ទីក្រុងតៃប៉ិ៖ បើតាមសេចក្ដីរាយការណ៍ថ្មីមួយ បានលើកឡើងថា កោះតៃវ៉ាន់ ក្លាយជាគោលដៅមួយ នៅក្នុងចំណោមគោលដៅយុទ្ធនាការវាយលុកតាមប្រព័ន្ធអ៊ិនធើរណេត កាលពីពេលថ្មីៗ តាមរយៈចំណុចខ្វះខាតនៃPHP ដើម្បីចូលទៅគ្រប់គ្រងម៉ាស៊ីនមេជាច្រើន(Servers)។ នេះបើតាមសារព័ត៌មាន Taiwan News ចេញផ្សាយនៅព្រឹកថ្ងៃសុក្រទី៣០ ខែតុលានេះ...។
ក្រុមហ៊ុន AI របស់អ៊ីស្រាអែល ឈ្មោះ Dream បានចេញផ្សាយរបាយការណ៍មួយ កាលពីដើមសប្ដាហ៍នេះ ដោយបានរៀបរាប់លម្អិត អំពីរបៀបដែលយុទ្ធនាការមានជំនួយពី AI នៅក្នុងខែតុលា កំណត់អត្តសញ្ញាណ និងគ្រប់គ្រងពេញលេញលើម៉ាស៊ីនមេ Palo Alto Networks ចំនួន២៥នៅទូទាំងកោះតៃវ៉ាន់ ជប៉ុន កូរ៉េខាងត្បូង និងសហរដ្ឋអាម៉េរិក។ របាយការណ៍នោះ បានលើកឡើងទៀតថា ការជ្រើសរើសគោលដៅបែបនេះ បានបង្ហាញអំពីកិច្ចខិតខំប្រឹងប្រែងរបស់គូប្រជែង ទៅលើប្រទេស ជាមួយនឹងការបន្ថែមថា ប្រទេសទាំងបួននេះ ជាគូប្រជែងភូមិសាស្ត្រនយោបាយសំខាន់បំផុតរបស់ប្រទេសចិន។ យុទ្ធនាការរបស់ក្រុមហេគឃ័រ បានប្រើប្រាស់ចំណុចន្លោះប្រហោងចំនួនពីរ នៅក្នុងភាសាសរសេរកម្មវិធី PHP ដែលគេហៅថា «PHP2Shell»។ ហេតុការណ៍នេះ បានជំរុញឱ្យរដ្ឋបាលសន្តិសុខសាយប័រ (ACS) របស់កោះតៃវ៉ាន់ ចេញសេចក្តីអំពាវនាវ កាលពីសប្តាហ៍មុន ដោយបានទាមទារឱ្យមានការធ្វើបច្ចុប្បន្នភាព លើកម្មវិធី (Software updates) នៅតាមស្ថាប័នរដ្ឋ និងក្រុមហ៊ុនអាជីវកម្មនានា។
ចំណុចចន្លោះប្រហោងទាំងនេះ អាចអនុញ្ញាតឱ្យក្រុមហេគឃ័រ ដំណើរការកូដពីចម្ងាយបាន ដោយមិនចាំបាច់មានការផ្ទៀងផ្ទាត់អត្តសញ្ញាណនោះឡើយ។ នៅក្នុងយុទ្ធនាការវាយលុកតាមប្រព័ន្ធអ៊ិនធើរណេតចុងក្រោយបង្អស់នេះ គឺប្រព័ន្ធបណ្ដាញសន្ដិសុខសាយប័រចំនួន២២ នៅក្នុងប្រទេសទាំងបួន ដែលក្រុមហេគឃ័របានលួចចូលទៅគ្រប់គ្រងនោះ ត្រូវបានគេទុកជាសន្ដិសុខតាមប្រព័ន្ធអ៊ិនធើរណេត ដែលលាក់កម្បាំង។ ច្រកទាំងនេះ អនុញ្ញាតឱ្យមានការចូលទៅកាន់ប្រព័ន្ធទាំងនោះឡើងវិញ ហើយ«អាចត្រូវបានគេប្រើប្រាស់ សម្រាប់វាយប្រហារ នៅពេលណាក៏បាន»។ ម៉ាស៊ីនមេ (servers) ចំនួន៣ ដែលស្ថិតនៅក្នុងបរិយាកាសពាក់ព័ន្ធនឹងរដ្ឋាភិបាលសហរដ្ឋអាម៉េរិក ត្រូវបានគេកំណត់គោលដៅជាក់លាក់ សម្រាប់ការលួចចូលទៅគ្រប់គ្រងកាន់តែខ្លាំង។ រដ្ឋបាលសន្តិសុខសាយប័រ (ACS) របស់កោះតៃវ៉ាន់ បានបញ្ជាក់កាលពីព្រឹកថ្ងៃសុក្រថា បណ្តាក្រុមហ៊ុននានា កំពុងជួសជុលប្រព័ន្ធរបស់ខ្លួន និងធ្វើបច្ចុប្បន្នភាព PHP ដោយសារតែមានចំណុចខ្វះខាតធ្ងន់ធ្ងរមួយចំនួន។
ការរកឃើញទាំងនេះ កើតឡើងបន្ទាប់ពីមានការលើកឡើងពីក្រុមអ្នកជំនាញ អះអាងថា សកម្មភាពទាំងនោះ អាចជាករណីដំបូងគេ ដែលបានដឹងអំពីការវាយប្រហារតាមប្រព័ន្ធអ៊ិនធើរណេត ដោយស្វ័យប្រវត្តិ ទៅលើប្រព័ន្ធរដ្ឋាភិបាលរបស់កោះតៃវ៉ាន់ ដោយប្រើប្រាស់បច្ចេកវិទ្យា AI។ ក្រុមហ៊ុន Dream ដែលបានលាតត្រដាង អំពីប្រតិបត្តិការនេះ កាលពីខែសីហា បានបញ្ជាក់ថា ភស្តុតាងដែលមាន គឺ«ចង្អុលបង្ហាញទៅកាន់ប្រតិបត្តិករ ដែលប្រើប្រាស់ភាសាចិន»៕
