រដ្ឋធានីប៉េកាំង៖ ក្រសួងការពារជាតិចិន ​បានប្រកាសនៅព្រឹកថ្ងៃពុធទី១៤តុលានេះថា កងទ័ពជើងទឹករំដោះប្រជាជនចិន បានបញ្ជូនកងនាវាផ្ទុក​យន្តហោះចម្បាំង ​Liaoning (លាវនីង) ទៅធ្វើសមយុទ្ធយោធារួមគ្នា នៅតំបន់ប៉ាស៊ីហ្វិកខាងលិច ខណៈ​​ប្រទេសជប៉ុន កំពុង​តាមដានយ៉ាងដិតដល់ ចំពោះ​សមយុទ្ធយោធារបស់រដ្ឋធានីប៉េកាំង​ នៅទីនោះ ជាទីដែល​កងកម្លាំងរបស់ប្រទេសទាំង២ តែងតែប្រឈមមុខដាក់គ្នាជាញឹកញាប់។

សារព័ត៌មាន The Japan Times បានចេញផ្សាយ កាលពីរសៀលថ្ងៃពុធទី១៤ ខែតុលានេះថា នៅក្នុងសេចក្តីថ្លែងការណ៍ខ្លីមួយ ក្រសួងការពារជាតិចិន បានបញ្ជាក់ថា សមយុទ្ធនេះ«រៀបចំឡើងស្របតាមផែនការហ្វឹកហ្វឺនជាប្រចាំប្រចាំឆ្នាំ ដោយមានគោលបំណងសាកល្បង និងកែលម្អកម្រិតនៃការហ្វឹកហ្វឺនជាក់ស្តែងរបស់កងនាវាផ្ទុកយន្ដហោះ ក៏ដូចជាបន្តពង្រឹងសមត្ថភាព នៅក្នុងការអនុវត្តបេសកកម្មនានាផងដែរ»។​ សមយុទ្ធយោធានេះ​ គឺ«ស្របតាមច្បាប់ និងការអនុវត្តតាមច្បាប់អន្តរជាតិពាក់ព័ន្ធ ហើយមិនមែនធ្វើឡើង ដើម្បីតម្រង់គោលដៅទៅលើប្រទេសណាមួយជាក់លាក់នោះដែរ»។ ថ្វីបើ​សេចក្តីថ្លែងការណ៍នោះ មិនបានផ្តល់ព័ត៌មានលម្អិតយ៉ាងណាក៏ដោយ ប៉ុន្តែនៅក្នុងរយៈពេលប៉ុន្មានឆ្នាំកន្លងទៅថ្មីៗនេះ កងទ័ពជើងទឹករំដោះប្រជាជនចិន បានបញ្ជូនកងកម្លាំងរបស់ខ្លួន ចូលជ្រៅទៅកាន់តំបន់ប៉ាស៊ីហ្វិកខាងលិច ​ធ្វើ​ឱ្យរដ្ឋាភិបាលរាជធានីតូក្យូ ​មានការព្រួយបារម្ភយ៉ាងខ្លាំង។

ចិនធ្វើប្រតិបត្តិការ​នៅក្នុងតំបន់នោះ ត្រូវបានក្រុមមន្រ្ដីក្រសួងការពារជាតិជប៉ុន ចាត់ទុកថា វាជាចំណុច​​ខ្សោយផ្នែកយុទ្ធសាស្ត្រ​ អាចប្រឈមមុខដាក់គ្នា។ ការកើនឡើង នៃសមយុទ្ធជាញឹកញាប់​ នៅតំបន់ប៉ាស៊ីហ្វិកខាងលិច បាននាំឱ្យមានការប្រឈមមុខដាក់គ្នា កាន់តែខិតចូលមកជិត​​ រវាងកងទ័ពរំដោះប្រជាជនចិន និងកងកម្លាំងស្វ័យការពារជប៉ុន (Self-Defense Forces)។ រីឯ​ហេតុការណ៍ចុងក្រោយបំផុត បានកើតឡើង កាលពីខែមិថុនាកន្លងទៅនេះ។ ប៉ុន្ដែ​ការប្រឈមមុខគ្នា នាពេលនោះ រដ្ឋធានីប៉េកាំង បានចោទប្រកាន់ដល់រាជធានីតូក្យូ អំពីការ​ធ្វើសកម្មភាពឈ្លបយកការណ៍ នៅក្នុងរយៈចម្ងាយដ៏ជិត ប្រកបដោយ«គ្រោះថ្នាក់» និងការ«យាយីបង្កហេតុ» នៅអំឡុងពេល​កងនាវាចម្បាំង​ ដឹកនាំដោយនាវាផ្ទុកយន្តហោះ Liaoning កំពុងធ្វើ «សមយុទ្ធប្រយុទ្ធនៅលើដែនសមុទ្ទដ៏ឆ្ងាយ» ដែលមានរយៈពេលជាង៤០ថ្ងៃ។

ទោះជាយ៉ាងណាក៏ដោយ ការិយាល័យសេនាធិការចម្រុះ នៃក្រសួងការពារជាតិជប៉ុន បានបដិសេធការចោទប្រកាន់ទាំងនោះ ដោយសន្យាថា ខ្លួននឹង​«បន្តរក្សាជំហរស្ងប់ស្ងាត់ និងម៉ឺងម៉ាត់ ដោយផ្តល់អាទិភាពខ្ពស់បំផុតដល់សុវត្ថិភាព ព្រមទាំងបន្តអនុវត្តការឃ្លាំមើល និងតាមដាន នៅក្នុងដែនទឹក និងដែនអាកាស នៅជុំវិញប្រទេសជប៉ុន ប្រកបដោយក្រមសីលធម៌ វិជ្ជាជីវៈ និងការយកចិត្តទុកដាក់ខ្ពស់»។ កាលពីខែធ្នូឆ្នាំ២០២៥ យន្តហោះចម្បាំងដែល​បានហោះចេញពីនាវាផ្ទុកយន្តហោះ Liaoning បានប្រើប្រាស់រ៉ាដា ដើម្បីកំណត់គោលដៅ ​ទៅលើយន្តហោះរបស់កងកម្លាំងស្វ័យការពារដែនអាកាសជប៉ុន ចំនួនពីរលើក នៅលើដែនទឹកអន្តរជាតិ នាភាគអាគ្នេយ៍ នៃខេត្តអូគីណាវ៉ា (​Okinawa)។ ​កាលពីរដូវក្ដៅ​ឆ្នាំមុន ចិន​ក៏បានបញ្ជូននាវាផ្ទុកយន្ដហោះ Liaoning និងនាវាផ្ទុកយន្តហោះមួយគ្រឿងទៀតរបស់ខ្លួន ចូលទៅក្នុងតំបន់ប៉ាស៊ីហ្វិកខាងលិច និងបានបញ្ជូនយន្តហោះចម្បាំង ទៅក្បែរយន្តហោះជប៉ុនជាច្រើនលើកផងដែរ។

សកម្មភាពទាំងនេះ ត្រូវបានរាជធានីតូក្យូ អះអាងថា អាចបង្កហានិភ័យ ចំពោះ​​ការប៉ះទង្គិចគ្នា។ ទោះជាយ៉ាងណាក៏ដោយ រាជធានីតូក្យូ បានអនុវត្តយុទ្ធសាស្ត្រប្រុងប្រយ័ត្ន ប៉ុន្តែម៉ឺងម៉ាត់ ដើម្បីចៀស​វាងការកើនឡើងនូវ​ភាពតានតឹង ជាមួយរដ្ឋធានីប៉េកាំង បន្ទាប់ពីទំនាក់ទំនង រវាងប្រទេសទាំង២ បានធ្លាក់ចុះដល់កម្រិតទាបបំផុត នៅក្នុងរយៈពេលជាច្រើនទសវត្សរ៍កន្លងមកនេះ ពោលគឺក្រោយពេលនាយករដ្ឋមន្រ្ដីជប៉ុន លោកស្រី សាណាអេ តាកៃឈី Sanae Takaichi លើកឡើងកាលពីខែវិច្ឆិកា ឆ្នាំ២០២៥ ​ថា ជប៉ុន អាចនឹងធ្វើអន្តរាគមន៍​យោធា នៅក្នុងករណីមានវិបត្តិនៅកោះតៃវ៉ាន់...៕​