រាជធានីបាងកក៖ ក្រុមបាតុករប្រមាណ៧០០នាក់ បានជួបជុំគ្នាតវ៉ាយ៉ាងក្ដៅគគុកនៅថ្ងៃព្រហស្បតិ៍ទី១៥ ខែតុលា ឆ្នាំ២០២៦នេះ ប្រឆាំងនឹងការរៀបចំជំនួបកំពូលរបស់ធនាគារពិភពលោក (World Bank) និងមូលនិធិរូបិយវត្ថុអន្តរជាតិ (IMF) ដែលកំពុងប្រព្រឹត្តទៅនៅក្នុងរាជធានីបាងកក...។

ក្រុមបាតុករដែលហៅខ្លួនឯងថា «បណ្តាញប្រជាជនប្រឆាំងធនាគារពិភពលោក និង IMF» បានដើរក្បួនតម្រង់ទៅកាន់មជ្ឈមណ្ឌលសន្និសីទ ដែលជាកន្លែងរៀបចំជំនួប។ តំណាងក្រុមបាតុករបានថ្លែងថា ជំនួបកំពូលនេះ បង្កហានិភ័យធ្ងន់ធ្ងរដល់សាធារណជន ដោយសារការបង្កើតបំណុលបន្ថែម និងការបណ្តាក់ទុនបរទេសដែលបំផ្លាញជីវភាពសហគមន៍មូលដ្ឋាន។ នៅក្នុងសេចក្តីថ្លែងការណ៍របស់ក្រុមបាតុករ បានគូសបញ្ជាក់យ៉ាងមុតស្រួចថា៖«យើងនឹងមិនប្រគល់ដីធ្លីរបស់ប្រជាជនយើង សូម្បីតែមួយចំអាម ទៅឱ្យពួកអាណានិគមបៃតងនោះឡើយ»។

ការជួបជុំគ្នានេះ បានបង្កើតឱ្យមានការប៉ះទង្គិចដោយភាពតានតឹងមួយប្រាវ រវាងក្រុមបាតុករ និងនគរបាលតម្រួត នៅពេលដែលអាជ្ញាធរព្យាយាមបិទផ្លូវ មិនឱ្យពួកគេហែក្បួនទៅជិតមជ្ឈមណ្ឌលសន្និបាត។ ស្នងការដ្ឋានតម្រួតរាជធានីបាងកក បានប្រកាសដាក់បម្រាមលើការប្រមូលផ្តុំ និងសកម្មភាពតវ៉ានៅជុំវិញតំបន់សំខាន់ៗ ចាប់ពីថ្ងៃទី១០ ដល់ថ្ងៃទី២០ ខែតុលា ឆ្នាំ២០២៦។ គួររម្លឹកផងដែរថា កិច្ចប្រជុំកំពូល IMF និងធនាគារពិភពលោក នៅរាជធានីបាងកកនេះ បានទាក់ទាញអ្នកចូលរួមជាង១ម៉ឺននាក់ មកពីជាង១៩០ប្រទេស រួមទាំងរដ្ឋមន្ត្រី និងទេសាភិបាលធនាគារកណ្តាលផងដែរ។

ដើមឫសនៃកំហឹង និងការប្រឆាំងរបស់ប្រជាជនថៃ ចំពោះ IMF និងធនាគារពិភពលោក គឺមានប្រភពចេញពីវិបត្តិហិរញ្ញវត្ថុអាស៊ី ឆ្នាំ១៩៩៧។ កាលណោះ ថៃត្រូវបានបង្ខំឱ្យទទួលយកកញ្ចប់សង្គ្រោះបំណុល និងលក្ខខណ្ឌដ៏តឹងរ៉ឹងពី IMF រួមមាន ការកាត់បន្ថយការចំណាយសាធារណៈ ការដំឡើងពន្ធ និងការលក់ទ្រព្យសម្បត្តិរដ្ឋ។ គោលនយោបាយកាត់បន្ថយការចំណាយនេះ បានធ្វើឱ្យប្រជាជនថៃរាប់លាននាក់ ធ្លាក់ចូលក្នុងភាពក្រីក្រ បាត់បង់ការងារ និងបាត់បង់ដីធ្លី ដែលបង្កជាស្នាមរបួសសេដ្ឋកិច្ច និងការប្រឆាំងនឹងស្ថាប័នហិរញ្ញវត្ថុអន្តរជាតិនេះ រហូតមកដល់បច្ចុប្បន្ន៕