រាជធានីអាប៊ូឌាប៊ី៖ អាជ្ញាធរអារ៉ាប់អេមីរ៉េត ឬអារ៉ាប់រួម បានឃាត់ខ្លួនជនជាតិកូរ៉េខាងត្បូង៣នាក់ ជាប់ពាក់ព័ន្ធនឹងការបង្កើតវេបសាយល្បែងស៊ីសងដោយខុសច្បាប់ មានទំហំទឹកប្រាក់រហូតដល់៣,១ពាន់ពាន់លានវ៉ុន (លុយកូរ៉េ) ឬស្មើប្រមាណ២,៣ពាន់លានដុល្លារអាម៉េរិក ដោយពួកគេធ្វើប្រតិបត្ដិការប្រមូលលុយទាំងនោះពីបណ្ដាញផ្សេងៗ នៅក្នុងប្រទេសជាច្រើន...។
សារព័ត៌មាន Korea JoongAng Daily បានរាយការណ៍នៅព្រឹកថ្ងៃសុក្រទី១៦ ខែតុលានេះថា អាជ្ញាធរកូរ៉េខាងត្បូង បានចរចាជាមួយប្រទេសអារ៉ាប់រួម (UAE) អំពីការបញ្ជូនខ្លួនបុគ្គលដែលត្រូវបានចោទប្រកាន់ថា ជាមេខ្លោងនៃបក្ខពួកល្បែងស៊ីសងទាំងនេះ ត្រឡប់មកវិញ។ ជនជាតិកូរ៉េចំនួន២នាក់ នៅក្នុងចំណោមបក្ខពួកទាំង៣នាក់ ត្រូវបានចោទប្រកាន់ថា ជាមេគំនិត និងម្នាក់ទៀត ជាអ្នកអភិវឌ្ឍកម្មវិធីកុំព្យូទ័រ ត្រូវបានបញ្ជូនត្រឡប់មកប្រទេសវិញ តាមអាកាសយានដ្ឋានអន្តរជាតិអ៊ីនឆ័ន (Incheon) កាលពីថ្ងៃទី១៤ ខែតុលា។ ជាមួយគ្នា ប្រធានាធិបតីកូរ៉េខាងត្បូង លោក លី ចេម្យុង (Lee Jae Myung) បានថ្លែងអំណរគុណដល់ព្រះអង្គម្ចាស់ ស៊ីគហ៍ មហាមេធ ប៊ីន ហ្សាយីដ អាល់ ណាហ៍យ៉ាន (Sheikh Mohamed bin Zayed Al Nahyan) មេដឹកនាំអារ៉ាប់រួម ចំពោះកិច្ចសហប្រតិបត្ដិការនេះ។
ក្រុមការងារអន្តរស្ថាប័នរបស់រដ្ឋាភិបាល ទទួលបន្ទុកលើឧក្រិដ្ឋកម្មឆ្លងដែន បានឱ្យដឹងថា មេខ្លោង និងជំនួយការម្នាក់ ត្រូវបានចោទប្រកាន់ បានរត់គេចខ្លួន ចេញពីប្រទេសកូរ៉េខាងត្បូង កាលពីអំឡុងឆ្នាំ២០១៦ ហើយបានបើកដំណើរការគេហទំព័រល្បែងស៊ីសងមួយចំនួន ដែលមានទឹកប្រាក់ភ្នាល់សរុប ២,៦ពាន់ពាន់លានវ៉ុន ឬស្មើប្រមាណ១,៩ពាន់លានដុល្លារអាម៉េរិក ដោយមានបណ្ដាញមកពីបណ្តាប្រទេសនានា រួមទាំងប្រទេសហ្វីលីពីន និងម៉ាឡេស៊ីផងដែរ។ អ្នកអភិវឌ្ឍកម្មវិធីម្នាក់ ត្រូវបានសង្ស័យថា បានបង្កើតកម្មវិធី សម្រាប់បណ្តាញល្បែងស៊ីសងដោយខុសច្បាប់មួយផ្សេងទៀត ដោយបានចាត់ចែងទឹកប្រាក់ភ្នាល់ប្រហែល៥០០ពាន់លានវ៉ុន ឬស្មើប្រមាណ៣៧២លានដុល្លារអាម៉េរិក តាមរយៈគេហទំព័រខុសច្បាប់ចំនួន៥។ មេខ្លោងនៃបណ្តាញនេះ បានបញ្ជូនចេញពីប្រទេសអារ៉ាប់រួម ត្រឡប់ទៅកាន់ប្រទេសកូរ៉េខាងត្បូងវិញ កាលពីខែកក្កដាកន្លងទៅ។
ក្រុមការងារពិសេសមួយ មានការចូលរួមពីទីភ្នាក់ងារនគរបាលជាតិ និងទីភ្នាក់ងារស៊ើបការណ៍សម្ងាត់ជាតិ បានតាមដានជនសង្ស័យរហូតដល់ប្រទេសអារ៉ាប់រួម ហើយបានអនុវត្តប្រតិបត្តិការចាប់ខ្លួន ដោយកិច្ចសហការជាមួយអាជ្ញាធរមូលដ្ឋាន ក្រោមប្រតិបត្តិការឈ្មោះហាឡាក(Halak) ដែលជាពាក្យអារ៉ាប់ មានន័យថា «ការបំផ្លិចបំផ្លាញ»។ ក្រុមការងារពិសេស បានឱ្យដឹងបន្តថា ក្នុងអំឡុងពេលគេចខ្លួននោះ ជនសង្ស័យទាំងនេះ បានរស់នៅយ៉ាងហ៊ឺហា ដោយបានអញ្ជើញជនជាតិកូរ៉េខាងត្បូងល្បីៗមួយចំនួន ឱ្យទៅលេង និងបានដើរកម្សាន្តនៅតាមទីកន្លែងកម្សាន្តលំដាប់ខ្ពស់ ជាញឹកញាប់ ថែមទៀតផងរ៕
