ទីក្រុងតៃប៉ិ៖ ក្រសួងកិច្ចការសេដ្ឋកិច្ចកោះតៃវ៉ាន់ បានប្រកាសនៅថ្ងៃពុធទី១៤ ខែតុលានេះថា កោះតៃវ៉ាន់ មានផែនការទិញឧស្ម័នធម្មជាតិរាវ (LNG) ចំនួន៦លានតោនក្នុងមួយឆ្នាំ ពីគម្រោងមួយនៅរដ្ឋអាឡាស្កា (Alaska) និងបោះទុនវិនិយោគ ជាមួយទំហំទឹកប្រាក់រហូតដល់១៤១,៥ពាន់លានដុល្លារតៃវ៉ាន់ ឬស្មើប្រមាណ៤,៤ពាន់លានដុល្លារអាម៉េរិក សម្រាប់ការអភិវឌ្ឍគម្រោងនេះ...។
ក្រសួងកិច្ចការសេដ្ឋកិច្ចនៃកោះតៃវ៉ាន់ បានបញ្ជាក់នៅក្នុងសេចក្តីថ្លែងការណ៍មួយថា ក្រុមហ៊ុន CPC Corp. ដែលជាក្រុមហ៊ុនរដ្ឋ បានសម្រេចវឌ្ឍនភាពគួរឱ្យកត់សម្គាល់ នៅក្នុងការចរចាជាមួយក្រុមហ៊ុនអភិវឌ្ឍន៍របស់សហរដ្ឋអាម៉េរិក ក្រោយពីការពិភាក្សា អស់រយៈពេលជិត១៨ខែកន្លងមក។ កិច្ចព្រមព្រៀងដែលបានស្នើឡើងនេះ នឹងជួយធ្វើពិពិធកម្មលើប្រភពផ្គត់ផ្គង់ឧស្ម័នធម្មជាតិរាវរបស់តៃវ៉ាន់ បង្កើនភាពបត់បែន នៅក្នុងការដឹកជញ្ជូន និងពង្រឹងសន្តិសុខថាមពល ព្រមទាំងពង្រឹងកិច្ចសហប្រតិបត្តិការ រវាងសហរដ្ឋអាម៉េរិក និងកោះតៃវ៉ាន់ផងដែរ។ ទីភ្នាក់ងារសារព័ត៌មានអង់គ្លេស Reuters បានរាយការណ៍ថា លោកប្រធានាធិបតីសហរដ្ឋអាម៉េរិក ដូណាល់ ត្រាំ បានបញ្ជាក់ នៅក្នុងការជួបជុំមួយ នៅរដ្ឋអាឡាស្កា កាលពីថ្ងៃអង្គារទី១៣តុលាថា កោះតៃវ៉ាន់ បានយល់ព្រមទិញឧស្ម័នធម្មជាតិចំនួន៣០ភាគរយ ចេញពីគម្រោងបំពង់បង្ហូរឧស្ម័នធម្មជាតិរាវ (LNG) នៅរដ្ឋអាឡាស្កា។ កិច្ចព្រមព្រៀងនេះ នឹងគ្របដណ្ដប់លើការទិញ ក្នុងរយៈពេល២០ឆ្នាំ។
ក្រុមហ៊ុន CPC បានចុះហត្ថលេខាលើលិខិតបង្ហាញពីបំណង (letter of intent) ដោយគ្របដណ្ដប់លើការទិញឧស្ម័ន LNG និងការវិនិយោគនៅក្នុងគម្រោងនៃរដ្ឋអាឡាស្កានេះ នៅទីក្រុងតៃប៉ិ កាលពីខែមីនា ឆ្នាំ២០២៥។ ការរៀបចំជាក់លាក់ នៃការវិនិយោគ ភាគហ៊ុននៃភាពជាម្ចាស់ និងលក្ខខណ្ឌផ្សេងៗទៀត នៅតែត្រូវឆ្លងកាត់ការចរចាបន្ថែម និងនីតិវិធីនៃការអនុម័តរបស់ក្រុមហ៊ុន។ ក្រសួងកិច្ចការសេដ្ឋកិច្ចកោះតៃវ៉ាន់ បានលើកឡើងថា គម្រោងនេះ អាចជួយធ្វើពិពិធកម្មផ្លូវដឹកជញ្ជូន LNG របស់កោះតៃវ៉ាន់ ដោយការដឹកជញ្ជូន អាចមកដល់ដែនកោះនេះដោយផ្ទាល់ ឆ្លងកាត់មហាសមុទ្ទប៉ាស៊ីហ្វិក ដែលនឹងជួយកាត់បន្ថយហានិភ័យនៃការផ្គត់ផ្គង់ បណ្ដាលមកពីបញ្ហាភូមិសាស្ត្រនយោបាយ។ ប្រសិនបើការអភិវឌ្ឍដំណើរការទៅតាមកាលវិភាគ ការផ្គត់ផ្គង់អាចនឹងចាប់ផ្តើមមកដល់កោះតៃវ៉ាន់ នៅដើមឆ្នាំ២០៣២។
ក្រុមហ៊ុន CPC នឹងបន្តសម្របសម្រួល ជាមួយភាគីសហរដ្ឋអាម៉េរិក ដើម្បីវាយតម្លៃគម្រោង និងស្វែងរកការអនុម័តថវិកា។ ក្រសួងកិច្ចការសេដ្ឋកិច្ចនៃកោះតៃវ៉ាន់ បានបញ្ជាក់ថា ខ្លួននឹងបន្តតាមដានទីផ្សារឧស្ម័នធម្មជាតិសកល និងពិនិត្យមើលការព្យាករ តម្រូវការក្នុងស្រុក ដើម្បីជួយធានាឱ្យមានការផ្គត់ផ្គង់ថាមពល ប្រកបដោយស្ថិរភាព៕
