រដ្ឋធានីហ្សាការតា៖ ប៉ូលិសឥណ្ឌូណេស៊ី បានអះអាងពីការរឹបអូសកប៉ាល់ដឹកប្រេង​ MT Global 168 ដែលជាកម្មសិទ្ធិរបស់ជនជាតិម៉ាឡេស៊ី ដោយមានជាប់ពាក់ព័ន្ធនឹងក្រុមហ៊ុនមួយ ដែលមានមូលដ្ឋាននៅទីក្រុងចូហ័រ បារូ (​Johor Bahru) ប្រទេសម៉ាឡេស៊ី...។

សារព័ត៌មានហុងកុង South China Morning Post បានចេញផ្សាយកាលពីល្ងាចថ្ងៃអាទិត្យទី២៥ ខែតុលាថា អាជ្ញាធរឥណ្ឌូណេស៊ី បានចាប់កប៉ាល់ដឹកប្រេងមួយគ្រឿង ដែលបានប្រើប្រាស់ជាមធ្យោបាយនៅក្នុងការប៉ុនប៉ងរត់ពន្ធគ្រឿងញៀន ខេតាមីន (Ketamine) មានទម្ងន់១,១៦តោន គ្រប់គ្រងដោយក្រុមហ៊ុនមួយ ដែលបានចុះបញ្ជីនៅក្នុងប្រទេសម៉ាឡេស៊ី។​​ លោក ហ៊ូសសេន អូម៉ា ខាន់ (Hussein Omar Khan) ប្រធាននាយកដ្ឋានស៊ើបអង្កេតបទល្មើសគ្រឿងញៀន នៃអគ្គស្នងការដ្ឋានប៉ូលិសជាតិម៉ាឡេស៊ី ​ បានបញ្ជាក់​ថា នាយក២រូបនៃ​ក្រុមហ៊ុនមួយ ​​ដែលជាម្ចាស់កប៉ាល់ដឹកប្រេង MT Global 168 ជាជនជាតិម៉ាឡេស៊ី។ រីឯការិយាល័យក្រុមហ៊ុននេះ មានទីតាំង​នៅ​ទីក្រុងចូហ័រ បារូ នៃ​​រដ្ឋចូហ័រ ប្រទេសម៉ាឡេស៊ី។​​

បើតាមប្រធាននាយកដ្ឋានស៊ើបអង្កេតបទល្មើសគ្រឿងញៀន នៃអគ្គស្នងការដ្ឋានប៉ូលិសជាតិម៉ាឡេស៊ី បានឱ្យដឹងថា កប៉ាល់​ដឹកប្រេងនោះ ធ្លាប់​បានដាក់ពាក្យស្នើសុំចុះបញ្ជី ក្រោមទង់ជាតិម៉ាឡេស៊ី ប៉ុន្តែកប៉ាល់នោះមិនទាន់​បានចុះបញ្ជីនៅឡើយ​ទេ។ បច្ចុប្បន្ន កប៉ាល់នេះ កំពុងធ្វើដំណើរក្រោមទង់ជាតិម៉ុងហ្គោលី។​ ប៉ូលិសម៉ាឡេស៊ី ទទួលបានព័ត៌មានពីសមភាគីឥណ្ឌូណេស៊ី ពាក់ព័ន្ធនឹងការរឹបអូសសារធាតុញៀន ខេតាមីន (Ketamine Hydrochloride) មានទម្ងន់​​១,១៦តោន មានតម្លៃ​ប្រហែល១៤លានដុល្លារអាម៉េរិក ពីនាវាដឹកប្រេង​មួយគ្រឿងនោះ៕