រដ្ឋធានីប៉ារីស៖ ប្រធានាធិបតីបារាំង លោក អេមម៉ានុយអែល ម៉ាក្រុង (Emmanuel Macron) បានប្រកាស កាលពីថ្ងៃចន្ទថា កងទ័ពជើងទឹកបារាំង បានស្ទាក់ចាប់ និងឡើងលើកប៉ាល់ដឹកប្រេងមួយគ្រឿង ដែលបានសង្ស័យថា ពាក់ព័ន្ធនឹងសកម្មភាពជួញដូរប្រេងឥន្ធនៈ ដោយខុសច្បាប់។
សារព័ត៌មាន Africa News បានផ្សាយ កាលពីព្រឹក ថ្ងៃអង្គារ ទី១៣ ខែតុលាថា បើតាមលោកប្រធានាធិបតី ម៉ាក្រុង បានឲ្យដឹងថា ប្រតិបត្តិការនេះ បានធ្វើឡើង នៅចម្ងាយប្រហែល៨៣៣គីឡូម៉ែត្រ នាភាគខាងត្បូង នៃកោះរេអ៊ុយនីញ៉ុង (Réunion) ស្ថិតក្នុងមហាសមុទ្រឥណ្ឌា។ ទន្ទឹមគ្នានេះដែរ លោកប្រធានាធិបតី បានសរសេរនៅលើបណ្តាញសង្គមថា៖ «កងទ័ពជើងទឹកបារាំងរបស់យើង បានឡើងលើកប៉ាល់ដឹកប្រេង DF Peak ដែលសង្ស័យថា បានធ្វើដំណើរ ដោយប្រើទង់ជាតិក្លែងក្លាយ ហើយពាក់ព័ន្ធនឹងសកម្មភាពជួញដូរប្រេងឥន្ធនៈដោយខុសច្បាប់។
លោកប្រធានាធិបតី ម៉ាក្រុង ក៏បានចែករំលែកវីដេអូដែលបង្ហាញពីទាហានបារាំង ចុះពីលើអាកាសដោយប្រើខ្សែ និងបានចុះទៅលើកប៉ាល់នោះ។ ប្រទេសបារាំងនៅតែ«ប្តេជ្ញាចិត្ត នៅក្នុងការប្រយុទ្ធប្រឆាំងនឹងកងនាវាស្រមោល ទោះបីជាពួកគេស្ថិតនៅទីណាក៏ដោយ នៅលើពិភពលោក»។
លោកស្រី កាថែ Catherine Vautrin រដ្ឋមន្ត្រី ក្រសួងកងកម្លាំងប្រដាប់អាវុធរបស់បារាំង បានថ្លែងអំណរគុណដល់អ្នកដែលបានចូលរួម នៅក្នុងប្រតិបត្តិការនេះ ហើយបាននិយាយថា កងទ័ពបារាំងកំពុងតែអមដំណើរកប៉ាល់ DF Peak ដើម្បីត្រួតពិនិត្យបន្ថែមទៀត ក្រោមការគ្រប់គ្រងរបស់អាជ្ញាធរ ប្រចាំនៅកោះ Réunion។
អគ្គនាយកដ្ឋានស៊ើបការណ៍សម្ងាត់ នៃប្រទេសអ៊ុយក្រែន (GUR) បានឱ្យដឹងថា កប៉ាល់នេះពាក់ព័ន្ធនឹងការដឹកជញ្ជូនប្រេងឆៅរបស់រុស្ស៊ី និងមានទំនាក់ទំនងជាមួយក្រុមហ៊ុនដឹកជញ្ជូន Sovcomflot។ កប៉ាល់នេះបានសាងសង់ឡើង នៅក្នុងឆ្នាំ ២០០៦ និងធ្លាប់បានធ្វើដំណើរក្រោមទង់ជាតិជាច្រើនផ្សេងៗគ្នា។
កាលពីខែមិថុនា កងកម្លាំងបារាំង ក៏បានស្ទាក់ចាប់កប៉ាល់ដឹកប្រេង «Deliver» ដែលជាផ្នែកមួយ នៃកងនាវាស្រមោលរបស់រុស្ស៊ី ខណៈកប៉ាល់នោះកំពុងតែធ្វើដំណើរ នៅជិតឆ្នេរសមុទ្រកោះ Sicily ដោយ «រំលោភលើច្បាប់ដែនសមុទ្រ»។ នេះបើតាមការប្រកាសរបស់លោកប្រធានាធិបតី ម៉ាក្រុង នៅពេលនោះ។
កងនាវាស្រមោលរបស់រុស្ស៊ី អនុញ្ញាតឱ្យប្រទេសនេះ គេចវេះពីការដាក់ទណ្ឌកម្មរបស់លោកខាងលិច លើវិស័យថាមពលរបស់ខ្លួន ដោយទណ្ឌកម្មទាំងនោះ ហាមឃាត់ការជួល ឬការធានារ៉ាប់រងកប៉ាល់ដឹកប្រេង លុះត្រាតែមានការអនុលោម តាមការកំណត់ជាក់លាក់ណាមួយ។ កងនាវាស្រមោលគេចវេះពីការកំណត់ទាំងនេះ ដោយប្រើប្រាស់រចនាសម្ព័ន្ធកម្មសិទ្ធិដ៏ស្មុគស្មាញ ការប្រើប្រាស់ទង់ជាតិងាយស្រួល និងយុទ្ធសាស្ត្រផ្សេងៗទៀត ដែលត្រូវបានរៀបចំឡើង ដើម្បីលាក់បាំងប្រភពដើម នៃទំនិញរបស់ពួកគេ។ រីឯប្រទេសអឺរ៉ុបមួយចំនួនទៀត ក៏បានរាយការណ៍ អំពីការស្ទាក់ចាប់នាវាដែលជាផ្នែក នៃកងនាវាស្រមោលរបស់រុស្ស៊ីផងដែរ នៅក្នុងរយៈពេលប៉ុន្មានខែកន្លងទៅថ្មីៗនេះ៕
