រាជធានីភ្នំពេញ៖ កម្លាំងសមត្ថកិច្ច បានបើកប្រតិបត្តិការស្រាវជ្រាវ និងឈានទៅដល់ការឃាត់ខ្លួនជនសង្ស័យមួយក្រុម រួមមាន ចាងហ្វាងកាសែតម្នាក់ និងបក្ខពួក បន្ទាប់ពីបានធ្វើសកម្មភាពគាស់ផ្ទះប្រជាពលរដ្ឋ ហើយចូលលួចយកយកម៉ូតូអស់ចំនួន៤គ្រឿង ក្នុងភូមិសាស្ត្រខណ្ឌទួលគោក រាជធានីភ្នំពេញ​...។

យោងតាមរបាយការណ៍ពីអធិការដ្ឋាននគរបាលខណ្ឌទួលគោក នារសៀលថ្ងៃទី១៣ ខែតុលា​ ឆ្នាំ២០២៦ បានឱ្យដឹងថា​ ប្រតិបត្តិការបង្ក្រាបនេះ បានធ្វើឡើងបន្ទាប់ពីទទួលបានបណ្តឹងពីប្រជាពលរដ្ឋរងគ្រោះ អំពីករណីចោរគាស់ផ្ទះលួចទ្រព្យសម្បត្តិ។ ភ្លាមៗនោះ កម្លាំងជំនាញបានចុះត្រួតពិនិត្យទីតាំងកើតហេតុ ពិនិត្យកាមេរ៉ាសុវត្ថិភាព និងស្រាវជ្រាវតាមនីតិវិធីជំនាញ រហូតឈានទៅកំណត់មុខសញ្ញា និងស្ទាក់ចាប់ខ្លួនក្រុមជនសង្ស័យបានជាបន្តបន្ទាប់។ 

ជាលទ្ធផលសមត្ថកិច្ចបានឃាត់ខ្លួនជនសង្ស័យសរុប៥នាក់ ហើយក្នុងនោះ មានម្នាក់ឈ្មោះ ឆៃ សុចិត្ត អាយុ៣៦ឆ្នាំ ជាចាងហ្វាងកាសែតនៃអង្គភាពមួយ ព្រមទាំងដកហូតកាំភ្លើងខ្លីចំនួន១ដើម ម៉ាក K54 ម្សៅម៉ដ្ឋពណ៌សចំនួន១កញ្ចប់តូច (សង្ស័យជាគ្រឿងញៀន) មធ្យោបាយធ្វើដំណើរ រួមទាំងសម្ភារមួយចំនួនទៀត។ បច្ចុប្បន្ន ជនសង្ស័យ រួមទាំងវត្ថុតាង ត្រូវបានកម្លាំងសមត្ថកិច្ចកសាងសំណុំរឿង បញ្ជូនទៅកាន់សាលាដំបូង ដើម្បីចាត់ការទៅតាមនីតិវិធីច្បាប់៕