រាជធានីភ្នំពេញ៖ សមត្ថកិច្ចជំនាញផ្នែកឌីជីថលនៃក្រសួងមហាផ្ទៃ បានឃាត់ខ្លួនបុរសជាសង្ស័យម្នាក់ បន្ទាប់ពីរកឃើញថា បានប្រព្រឹត្តអំពើខុសច្បាប់ ដោយយកគណនីធនាគារផ្ទាល់ខ្លួន ជួលឱ្យក្រុមឧក្រិដ្ឋជនបរទេសប្រើប្រាស់សម្រាប់ធ្វើសកម្មភាពឆបោកតាមប្រព័ន្ធបច្ចេកវិទ្យា (Online Scam)....។

យោងតាមរបាយការណ៍ពីនាយកដ្ឋានប្រឆាំងបទល្មើសបច្ចេកវិទ្យា នៅថ្ងៃទី៣១ ខែតុលា ឆ្នាំ២០២៦ បានឱ្យដឹងថា ជនរងគ្រោះ បានដាក់ពាក្យបណ្តឹង ក្រោយចាញ់បោកក្រុមជនអនាមិកដែលបានទាក់ទាញ និង​លួមលោមឱ្យ​ចូល​រួម​ដាក់​ប្រាក់​​វិនិយោគតាមក្រុមតេឡេក្រាម (Group Telegram) សរុបជាទឹកប្រាក់ចំនួន១៥០០ដុល្លារអាម៉េរិក។ ដោយមានការ​សម្រប​សម្រួល​នីតិវិធីពីលោក​ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ កម្លាំង​ជំនាញ​ បានស្រាវជ្រាវ និងឈានទៅឃាត់​ខ្លួនបុរសជា​ជន​សង្ស័យរូបនោះ។ ជនសង្ស័យ យល់​ព្រមផ្តល់​គណនី​​ធនាគារផ្ទាល់ខ្លួន​ឱ្យទៅ​ក្រុមជនល្មើសជាមេក្លោង​ប្រើប្រាស់ ក្នុងការទទួលប្រាក់ពី​ការ​ឆ​បោក (Money Mule Account)។ ក្រោយពីព្រមព្រៀង មេក្លោងបានឱ្យ​បុរសជាម្ចាស់គណនីធនាគារ ទទួលប្រាក់ចំនួន១៥០០ដុល្លារ ពីជនរងគ្រោះ ដែលត្រូវពួកគេឆបោក។ 

ប៉ុន្តែបុរសជាម្ចាស់គណនីធនាគារ បានផ្ទេរប្រាក់តាមគណនីដែលមេក្លោងនោះបញ្ជា ត្រឹមតែ៧០០ដុល្លារប៉ុណ្ណោះ ដោយប្រាក់សល់៨០០ដុល្លារទៀត មិនបានផ្ទេរទៅគណនីដែលមេក្លោងបញ្ជាឱ្យផ្ទេរឡើយ។ ជាមួយគ្នា ដើម្បី​បានប្រាក់​ពីអំពើឆបោកនោះមកខ្លួនខ្លះដែរ បុរសជាម្ចាស់គណនីធនាគារ ​ក៏​គំរាមមេក្លោងថា បានប្តឹងសមត្ថកិច្ចនាយកដ្ឋានប្រឆាំងបទល្មើសបច្ចេក​​វិទ្យារួចហើយ។ ទោះយ៉ាងណា មកដល់ពេលនេះ បុរសជាម្ចាស់គណនីធនាគារ ត្រូវសមត្ថកិច្ចចាប់បាន ខណៈមេក្លោងរួចខ្លួននៅឡើយ។ បច្ចុប្បន្ន នាយកដ្ឋានប្រឆាំងបទល្មើសបច្ចេកវិទ្យា បានកសាងសំណុំរឿង និងបញ្ជូន​បុរសជាម្ចាស់គណនីធនាគារ ទៅកាន់អយ្យការអមសាលាដំបូងរាជធានីភ្នំពេញ ដើម្បី​ចាត់​ការ​​តាម​នីតិវិធីច្បាប់៕