ក្រុងព្រះសីហនុ៖ កម្លាំងនគរបាលក្រុងព្រះសីហនុ បានបើកប្រតិបត្តិការស្រាវជ្រាវ និងបង្ក្រាបបទល្មើសផ្សេងៗ បានចំនួន១៨ករណី ឃាត់ខ្លួនជនសង្ស័យសរុប២៥នាក់ ត្រឹមរយៈពេលជាង២សប្ដាហ៍ប៉ុណ្ណោះ ពោលគឺចាប់ពីថ្ងៃទី០៣ ដល់ថ្ងៃទី១៨ ខែតុលា…។

ផ្អែកតាមរបាយការណ៍របស់មន្ត្រីសមត្ថកិច្ច បានឱ្យដឹងកាលពីរសៀលថ្ងៃសៅរ៍ទី២៤ ខែតុលាថា ជនសង្ស័យទាំង២៥នាក់ ត្រូវបានកសាងសំណុំរឿងបញ្ជូនទៅកាន់អយ្យការអមសាលាដំបូងខេត្តព្រះសីហនុ ដើម្បីចាត់ការតាមនីតិវិធីច្បាប់ ព្រមទាំងបន្តស្រាវជ្រាវ ស្វែងរកបក្ខពួកដែលកំពុងរត់គេចខ្លួន ដើម្បីយកមកផ្តន្ទាទោសបន្ថែមទៀត។ ក្នុងប្រតិបត្តិការខាងលើ សមត្ថកិច្ចនគរបាល បានបង្ក្រាបបទល្មើសជាច្រើនករណី រួមមាន៖ អំពើចោរកម្ម, រំលោភលើទំនុកចិត្ត, ប៉ុនប៉ងចោរកម្ម (លួចម៉ូតូ ខ្សែភ្លើង និងសម្ភារលោហៈ), អំពើហិង្សាដោយចេតនា និងករណីកាន់កាប់អាវុធដោយគ្មានការអនុញ្ញាត។

ជាលទ្ធផល វត្ថុតាងដែលដកហូតបានរួមមាន៖ ទោចក្រយានយន្ត១២គ្រឿង,​ អាវុធខ្លី ១ដើម (ព្រមទាំងបង់ និងគ្រាប់រំសេវ២គ្រាប់), ទូរសព្ទដៃ, ខ្សែភ្លើង, សម្ភារលោហៈ, ឧបករណ៍កាត់ខ្សែ, កាំបិត, ទួណឺវីស និងសម្ភារពាក់ព័ន្ធមួយចំនួនទៀត។ ចំពោះសម្ភារ និងវត្ថុតាង ដែលជាផលនៃអំពើល្មើស ត្រូវបានសមត្ថកិច្ចនគរបាល ប្រគល់ជូនម្ចាស់ដើមវិញ។ គូសបញ្ជាក់ថា ស្នងការដ្ឋាននគរបាលខេត្តព្រះសីហនុ ប្តេជ្ញាបន្តពង្រឹងការល្បាត ស្រាវជ្រាវ និងបង្ក្រាបបទល្មើសគ្រប់ប្រភេទ ដើម្បីធានាសន្តិសុខ សុវត្ថិភាព និងសណ្តាប់ធ្នាប់សង្គម ជូនដល់ប្រជាពលរដ្ឋ ភ្ញៀវទេសចរ ព្រមទាំងវិនិយោគិនទាំងអស់ក្នុងខេត្តព្រះសីហនុ៕