រដ្ឋធានីប៉េកាំង៖ អ្នកនាំពាក្យក្រសួងការបរទេសចិន លោកស្រី ម៉ៅ នីង (Mao Ning) បានថ្លែងនៅក្នុងសន្និសីទសារព័ត៌មានកាលពីថ្ងៃទី១២ ខែតុលា ឆ្នាំ២០២៦ថា ប្រទេសជប៉ុនត្រូវតែទទួលខុសត្រូវទាំងស្រុង ចំពោះការធ្លាក់ចុះ និងភាពតានតឹងនៃទំនាក់ទំនងរវាងប្រទេសទាំងពីរ ដោយបានជំរុញឱ្យមេដឹកនាំជប៉ុនបច្ចុប្បន្ន កែប្រែកំហុសឆ្គងជាប្រវត្តិសាស្ត្រ និងជំហរលើបញ្ហាកោះតៃវ៉ាន់។  

ប្រតិកម្មយ៉ាងរ៉ឹងប៉ឹងរបស់រដ្ឋធានីប៉េកាំង ធ្វើឡើងបន្ទាប់ពីអតីតរដ្ឋមន្ត្រីការបរទេសជប៉ុន លោក តាកេស៊ី អ៊ីវ៉ាយ៉ា (Takeshi Iwaya) បានលើកឡើងក្រោយទស្សនកិច្ចនៅចិនថា ជប៉ុនគឺជាអ្នកទទួលខុសត្រូវចំពោះការខូចខាតទំនាក់ទំនងទ្វេភាគី ហើយរដ្ឋាភិបាលជប៉ុនគួរតែស្វែងរកផ្លូវកែលម្អទំនាក់ទំនងឡើងវិញ។ លោកស្រី ម៉ៅ នីង បានស្វាគមន៍សម្តីនេះដោយសង្កត់ធ្ងន់ថា នេះជា «មនសិកា និងភាពត្រឹមត្រូវ» របស់បុគ្គលជប៉ុនដែលមានការយល់ដឹងជ្រៅជ្រះ។ អ្នកនាំពាក្យរូបនេះ បានបន្ថែមថា ឫសគល់នៃវិបត្តិទំនាក់ទំនងទ្វេភាគី បណ្ដាលមកពី «ការបង្ខូចការពិត និងកំហុសឆ្គងធ្ងន់ធ្ងរនៃទស្សនៈប្រវត្តិសាស្ត្រ» របស់មេដឹកនាំជប៉ុនចំពោះប្រទេសចិន ដែលបានបំផ្លាញគ្រឹះនយោបាយនៃប្រទេសទាំងពីរយ៉ាងធ្ងន់ធ្ងរ។ 

លោកស្រី បានសង្កត់ធ្ងន់ថា ស្ថានភាពបច្ចុប្បន្នមិនផ្តល់ផលប្រយោជន៍ឱ្យភាគីណាមួយឡើយ ហើយភារកិច្ចក្នុងការទាញទំនាក់ទំនងមកលើមាគ៌ាត្រឹមត្រូវវិញ គឺស្ថិតនៅលើជប៉ុនទាំងស្រុង។ លើសពីនេះ ចិនបានអំពាវនាវឱ្យមេដឹកនាំជប៉ុន ស្ដាប់សំឡេងនៅក្នុងប្រទេសខ្លួន គោរពតាមឯកសារនយោបាយទាំង៤ រវាងចិន-ជប៉ុន ព្រមទាំងពិចារណា និងកែប្រែកំហុសឆ្គងលើបញ្ហាប្រវត្តិសាស្ត្រ ដែនកោះតៃវ៉ាន់ និងការយល់ឃើញមកលើប្រទេសចិនដោយស្មោះត្រង់៕