រដ្ឋធានីសាណា (Sanaa)៖ សង្គ្រាមស៊ីវិលដ៏រ៉ាំរ៉ៃ នៅក្នុងប្រទេសយេម៉ែន ក្លាយជាបញ្ហាមិនអាចមើលរំលងបានបន្ដទៅទៀត ព្រោះវាជាជម្លោះដ៏ធំទូលាយមួយ ដោយលាតសន្ធឹង ចាប់តាំងពីទីក្រុងតេហ៊ីរ៉ង់ (Tehran) ប្រទេសអ៊ីរ៉ង់ រហូតដល់រាជធានីរីយ៉ាដ (Riyadh) នៃប្រទេសអារ៉ាប៊ីសាអូឌីត ជាកន្លែងដែលមីស៊ីលបានធ្លាក់ចំអាកាសយានដ្ឋានអន្តរជាតិ កាលពីចុងសប្តាហ៍កន្លងទៅនេះ ហើយក្រុមប្រដាប់អាវុធហ៊ូទី កំពុងតែបង្កការគំរាមកំហែងយ៉ាងខ្លាំង ដល់ការដឹកជញ្ជូនរបស់ពិភពលោក តាមផ្លូវសមុទ្រ និងផ្តល់នូវអំណាចតថ្លៃ ឬឥទ្ធិពលដល់ក្រុមអ្នកគាំទ្ររបស់ពួកគេ នៅក្នុងប្រទេសអ៊ីរ៉ង់ ដែលជាគូប្រជែងនៅក្នុងតំបន់របស់អារ៉ាប៊ីសាអូឌីត។
លោក អាល់ ហាប៊ូន (Al Haboun) មេបញ្ជាការកងកម្លាំងសន្ដិសុខជាតិ គាំទ្រដល់រដ្ឋាភិបាលយេម៉ែន បានបញ្ជាក់ថា កងកម្លាំងភាគខាងត្បូងរបស់លោក ក្លាយជាផ្នែកមួយ នៃក្រុមសម្ពន្ធភាពដ៏ធូររលុង កំពុងតែប្រយុទ្ធ ដើម្បីរដ្ឋាភិបាលយេម៉ែន ដែលបានទទួលស្គាល់ជាអន្តរជាតិ និងទទួលបានការគាំទ្រពីប្រទេសអារ៉ាប៊ីសាអូឌីត តាមរយៈការវាយប្រហារតាមផ្លូវអាកាស។ ប៉ុន្ដែក្រុមយុទ្ធជនរបស់ក្រុមឧទ្ទាមហ៊ូទី ប្រហែល៥០០នាក់ នៅតែស្ថិតនៅលើតំបន់ខ្ពង់រាប ដែលមើលឃើញផ្លូវសមុទ្រយុទ្ធសាស្ត្រដ៏សំខាន់មួយ គឺច្រកសមុទ្រ បាប អាល់-ម៉ាន់ដាប (Bab al-Mandab) ដែលជាចំណុចតភ្ជាប់សមុទ្រក្រហមទៅនឹងឈូងសមុទ្រអាដែន (Aden) ឆ្ពោះទៅកាន់មហាមុទ្រឥណ្ឌា និងមហាមសមុទ្រផ្សេងៗទៀត។
លោក អាល់ ហាប៊ូន (Al Haboun) មេបញ្ជាការកងកម្លាំងសន្ដិសុខជាតិ គាំទ្រដល់រដ្ឋាភិបាលយេម៉ែន បានបន្ដថា ផ្លូវទឹកដ៏តូចនេះ ពិតជាមានសារៈសំខាន់យ៉ាងខ្លាំង សម្រាប់ការនាំចេញប្រេង។ ប៉ុន្ដែក្រុមឧទ្ទាមហ៊ូធី (Houthis) បានចូលកាន់កាប់តំបន់នេះ បន្ទាប់ពីការវាយលុកយ៉ាងឆាប់រហ័សរបស់ពួកគេ កាលពីខែកញ្ញា ឆ្នាំ២០១៤។ បច្ចុប្បន្នកងកម្លាំងគាំទ្ររដ្ឋាភិបាលយេម៉ែន បានដណ្តើមកាន់កាប់តំបន់នេះមកវិញ បានប្រហែល៨៥ភាគរយ។ រីឯក្រុមឧទ្ទាមហ៊ូទី បានបដិសេធថា ពួកគេមិនបានបាត់បង់ដែនដី នៅតំបន់ផ្សេងទៀតនោះទេ ប៉ុន្តែពួកគេមិនបានបដិសេធ ចំពោះតំបន់នេះឡើយ។ នេះបើតាមអ្វីដែលប្រភពក្នុងស្រុករបស់យើង បានដឹង។
ក្រុមឧទ្ទាមហ៊ូទី គាំទ្រដោយប្រទេសអ៊ីរ៉ង់ បានវាយលុកចូលកាន់កាប់រដ្ឋធានីសាណា (Sanaa) ប្រទេសយេម៉ែន នៅឆ្នាំ២០១៤ ដោយបានបណ្ដេញរដ្ឋាភិបាល ចេញពីអំណាច។ លុះរយៈពេលមួយឆ្នាំក្រោយមក ក្រុមសម្ពន្ធមិត្តអារ៉ាប់ ដឹកនាំដោយអារ៉ាប៊ីសាអូឌីត បានធ្វើអន្តរាគមន៍ ដោយព្យាយាម បណ្តេញក្រុមឧទ្ទាមហ៊ូធី ចេញពីរដ្ឋធានីសាណា។ ប៉ុន្ដែទោះបីជាមានការវាយប្រហារតាមផ្លូវអាកាសយ៉ាងខ្លាំងក្លា និងបានបំផ្លិចបំផ្លាញ អស់រយៈពេលជាច្រើនឆ្នាំយ៉ាងណាក៏ដោយ ក៏វិធានការបែបនេះ នៅតែមិនទទួលបានលទ្ធផលនោះឡើយ។
ដោយឡែក បទឈប់បាញ់ កាលពីអំឡុងឆ្នាំ២០២២ បាននាំឲ្យមានភាពស្ងប់ស្ងាត់ ប៉ុន្តែនៅពេលនេះ ក្រុមហ៊ូទី (Houthis) កំពុងតែក្លាយជាគូប្រជែងដ៏ខ្លាំងក្លាមួយ ដោយពួកគេបានបង្ហាញឱ្យឃើញរួចមកហើយ កាលពីចុងសប្តាហ៍កន្លងទៅ។ ក្រុមឧទ្ទាមហ៊ូទី គ្រប់គ្រងប្រជាជន ភាគច្រើនរបស់ប្រទេសយេម៉ែនរួចទៅហើយ។ មួយវិញទៀត ប្រសិនបើមានការប៉ុនប៉ងថ្មីណាមួយ ដើម្បីសម្របសម្រួលជម្លោះនោះ ពួកគេអាចនឹងដាក់លក្ខខណ្ឌដ៏តឹងរ៉ឹងបន្ថែមទៀត៕
