រដ្ឋធានីវ៉ាស៊ីនតោន៖ គ្រាប់បែកយក្ស ដែលមានកម្លាំងបំផ្ទុះដល់ទៅ១១តោនតេអ៊ិនតេ កំពុងក្លាយជាប្រធានបទក្ដៅមួយ ដែលមានទាំងការរិះគន់ និងការគាំទ្រពីសម្ព័ន្ធមិត្តបងធំសហរដ្ឋអាម៉េរិក ជុំវិញការគំរាមទម្លាក់គ្រាប់បែកយក្សនេះ លើប្រទេសអ៊ីរ៉ង់។ ចុះថា តើលោកអ្នកមានដឹងទេ គ្រាប់បែកយក្ស ទម្លាក់ពីលើអាកាស ប្រភេទ GBU-43/B នេះ មានឥទ្ធិពលនៃការកម្ទេចរបស់វា កម្រិតណា..? ថ្ងៃនេះ SBM News នឹងធ្វើបទបង្ហាញអំពីភាពសាហាវរបស់គ្រាប់បែកយក្សមួយប្រភេទនេះ...។
ស្របពេលស្ថានការណ៍នៅតំបន់មជ្ឈិមបូព៌ាបន្ដឡើងកម្ដៅ ដោយរដ្ឋាភិបាលយេម៉ែន ក្រោមកិច្ចខិតខំប្រឹងប្រែង និងការជួយជ្រោមជ្រែងពីសម្ព័ន្ធមិត្តអារ៉ាប់ បាននិងកំពុងបង្កើនការវាយប្រហារទៅលើក្រុមឧទ្ទាមហ៊ូទី ដែលគាំទ្រដោយរដ្ឋាភិបាលតេហេរ៉ង់នោះ ពេលនេះ កងទ័ពសហរដ្ឋអាម៉េរិក បានរៀបចំផែនការវាយប្រហារលើប្រទេសអ៊ីរ៉ង់សាជាថ្មី ជាមួយនឹងការទម្លាក់គ្រាប់បែកយក្ស ដែលមានទម្ងន់ជិត១០តោនក្នុងមួយគ្រាប់ ប្រសិនបើលោកប្រធានាធិបតី ដូណាល់ ត្រាំ ចេញបញ្ជាឱ្យមានប្រតិបត្ដិការយោធាវាយប្រហារជាថ្មី។ បណ្ដាញទូរទស្សន៍ CNN បានរាយការណ៍កាលពីថ្ងៃព្រហស្បតិ៍ទី១៥តុលា ដោយដកស្រង់ប្រភពដែលដឹងពីកិច្ចការយោធារបស់រដ្ឋាភិបាលរដ្ឋធានីវ៉ាស៊ីនតោន ថា កងទ័ពសហរដ្ឋអាម៉េរិក បានរៀបចំផែនការវាយប្រហារ ដោយរាប់បញ្ចូលទាំងគ្រាប់បែកយក្ស ទម្លាក់ពីលើអាកាស ប្រភេទ GBU-43/B (ដែលគេស្គាល់ថា ជា«ម៉ែគ្រាប់បែកលើគ្រាប់បែកទាំងអស់» សម្រាប់ប្រឆាំងនឹងហេដ្ឋារចនាសម្ព័ន្ធថាមពល និងទីតាំងនុយក្លេអ៊ែររបស់អ៊ីរ៉ង់។
គ្រាប់បែកយក្សដ៏ធំសម្បើម ប្រភេទ GBU-43/B នឹងក្លាយជាអាវុធមិនមែននុយក្លេអ៊ែរ មានកម្លាំងបំផ្ទុះទម្លាក់ពីលើអាកាសដ៏ខ្លាំងក្លាបំផុត និងជាគ្រាប់បែកធំបំផុតនៅក្នុងចំណោមគ្រាប់បែកទាំងអស់ របស់កងទ័ពសហរដ្ឋអាម៉េរិក។ គ្រាប់បែកយក្សនេះ បានបំពាក់ដោយប្រព័ន្ធនាំផ្លូវ GPS ពីផ្កាយរណប មានទម្ងន់រហូតដល់ទៅ៩,៨តោន និងមានកម្លាំងបំផ្ទុះដល់ទៅ១១តោននៃកម្លាំងម្សៅTNT។ គ្រាប់បែកយក្ស GBU-43/B មានប្រវែង៩,១៤ម៉ែត្រ និងមានអង្កត់ផ្ចិតប្រវែង១០២,៨៧សង់ទីម៉ែត្រ។ កងទ័ពសហរដ្ឋអាម៉េរិក តែងប្រើប្រាស់យន្ដហោះយោធាជាច្រើនប្រភេទ ដើម្បីទម្លាក់គ្រាប់បែកយក្ស មិនមែននុយក្លេអ៊ែរនេះ រួមមាន៖ C-130 ឬ C-17 និង MC-130 ជាដើម។ សហរដ្ឋអាម៉េរិក ក៏ធ្លាប់ទម្លាក់គ្រាប់បែកយក្សប្រភេទនេះ នៅក្នុងប្រទេសអាហ្គានីស្ថាន កាលពីឆ្នាំ២០១៧ ដែលកាលនោះ កំណត់គោលដៅលើក្រុមភេរវកម្ម ISIS ខណៈវិសាលភាពនៃការកម្ទេចរបស់វា មានកម្លាំងដ៏ធំមហិមាបំផុត៕
