រាជធានីភ្នំពេញ៖ ជំនន់ទឹកភ្លៀងដែលបានធ្លាក់ចុះមកយ៉ាងគំហុក និងជាប់ៗគ្នានាពេលថ្មីៗនេះ បានបណ្ដាលឱ្យផ្លូវបេតុងមួយខ្សែស្ថិតនៅក្នុងសង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ បានបាក់ស្រុតចូលទៅក្នុងទន្លេមេគង្គ ដោយសារកម្លាំងទឹក និងដីគ្រឹះក្រោមទន់ជ្រាយ...។

តាមប្រភពព័ត៌មានពីប្រជាពលរដ្ឋរស់នៅក្នុងតំបន់នោះ បានឱ្យដឹងនៅថ្ងៃទី១៥ ខែតុលា ឆ្នាំ២០២៦ នេះថា មុនពេលកើតហេតុ មានភ្លៀងធ្លាក់ជាប់ៗគ្នាជាច្រើនថ្ងៃ ធ្វើឱ្យកម្រិតទឹកទន្លេមានការប្រែប្រួល និងហូរគាស់ជើងគ្រឹះដីខាងក្រោម។ រហូតដល់ថ្ងៃកើតហេតុ ដីមាត់ទន្លេបានចាប់ផ្តើមស្រុត និងទាញយកបេតុងផ្លូវ បាក់ធ្លាក់ចូលទៅក្នុងទឹកតែម្ដង បង្កការភ្ញាក់ផ្អើល និងព្រួយបារម្ភជាខ្លាំងដល់អ្នកធ្វើដំណើរ និងប្រជាពលរដ្ឋមានលំនៅឋានជិតនោះ។

ដើម្បីពិនិត្យស្ថានភាពជាក់ស្តែង ព្រមទាំងដាក់បារ៉ាស និងសញ្ញាសម្គាល់គ្រោះថ្នាក់ អាជ្ញាធរបានហាមឃាត់មិនឱ្យប្រជាពលរដ្ឋ ឬយានយន្តឆ្លងកាត់តំបន់បាក់ស្រុតនោះ ឡើយ ជៀសវាងជួបគ្រោះថ្នាក់ជាយថាហេតុ។ ទន្ទឹមគ្នា អាជ្ញាធរ ក៏បានអំពាវនាវដល់ប្រជាពលរដ្ឋដែលរស់នៅតាមបណ្តោយមាត់ទន្លេ សូមមានការប្រុងប្រយ័ត្នខ្ពស់ ចំពោះបាតុភូតបាក់ច្រាំងទន្លេ ឬបាក់ស្រុតដីនៅរដូវភ្លៀងធ្លាក់នេះ ហើយក្រុមការងារជំនាញកំពុងសិក្សា និងរៀបចំផែនការអន្តរាគមន៍ ដើម្បីជួសជុល និងទប់ស្កាត់ការបាក់ស្រុតបន្ថែមទៀតឱ្យបានឆាប់រហ័ស៕