រាជធានីបាងកក៖ ប៉ូលិសថៃ បានដាក់ពង្រាយទូកុងតឺន័រជាច្រើន ​នៅតាមផ្លូវនានា​ ឆ្ពោះទៅកាន់​មជ្ឈមណ្ឌលសន្និបាតជាតិមហាក្សត្រិយានីស៊ីរីគីត (​Queen Sirikit) ស្ថិតក្នុងរាជធានីបាងកក ដើម្បីរារាំង​​ដល់ក្រុមកសិករ និងសកម្មជន​ ដង្ហែ​ក្បួន​តវ៉ា ប្រឆាំងនឹងកិច្ចប្រជុំប្រចាំឆ្នាំរបស់មូលនិធិរូបិយវត្ថុអន្តរជាតិ ​ហៅកាត់ «IMF» និងធនាគារពិភពលោក។

ប្រព័ន្ធផ្សព្វផ្សាយរបស់ប្រទេសថៃ បានរាយការណ៍ កាលពីរសៀល ថ្ងៃសុក្រ ទី១៦ ខែតុលាថា ​ក្រុម«សមាគមជនក្រីក្រ»​របស់ប្រទេសថៃ ដែលជា​ចលនាកសិករអន្តរជាតិមួយឈ្មោះ «La Via Campesina» បានជួបជុំគ្នា នៅវេលាម៉ោង៨​ព្រឹកថ្ងៃសុក្រ នៅច្រកទ្វារទី១ នៃ​ឧទ្យានលុម្ពិនី (Lumpini Park) ទល់មុខប៉ុស្តិ៍ប៉ូលិសលុម្ពិនី នៅមុននឹងដង្ហែ​ក្បួន ឆ្ពោះទៅកាន់ផ្លូវសុខុមវីត (​Sukhumvit) និងផ្លូវបំបែកអាសុក (​Asok) ​នៅជិតទីតាំងរៀបចំកិច្ចប្រជុំរបស់​មូលនិធិរូបិយវត្ថុអន្តរជាតិ ​ហៅកាត់ «IMF» និងធនាគារពិភពលោក។​

ប៉ូលិសទីក្រុងបាងកក បានដាក់ទូកុងតឺន័រទាំងសងខាង​ដងផ្លូវរ៉ាតចាដាភិសេក (​Ratchadaphisek) ​ដើម្បីរារាំងដល់ក្រុមអ្នកតវ៉ា មិនឱ្យចូលទៅដល់មជ្ឈមណ្ឌលសន្និបាត ដែលជាទីកន្លែងរៀបចំកិច្ចប្រជុំប្រចាំឆ្នាំរបស់មូលនិធិរូបិយវត្ថុអន្តរជាតិ ​ហៅកាត់ «IMF» និងធនាគារពិភពលោក ដែលបានធ្វើឡើង ចន្លោះពី​ថ្ងៃទី​១២ ដល់ ១៨ ខែតុលា។

ការតវ៉ានេះ​ជាផ្នែកមួយ​នៃចលនា «La Via Campesina» នៅក្នុងប្រទេសជាង៦០ ដែលបានលើកឡើងនូវសំណើ ចំនួន៦ចំណុច ដោយ​ផ្ដោតទៅលើស្ថាប័នហិរញ្ញវត្ថុអន្តរជាតិ ជាពិសេស ធនាគារពិភពលោក និងមូលនិធិរូបិយវត្ថុអន្តរជាតិ (IMF)។ ក្រុមអ្នកតវ៉ា បានអះអាងថា ស្ថាប័នទាំងនេះ ធ្វើឱ្យប៉ះពាល់ដល់លទ្ធិប្រជាធិបតេយ្យ និងអធិបតេយ្យភាពស្បៀងអាហារ ព្រមទាំងបន្តពង្រឹងនូវអ្វីដែលពួកគេហៅ​ ជា«ប្រព័ន្ធអាណានិគមនិយមសម័យថ្មី» ​ដែលជិះជាន់ និងគ្រប់គ្រងសហគមន៍មូលដ្ឋាន។

កិច្ចប្រជុំប្រចាំឆ្នាំរបស់ IMF និងធនាគារពិភពលោកនេះ បានប្រមូលផ្តុំមន្ត្រីធនាគារកណ្តាល  រដ្ឋមន្ត្រីក្រសួងហិរញ្ញវត្ថុនិងអភិវឌ្ឍន៍ ថ្នាក់ដឹកនាំមកពីវិស័យឯកជន តំណាងសង្គមស៊ីវិល និងក្រុមអ្នកសិក្សាស្រាវជ្រាវ ដើម្បីពិភាក្សាគ្នា អំពីទស្សនវិស័យសេដ្ឋកិច្ចសកល ស្ថិរភាពហិរញ្ញវត្ថុ ការកាត់បន្ថយភាពក្រីក្រ និងបញ្ហាអន្តរជាតិផ្សេងៗទៀត៕

​​