រាជធានីតូក្យូ៖ កងទ័ពសហរដ្ឋអាម៉េរិក បានដាក់កម្រិតរឹតបន្ដឹង និងហាមឃាត់​យានយន្ដផលិតដោយក្រុមហ៊ុនចិន BYD ចូលទៅក្នុងមូលដ្ឋានកងទ័ពអាកាសដ៏ធំរបស់ខ្លួន ឈ្មោះ ខាដេណា (​Kadena) ស្ថិតក្នុងខេត្តអូគីណាវ៉ា (Okinawa) ប្រទេសជប៉ុន ដោយសារមានការព្រួយបា​​រម្ភយ៉ាងខ្លាំង លើផ្នែកសន្តិសុខ ពាក់ព័ន្ធនឹងយានយន្តទាំងនោះ...។

សារព័ត៌មាន The Japan Times បានចេញផ្សាយនៅព្រឹកថ្ងៃចន្ទទី២៦ ខែតុលាថា ការហាមឃាត់បែបនេះ ​បានចាប់ផ្តើមអនុវត្តពី​ថ្ងៃចន្ទតទៅ ដោយអនុវត្តតែចំពោះមូលដ្ឋានកងទ័ពអាកាស Kadena ប៉ុណ្ណោះ ខណៈ​បច្ចុប្បន្ន​មូលដ្ឋានកងទ័ពអាកាសមួយនេះ ​ក្លាយជាមូលដ្ឋានកងទ័ពអាកាសដ៏ធំបំផុតមួយ​របស់សហរដ្ឋអាម៉េរិក នៅក្នុងតំបន់។​​​​ ទោះជាយ៉ាងណា កងទ័ពសហរដ្ឋអាម៉េរិកនៅក្នុងប្រទេសជប៉ុន មិនបានពន្យល់ឱ្យច្បាស់​ ថា តើមានហេតុផលអ្វី ដែលនាំឱ្យមានរឹតបន្ដឹងបែបនេះ? ស្របគ្នានេះ​ មន្ត្រីនៅមូលដ្ឋានកងទ័ពអាកាសខាដេណា ​ ក៏មិនបានឆ្លើយតបភ្លាមៗ ចំពោះការសុំ​អត្ថាធិប្បាយនោះដែរ។

លោកវរសេនីយ៍ឯក ចន សេវើនស៍ (John Severns) អ្នកនាំពាក្យកងកម្លាំងសហរដ្ឋអាម៉េរិកប្រចាំនៅប្រទេសជប៉ុន (USFJ) បានបញ្ជាក់ថា៖«មេបញ្ជាការ នៃមូលដ្ឋានកងទ័ពនីមួយៗ មានការទទួល​ខុសត្រូវ នៅក្នុងការការពារបុគ្គលិក ការការពារទីតាំង និងបេសកកម្មដែលខ្លួនទទួលបន្ទុក។ មេបញ្ជាការទាំងនោះ ​អាចអនុវត្តវិធានការសន្តិសុខ ស្របតាមច្បាប់កំណត់ ដោយផ្អែកលើការវាយតម្លៃអំពីហានិភ័យ ដើម្បីកាត់បន្ថយនូវការគំរាមកំហែងនានា ដែលអាចកើតឡើងយ៉ាងពិតប្រាកដ»។​ ការចេញបម្រាបបែបនេះ កើតឡើង ខណៈសហរដ្ឋអាម៉េរិក និងបណ្ដាប្រទេសលោកខាងលិច កំពុងបង្កើនការប្រុងប្រយ័ត្នផ្នែកសន្តិសុខ បន្ទាប់ពីមានការបារម្ភពាក់ព័ន្ធនឹងបច្ចេកវិទ្យាឆ្លាតវៃ ដែលប្រើប្រាស់នៅក្នុងរថយន្ត​របស់ចិន មានដូចជា BYD, MG និង Jaecoo…ជាដើម។​

ការណែនាំអំពីសុវត្ថិភាព បានចេញកាលពីចុងខែកញ្ញា ដោយរដ្ឋាភិបាលហូល្លង់ដ៏ ព្រមាន​ថា បច្ចេកវិទ្យដ៏ទំនើបរបស់យានយន្ដនានា ដោយរាប់បញ្ចូលទាំងប្រព័ន្ធ​ GPS, មីក្រូហ្វូន (Microphones), កាម៉េរ៉ា, ប្រព័ន្ធឧបករណ៍កម្សាន្ដ​ និងការភ្ជាប់ប្លូធូត សុទ្ធតែអាចត្រូវប្រើប្រាស់ សម្រាប់កិច្ចការចារម្ម ដោយរដ្ឋផ្សេងបាន។​ សហរដ្ឋអាម៉េរិក កាលពីឆ្នាំ២០២៥ ក៏បានចេញបម្រាមលើការលក់យានយន្តចិនមួយចំនួន រួមទាំងផ្នែករឹង (Hardware) និងផ្នែកទន់ (software)ពាក់ព័ន្ធនានា ប្រសិនបើគេយល់ឃើញថា វាអាចបង្កជាហានិភ័យដល់សន្តិសុខជាតិ។ ប៉ុន្ដែកាលពី​ខែមិថុនា ឆ្នាំ២០២៦ កន្លងទៅ មន្ទីរបញ្ចកោណនៃក្រសួងសង្គ្រាមសហរដ្ឋអាម៉េរិក ក៏​​បានដាក់បញ្ចូលក្រុមហ៊ុន BYD ទៅក្នុងបញ្ជីខ្មៅដែលមានក្រុមហ៊ុនចំនួន១៨៨ ក្រោមចំណាត់ថ្នាក់ ជា«ក្រុមហ៊ុនយោធាចិន» ដោយបានហាមឃាត់ការទិញដោយផ្ទាល់ ឬការចុះកិច្ចព្រមព្រៀង ជាមួយក្រុមហ៊ុនទាំងនោះ។

ទោះជាយ៉ាងណា គេនៅមិនទាន់ដឹងច្បាស់នៅឡើយ​ទេថា តើបម្រាមលើក្រុមហ៊ុន BYD នេះ នឹងត្រូវអនុវត្តពង្រីកទៅលើមូលដ្ឋានកងទ័ពសហរដ្ឋអាម៉េរិកផ្សេងៗទៀត នៅក្នុងប្រទេសជប៉ុន ដែរឬណា? មូលដ្ឋានទ័ពអាកាស Kadena ​ជាចំណុចយុទ្ធសាស្ត្រដ៏សំខាន់មួយ សម្រាប់ប្រតិបត្តិការយោធារបស់សហរដ្ឋអាម៉េរិក នៅក្នុងតំបន់។ ប្រព័ន្ធមីស៊ីលរយៈចម្ងាយមធ្យម ប្រភេទ Typhon របស់យោធាសហរដ្ឋអាម៉េរិក ដែលគេជឿថា អាចបាញ់មីស៊ីលប្រភេទ Tomahawk នៅក្នុងរយៈចម្ងាយរហូតដល់១ ៦០០គីឡូម៉ែត្រនោះ បច្ចុប្បន្ន កំពុងត្រូវ​រក្សាទុកនៅក្នុងមូលដ្ឋានកងទ័ពអាកាសមួយនេះ បន្ទាប់ពីប្រព័ន្ធមីស៊ីលទាំងនេះ ​​បានដាក់ពង្រាយ សម្រាប់ការធ្វើសមយុទ្ធយោធារួមគ្នា កាលពីដើមឆ្នាំ២០២៦។ ការសម្រេចចិត្តរក្សាទុកអាវុធដ៏កំណាចប្រភេទនេះ នៅទីនោះ «ជាបណ្តោះអាសន្ន» ធ្វើឱ្យតំបន់មួយចំនួនរបស់ប្រទេសចិន ស្ថិតនៅក្នុងរយៈចម្ងាយ ដែលអាចវាយប្រហារបាន ហើយវាបានបង្កឱ្យមានការខឹងសម្បា​យ៉ាងខ្លាំង ពីរដ្ឋាភិបាលរដ្ឋធានីប៉េកាំងផងដែរ៕​