ក្រុងពោធិ៍សាត់៖ បន្ទាប់ពីក្រសួងធនធានទឹក និងឧតុនិយម ចេញការព្រមានអំពីឥទ្ធិពលនៃរបបខ្យល់មូសុងនិរតី ដែលនាំមកនូវបាតុភូតភ្លៀង ខ្យល់កន្ត្រាក់ និងផ្គររន្ទះទូទាំងប្រទេស រយៈពេល៩ថ្ងៃរួចមក ឥឡូវនេះ ឥទ្ធិពលព្យុះទី៣០ ឈ្មោះ «ចំប៉ី» (Champi) បានបង្កការខូចខាតយ៉ាងធ្ងន់ធ្ងរដល់ផ្ទះបណ្ដែតទឹករបស់ប្រជាពលរដ្ឋ និងសាលារៀន នៅលើផ្ទៃបឹងទន្លេសាប ក្នុងខេត្តពោធិ៍សាត់…។

បើតាមក្រសួងធនធានទឹក និងឧតុនិយម ព្យុះទី៣០ ឈ្មោះ ចំប៉ី (Champi) មានឥទ្ធិពលមកលើប្រទេសកម្ពុជារយៈពេល៩ថ្ងៃ ចាប់ពីថ្ងៃទី១៥ ដល់ថ្ងៃទី២៣ ខែតុលា ឆ្នាំ២០២៦។ ក្រោយការប្រកាស ខ្យល់កន្ត្រាក់បានចាប់ផ្តើមបោកបក់ខ្លាំង កើតឡើងកាលពីវេលាម៉ោង៣:០០រសៀលថ្ងៃទី១៥ ខែតុលា ឆ្នាំ២០២៦ ស្ថិតក្នុងភូមិក្អមសំណរ ឃុំមេទឹក ស្រុកបាកាន ខេត្តពោធិ៍សាត់ បានបណ្ដាលឱ្យផ្ទះបណ្ដែតទឹកចំនួន៥ខ្នង និងសាលាបឋមសិក្សា១ខ្នង ក្រឡាប់លិចចូលទៅក្នុងទឹកបាតទន្លេសាប។ យ៉ាងណា អាជ្ញាធរបានបញ្ជាក់ថា ហេតុការណ៍ដ៏រន្ធត់នេះ មិនបានបណ្ដាលឱ្យមានមនុស្សណាម្នាក់រងគ្រោះថ្នាក់ដល់ជីវិត ឬរងរបួសនោះឡើយ។

តាមការបញ្ជាក់ពីសមត្ថកិច្ចមូលដ្ឋាន ផ្ទះបណ្ដែតទឹកដែលរងការខូចខាតទាំង៥ខ្នងនោះ សុទ្ធសឹងជាសំណង់សង់អំពីឈើប្រក់ស័ង្កសី ក្នុងនោះមាន៣ខ្នង មានទំហំបណ្តោយ ៤ម៉ែត្រ ទទឹង៨ម៉ែត្រ និង២ខ្នងទៀត មានទំហំបណ្តោយ៩ម៉ែត្រ ទទឹង៤ម៉ែត្រ។ ជាមួយគ្នា សាលាបឋមសិក្សាក្អមសំណរ១ខ្នង ដែលមាន២បន្ទប់ (ទំហំទទឹង៧ម៉ែត្រ និងបណ្តោយ១៥ម៉ែត្រ) ក៏ត្រូវបានកម្លាំងខ្យល់កន្ត្រាក់បោកបក់ឱ្យក្រឡាប់ចូលក្នុងទឹកដូចគ្នា។ ភ្លាមៗ ក្រោយកើតហេតុ អាជ្ញាធរស្រុកបាកាន បានចុះអន្តរាគមន៍ និងចាត់ចែងនាំយកអំណោយសង្គ្រោះបន្ទាន់ទៅផ្ដល់ជូនប្រជាពលរដ្ឋ ដែលរងផលប៉ះពាល់ ដើម្បីសម្រាលទុក្ខធុរៈជាបណ្តោះអាសន្ន។ ទន្ទឹមគ្នា កម្លាំងអាជ្ញាធរមូលដ្ឋាន សមត្ថកិច្ច និងប្រជាពលរដ្ឋក្នុងតំបន់ កំពុងប្រកៀកស្មាគ្នាជួយអន្តរាគមន៍ស្រោចស្រង់ រំកិល និងកែខៃផ្ទះសម្បែង ព្រមទាំងអគារសាលារៀនដែលក្រឡាប់ចូលក្នុងទឹក ឱ្យងើបឈរឡើងវិញ។

បាតុភូតធម្មជាតិនេះ បានស្តែងឱ្យឃើញកាន់តែច្បាស់ពីហានិភ័យខ្ពស់នៃខ្យល់កន្ត្រាក់ចំពោះសំណង់បណ្ដែតទឹកនៅលើផ្ទៃបឹងទន្លេសាប ជាពិសេស ក្នុងអំឡុងពេលដែលអាកាសធាតុមានការប្រែប្រួលខ្លាំង។ អាជ្ញាធរមានសមត្ថកិច្ច ក៏ដូចជាក្រសួងជំនាញ នៅតែបន្តអំពាវនាវ និងរម្លឹកដល់បងប្អូនប្រជាពលរដ្ឋ ដែលរស់នៅលើផ្ទៃទឹក និងតំបន់ប្រឈមនានា ឱ្យបង្កើនការប្រុងប្រយ័ត្នឱ្យបានខ្ពស់បំផុត តាមដានព័ត៌មានការព្យាករអាកាសធាតុជាប្រចាំ និងរៀបចំ ចំរឹង ឬទប់ទល់ផ្ទះសម្បែងឱ្យបានរឹងមាំ ជៀសវាងជួបគ្រោះថ្នាក់ និងការបាត់បង់ទ្រព្យសម្បត្តិជាយថាហេតុ៕