រាជធានីបាងកក៖ សន្ទស្សន៍ទំនុកចិត្តអ្នកប្រើប្រាស់ក្នុងប្រទេសថៃ បានធ្លាក់ចុះជាលើកដំបូងក្នុងរយៈពេល៤ខែចុងក្រោយ កាលពីខែកញ្ញា ដោយសារតែរងផលប៉ះពាល់ខ្លាំងពីគ្រោះទឹកជំនន់ ការស្តារឡើងវិញនៃសេដ្ឋកិច្ចមានភាពយឺតយ៉ាវ និងតម្លៃជីវភាពរស់នៅខ្ពស់។ នេះបើយោងតាមការស្ទង់មតិមួយ ដែលបានចេញផ្សាយនៅថ្ងៃព្រហស្បតិ៍ទី៨ ខែតុលានេះ។

សន្ទស្សន៍ទំនុកចិត្តអ្នកប្រើប្រាស់របស់សាកលវិទ្យាល័យនៃសភាពាណិជ្ជកម្មថៃ (UTCC) បានធ្លាក់ចុះពី៥៣,២ កាលពីខែសីហា មកនៅត្រឹម៥២,១ នៅក្នុងខែកញ្ញា។ កាលពីចុងខែកញ្ញា អភិបាលរាជធានីបាងកក បានប្រកាសដាក់រាជធានី ជាតំបន់ប្រកាសអាសន្នរងគ្រោះមហន្តរាយ បន្ទាប់ពីមានភ្លៀងធ្លាក់ជិត៣០០មិលីម៉ែត្រក្នុងរយៈពេលត្រឹមតែ៣ថ្ងៃ ដែលស្មើនឹងបរិមាណភ្លៀងធ្លាក់សរុបពេញមួយខែកញ្ញា។

លោក ធនវឌ្ឍន៍ ពលវិជ័យ (ธนวรรธน์ พลวิชัย) ប្រធានសាកលវិទ្យាល័យ UTCC បានថ្លែងថា ការខូចខាតសេដ្ឋកិច្ចពីគ្រោះទឹកជំនន់ត្រូវបានប៉ាន់ប្រមាណថា មានប្រមាណ២២ពាន់លានបាត ទៅ៣០ពាន់លានបាត ឬប្រហែល៦៥៥លាន ទៅ ៨៩៣លានដុល្លារអាម៉េរិក ហើយអាចនឹងស្ថិតក្នុងកម្រិតនេះ ប្រសិនបើសភាពការណ៍ចាប់ផ្តើមល្អប្រសើរឡើងវិញ នៅសប្តាហ៍ក្រោយ។ ប៉ុន្តែប្រសិនបើភ្លៀងបន្តធ្លាក់ នោះមានន័យថា ថៃនឹងត្រូវបន្តខាតបង់ធ្ងន់ធ្ងរកាន់តែច្រើនបន្ថែមទៀត។

ជុំវិញការធ្លាក់ចុះទំនុកចិត្តអ្នកប្រើប្រាស់នេះ ថៃក៏បានទាញយកភាពតានតឹងសកលលោក ដោយបញ្ជាក់ថា បានដាក់សម្ពាធលើទំនុកចិត្តសេដ្ឋកិច្ចផងដែរ។ ទោះជាយ៉ាងណា ផ្លូវចិត្ត និងទំនុកចិត្តអាចនឹងងើបឡើងវិញនៅចុងឆ្នាំនេះ ប្រសិនបើហានិភ័យទឹកជំនន់ថយចុះ តម្លៃប្រេងធ្លាក់ចុះ វិស័យទេសចរណ៍កើនឡើង និងវិធានការរំញោចសេដ្ឋកិច្ចរបស់រាជរដ្ឋាភិបាលទទួលបានលទ្ធផលល្អ ខណៈការព្យាករកំណើនសេដ្ឋកិច្ចថៃ នៅតែមានភាពយឺតយ៉ាវខ្លាំង បើប្រៀបធៀបនឹងប្រទេសជិតខាងក្នុងតំបន់អាស៊ីអាគ្នេយ៍៕