ព្រះវិហារ៖ លោកនាយឧត្តមសេនីយ៍ ស ថេត អគ្គស្នងការនគរបាលជាតិ តំណាងឱ្យលោក ស សុខា ឧបនាយករដ្ឋមន្ដ្រី-រដ្ឋមន្ដ្រីក្រសួងមហាផ្ទៃ បានចុះសួរសុខទុក្ខ និងនាំយកអំណោយជូនកងកម្លាំងនគរបាលការពារព្រំដែនគោក ប្រចាំទិសភូមិភាគទី៤  ខេត្តព្រះវិហារ កាលពីព្រឹកថ្ងៃទី៩ ខែតុលា ឆ្នាំ២០២៦។

លោកនាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ និងជាមេបញ្ជាការនគរបាលជាតិប្រចាំទិសភូមិភាគទី៣-ទី៤-ទី៥ បានធ្វើសេចក្ដីរាយការណ៍អំពីស្ថានភាពទូទៅនៅតាមបន្ទាត់ព្រំដែន ព្រមទាំងបង្ហាញពីការប្រុងស្មារតីខ្ពស់ជាប់ជានិច្ចរបស់កងកម្លាំងនគរបាល ដើម្បីចូលរួមជាមួយកងយោធពលខេមរភូមិន្ទ ក្នុងការការពារបូរណភាពទឹកដី និងអធិបតេយ្យជាតិ។

លោក ស ថេត បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់កងកម្លាំងនគរបាលការពារព្រំដែន ក្នុងការរក្សាបានសុវត្ថិភាព សន្តិសុខ សណ្តាប់ធ្នាប់ ជូនប្រជាពលរដ្ឋ ជាពិសេសការពារបូរណភាពទឹកដី និងអធិបតេយ្យជាតិ។ លោកនាយឧត្តមសេនីយ៍ ក៏បានបង្ហាញការស្ញប់ស្ញែងចំពោះការបំពេញតួនាទីភារកិច្ចរបស់កម្លាំងនគរបាលការពារព្រំដែន ដែលបានប្រកៀកស្មាយ៉ាងរឹងមាំ តស៊ូក្រាញននៀល ជាមួយកងយោធពលខេមរភូមិន្ទ ប្រឆាំងការទន្ទ្រានឈ្លានពានពីប្រទេសជិតខាង។

ជាមួយគ្នា មេនគរបាលទូទាំងប្រទេសរូបនេះ បានណែនាំឱ្យកងកម្លាំងនគរបាលទាំងអស់ បន្តសហការជាមួយបណ្ដាអង្គភាពពាក់ព័ន្ធ និងអាជ្ញាធរមានសមត្ថកិច្ច ដើម្បីផ្លាស់ប្ដូរព័ត៌មានឱ្យគ្នាទៅវិញទៅមក សំដៅបង្ការ ទប់ស្កាត់ និងឈានទៅបង្ក្រាបបទល្មើសឱ្យបានទាន់ពេលវេលា។ លោក បន្ថែមថា កងកម្លាំងនគរបាលទាំងអស់ ត្រូវត្រៀមលក្ខណៈសម្បត្តិឱ្យបានគ្រប់គ្រាន់ ដើម្បីទទួលបញ្ជារបស់ថ្នាក់ដឹកនាំ ក្នុងការការពារសន្ដិសុខ សណ្ដាប់ធ្នាប់ សុវត្ថិភាព និងបូរណភាពទឹកដី។ សូមជម្រាបថា មកដល់ពេលនេះ កងកម្លាំងថៃ នៅមិនទាន់បញ្ឈប់សកម្មភាពឈ្លានពានទឹកដីកម្ពុជានោះទេ៕