រដ្ឋធានីតេហេរ៉ង់៖ ស្ថានការណ៍នៅតំបន់មជ្ឈិមបូព៌ា ផ្ដើមឡើងកម្ដៅកាន់តែខ្លាំង លើភាពតានតឹងដែលមានស្រាប់ ក្រោយលោកនាយករដ្ឋមន្រ្ដី បេនចាមីន នេតាន់យ៉ាហ៊ូ បញ្ជាកងទ័ពអ៊ីស្រាអែល ទីភ្នាក់ងារចារកម្មជាតិទទួលបន្ទុកកិច្ចការបរទេស (Mossad) និងទីភ្នាក់ងារសន្ដិសុខមួយចំនួនទៀត តាមស្រាវជ្រាវ និងស្វែងរក ដើម្បីសម្លាប់មេដឹកនាំកំពូលអ៊ីរ៉ង់ថ្មី លោក ម៉ូចតាបា ខាមេនី ដែលកំពុងលាក់ខ្លួន ចាប់តាំងពីឡើងកាន់តំណែងរហូតមក ខណៈសមាជិកសភាជាន់ខ្ពស់អ៊ីរ៉ង់ កំពុងជំរុញឱ្យរដ្ឋាភិបាលរដ្ឋធានីតេហេរ៉ង់ ប្រើប្រាស់អាវុធប្រហារប្រល័យលោក ប្រសិនបើសហរដ្ឋអាម៉េរិក វាយប្រហារមកលើអ៊ីរ៉ង់ម្ដងទៀត...។
លោកនាយករដ្ឋមន្រ្ដី នេតាន់យ៉ាហ៊ូ បានថ្លែងទៅកាន់ពិធីបិទបញ្ចប់វគ្គសិក្សារបស់នាយទាហាន នៃកងកម្លាំងការពារអ៊ីស្រាអែល (IDF) ថា៖«មានមធ្យោបាយតែមួយគត់ ដើម្បីលុបបំបាត់នូវការគំរាមកំហែងទាំងនេះ ឱ្យអស់ទៅវិញជាស្ថាពរ មានតែការផ្តួលរំលំរបបដឹកនាំ នៅអ៊ីរ៉ង់។ នេះជាការណែនាំរបស់ខ្ញុំ ទៅកាន់កងកម្លាំងការពារអ៊ីស្រាអែល, Mossad និងស្ថាប័នសន្តិសុខផ្សេងៗទៀត»។ សារព័ត៌មានដ៏ល្បីល្បាញរបស់អាម៉េរិក New York Post ក៏បានចេញផ្សាយកាលពីល្ងាចថ្ងៃព្រហស្បតិ៍ទី២២តុលាថា លោក បេនចាមីន នេតាន់យ៉ាហ៊ូ បានណែនាំដល់កងកម្លាំងការពារអ៊ីស្រាអែល (IDF), ទីភ្នាក់ងារស៊ើបការណ៍សម្ងាត់ម៉ូសសាដ ដែលជាទីភ្នាក់ងារចារកម្ម និងជាកងកម្លាំងប្រតិបត្ដិការពិសេស និងស្ថាប័នសន្តិសុខផ្សេងៗទៀត ត្រូវស្វែងរកមេដឹកនាំកំពូលអ៊ីរ៉ង់ លោក ម៉ូចតាបា ខាមេនី ដើម្បីផ្តួលរំលំរបបដឹកនាំប្រទេសអ៊ីរ៉ង់ ដោយលោកចាត់ទុកថា នេះជាមធ្យោបាយតែមួយគត់ ដើម្បីលុបបំបាត់នូវការគំរាមកំហែង ដោយអាវុធនុយក្លេអ៊ែរ ពីរដ្ឋាភិបាលរដ្ឋធានីតេហេរ៉ង់។
មេដឹកនាំអ៊ីស្រាអែល រូបនេះ សង្កត់ធ្ងន់ថា៖«ដរាបណារបបនេះ នៅមានវត្តមាន ហើយដរាបណាពួកគេនៅតែខិតខំប្រឹងប្រែង ស្វែងរកអាវុធដ៏គួរឱ្យភ័យខ្លាច នោះ ប្រទេសអ៊ីស្រាអែល និងពលរដ្ឋអ៊ីស្រាអែល នឹងត្រូវប្រឈមមុខនឹងការគំរាមកំហែង ដល់អាយុជីវិត។ ភារកិច្ចរបស់យើង ជាភារកិច្ចរបស់ជាតិយើងទាំងអស់គ្នា គឺត្រូវសង្គ្រោះជាតិ»។ ស្របពេលនេះដែរ បណ្ដាញទូរទស្សន៍ផ្សព្វផ្សាយនៅពាសពេញពិភពលោក ជាភាសាពែរក្ស (Persian អ៊ីរ៉ង់) អង់គ្លេស និងអារ៉ាប់ Iran International មានមូលដ្ឋាននៅរាជធានីឡុងដ៍ ចក្រភពព្រីតថែន បានចេញផ្សាយដំណឹងនេះ នៅព្រឹកថ្ងៃសុក្រទី២៣ ខែតុលានេះថា ប្រធានគណៈកម្មាធិការកិច្ចការផ្ទៃក្នុងរបស់សភាអ៊ីរ៉ង់ កាលពីថ្ងៃព្រហស្បតិ៍ បានអំពាវនាវដល់រដ្ឋាភិបាលរដ្ឋធានីតេហេរ៉ង់ ត្រូវតែសម្រេចចិត្ត ប្រើប្រាស់អាវុធដ៏គ្រោះថ្នាក់បំផុត ដោយរាប់បញ្ចូលទាំងអាវុធនុយក្លេអ៊ែរ ប្រសិនបើ សហរដ្ឋអាម៉េរិក វាយប្រហារមកលើប្រទេសអ៊ីរ៉ង់ ជាថ្មី។
លោក ម៉ូហាមម៉េដ-សាឡេះ ចូការ ប្រធានគណៈកម្មាធិការកិច្ចការផ្ទៃក្នុងរបស់សភាអ៊ីរ៉ង់ បញ្ជាក់ថា៖«នៅក្នុងកិច្ចការការពារជាតិ និងក្នុងគោលបំណងរារាំងសត្រូវ ខ្ញុំសូមស្នើឱ្យអាជ្ញាធរ នៃសាធារណរដ្ឋអ៊ិស្លាមអ៊ីរ៉ង់ អនុញ្ញាតឱ្យមានការប្រើប្រាស់អាវុធ សម្រាប់រារាំង ដោយរាប់បញ្ចូលទាំងអាវុធនុយក្លេអ៊ែរផងដែរ ប្រសិនបើមានការវាយប្រហារពីសហរដ្ឋអាម៉េរិក មកលើប្រទេសអ៊ីរ៉ង់»។ ទន្ទឹមគ្នា សមាជិកសភាជាន់ខ្ពស់អ៊ីរ៉ង់រូបនេះ ក៏បានអំពាវនាវឱ្យមេដឹកនាំអ៊ីរ៉ង់ ផ្អាកធ្វើកិច្ចសហប្រតិបត្តិការរបស់ខ្លួន ជាមួយ«សន្ធិសញ្ញា ស្ដីអំពីការមិនរីកសាយភាយអាវុធនុយក្លេអ៊ែរ» (Nuclear Non-Proliferation Treaty) នៅក្នុងករណីមានការវាយប្រហារពីសហរដ្ឋអាម៉េរិកម្ដងទៀត។ បន្ថែមពីលើនេះ លោកក៏បានព្រមានថា ប្រទេសណាមួយ ដែលអនុញ្ញាតឱ្យប្រើប្រាស់ទឹកដី ឬដែនអាកាសរបស់ខ្លួន សម្រាប់ការវាយប្រហារមកលើប្រទេសអ៊ីរ៉ង់ នោះ នឹងត្រូវប្រឈមមុខជាមួយនឹង«ការឆ្លើយតបដ៏ធ្ងន់ធ្ងរ» និង«ត្រូវតែទទួលរងផលវិបាក ពីការវាយប្រហាររបស់រដ្ឋាភិបាលរដ្ឋធានីតេហេរ៉ង់»៕
