រដ្ឋធានីញូវដេលី៖ អគ្គនាយកប៉ូលិសព្រំដែនឥណ្ឌូ-ទីបេត៍ នៃប្រទេសឥណ្ឌា (Indo-Tibetan Border Police) លោក សាទ្រូចេត កាពួរ (Shatrujeet Kapur) ​ថ្លែងថា កងទ័ពឥណ្ឌា និងចិន បានប្រឈមមុខដាក់គ្នា នៅទីតាំងជាច្រើនកន្លែង ស្ថិតក្នុងរដ្ឋអារូណាចាល់ ប្រាដែស (Arunachal Pradesh)...។

សារព័ត៌មាន The India Express បានចេញផ្សាយកាលពីថ្ងៃអាទិត្យទី២៥តុលាថា ស្របពេលមានសេចក្ដីរាយការណ៍ អំពីការប្រឈមមុខដាក់គ្នា រវាងកងទ័ពចិន និងឥណ្ឌា នៅក្នុងរដ្ឋ​អារុណាចាល់ ប្រាដេស ​ក្រសួងការបរទេសឥណ្ឌា បានថ្លែងថា ភាពតានតឹងបែបនេះ តែងតែកើតឡើង ខណៈ​កងកម្លាំងចិនផ្លាស់ប្ដូរអំពីទម្រង់ល្បាតដែលបានកំណត់ទុកជាមុន នៅតាមតំបន់ព្រំដែនមួយចំនួន។ ការលើកឡើងបែបនេះ បានធ្វើឡើង បន្ទាប់ពីលោកសាទ្រុជិត្រ កាពូរ (Shatrujeet Kapur) អគ្គនាយក​ប៉ូលិសព្រំដែនឥណ្ឌា-ទីបេត៍ (ITBP) បញ្ជាក់ថា កងទ័ពឥណ្ឌា និងចិន បានប្រឈមមុខដាក់គ្នាជារឿយៗ ខណៈស្ថានភាពនេះ នៅបន្តកើតមាន។

បើ​តាមសេចក្តីរាយការណ៍ជាច្រើន បានឱ្យដឹងថា ​ចាប់តាំងពីចុងខែកក្កដា ឆ្នាំ២០២៦ រហូត​មក កងទ័ពរំដោះប្រជាជនចិន (PLA) បានប្រឈមមុខដាក់គ្នា ជាមួយកងកម្លាំងឥណ្ឌា នៅជិតតំបន់ Asaphila (អាសាភីឡា) និងតាក់ស៊ីង (Taksing) ស្ថិតក្នុងស្រុក Upper Subansiri (អាប់ភើរ ស៊ូបានស៊ីរី) នៃរដ្ឋ​អារុណាចាល់ ប្រាដេស ដោយរួមទាំងការបោះតង់នៅក្នុងចម្ងាយ ចន្លោះពី៦ទៅ៧គីឡូម៉ែត្រ ពីចំណុចដែលឥណ្ឌា កំណត់ថា វាជាខ្សែបន្ទាត់ នៃការគ្រប់គ្រងជាក់ស្តែង​ ឬ ឡាក់ (Line of Actual Control ឬ​ LAC)។​

រដ្ឋធានីប៉េកាំង បានហៅតំបន់អារូណាចាល់ ប្រាដេស (Arunachal) ជាហ្សាងណាន (​Zangnan) ឬទីបេត៍ខាងត្បូង ​(South Tibet) និងអះអាងថា វាជាទឹកដីរបស់ចិន។ ប៉ុន្ដែរដ្ឋាភិបាលរដ្ឋធានីញូវដេលី (​New Delhi)​ បានច្រានចោលយ៉ាងដាច់អហង្កា ចំពោះការអះអាងរបស់ចិន លើទឹកដីរដ្ឋ​អារុណាចាល់ ប្រាដេស។ ទន្ទឹមគ្នា ក្រសួងការបរទេសឥណ្ឌា បានបញ្ជាក់ជាថ្មីថា រដ្ឋ​អារុណាចាល់ ប្រាដេស គឺជា«ផ្នែកមួយដ៏សំខាន់ និងមិនអាចកាត់ផ្តាច់បានរបស់ប្រទេសឥណ្ឌា​។ ទោះជាយ៉ាងណាក៏ដោយ ការប្រឈមមុខដាក់គ្នា រវាងកងទ័ពចិន និងឥណ្ឌា មិនមានសេចក្ដីរាយការណ៍អំពីគ្រោះថ្នាក់ ដល់កងទ័ព នៃភាគីណាមួយឡើយ៕