទិន្នន័យទីតាំង និងព្រឹត្តិការណ៍ជម្លោះប្រដាប់អាវុធ (The Armed Conflict Location & Event Data Project) ហៅកាត់​ ACLED​ បានកត់ត្រា ចំនួនអ្នកស្លាប់សរុប នៅក្នុងសង្គ្រាមស៊ីវិល នៃប្រទេសអាស៊ានមួយនេះ ចាប់តាំងពីក្រោយអំពើរដ្ឋប្រហារយោធា នៅថ្ងៃទី១ ខែកុម្ភៈ ឆ្នាំ២០២១ រហូតមក បានកើតឡើងដល់ជាង ១០០ ១00នាក់៕​