រាជធានីតូក្យូ៖ ប្រទេសជប៉ុន ធ្លាប់តែរត់ប្រណាំងប្រជែងយ៉ាងខ្លាំងក្លា លើវិស័យរថយន្ដ ​វិទ្យាសាស្រ្ដ បច្ចេកវិទ្យា និងផលិតផលស៊ីវិលផ្សេងៗទៀត នៅកាន់ទីផ្សាររបស់ពិភពលោក ប៉ុន្ដែចាប់តាំងពីលោកស្រី នាយករដ្ឋមន្រ្ដី សាណេ តាកៃឈិ បានចូលមកកាន់អំណាច កាលពីអំឡុងឆ្នាំ២០២៥រហូត​មក ស្រ្ដីដំបូងនៅក្នុប្រវត្ដិសាស្រ្ដរបស់ជប៉ុន ដែលគ្រប់គ្រងរដ្ឋាភិបាលទីក្រុងតូក្យូ បានសម្រេចលុបចោលច្បាប់រឹតបន្ដឹង លើការនាំចេញគ្រឿងសព្វាវុធ ហើយកំពុងតែបើកដៃឲ្យប្រទេសអាស៊ីបូព៌ាមួយនេះ អាចមានលទ្ធភាពប្រកួតប្រជែង លើទីផ្សារវិស័យការពារជាតិ នៅតំបន់អាស៊ាន ដែលធ្លាប់តែជាចំណែកទីផ្សារអាវុធដ៏ធំមួយរបស់កូរ៉េខាងត្បូង។​

សារព័ត៌មានរបស់កូរ៉េខាងត្បូង The Chosun Daily បានផ្សាយ កាលពីព្រឹក ថ្ងៃសៅរ៍ ទី៣ ខែតុលាថា កាលពីពេលថ្មីៗនេះ ​រដ្ឋាភិបាលជប៉ុន កំពុងតែជំរុញការបង្កើតទីភ្នាក់ងារមួយ ដែលមានតួនាទីជាក់លាក់ នៅក្នុងការផ្តល់ហិរញ្ញប្បទាន ដល់ក្រុមហ៊ុនចាប់ផ្តើមអាជីវកម្ម នៅក្នុងវិស័យឧស្សាហកម្មការពារជាតិ និងជួយសម្រួលដល់ការនាំចេញផលិតផលរបស់ពួកគេ។

បើ​តាមទីភ្នាក់ងារសារព័ត៌មាន​របស់ជប៉ុន Nikkei Asia បានរាយការណ៍ កាលពី​ថ្ងៃទី២៩ ខែកញ្ញា ថា ក្រសួងនានា​របស់​ជប៉ុន រួមមាន៖ ក្រសួងការពារជាតិ, ​ក្រសួងសេដ្ឋកិច្ច ពាណិជ្ជកម្ម និងឧស្សាហកម្ម​ កំពុងតែពិភាក្សាគ្នា អំពីផែនការបង្កើត«ទីភ្នាក់ងារហេដ្ឋារចនាសម្ព័ន្ធបច្ចេកវិទ្យា និងផលិតកម្មវិស័យការពារជាតិ (Defense Production and Technology Infrastructure Agency)» ជាបណ្តោះអាសន្នមួយ ដើម្បីត្រួតពិនិត្យ និងគ្រប់គ្រងលើកិច្ចការទាំងនេះ។ ទីភ្នាក់ងារនេះ មានគោលបំណងផ្សារភ្ជាប់ក្រុមហ៊ុនវិនិយោគទុន (VC) ក្នុងស្រុក ទៅនឹងក្រុមហ៊ុនចាប់ផ្តើមអាជីវកម្មនានា ដើម្បីជំរុញការបង្កើតសហគ្រាសថ្មីៗ និងគាំទ្រដល់ការពង្រីកអាជីវកម្មរបស់ពួកគេ ទៅកាន់ទីផ្សារក្រៅប្រទេស។

ការប្រកួតប្រជែងទាំងនេះ ​ចាប់ផ្ដើមមាន​សន្ទុះខ្លាំងឡើង បន្ទាប់ពីប្រទេសជប៉ុន បានកែប្រែ​​«គោលការណ៍ទាំង៣របស់ខ្លួន ស្តីពីការផ្ទេរឧបករណ៍យោធា និងបច្ចេកវិទ្យាការពារជាតិ» របស់ខ្លួន ចាប់តាំងពី​ខែមេសា ឆ្នាំ២០២៦ ដែលពីមុនបានកំណត់លើការនាំចេញតែគ្រឿងសព្វា​វុធ ត្រឹមតែ សម្រាប់គោលបំណងមនុស្សធម៌ ការដឹកជញ្ជូនធម្មតា និងការឃ្លាំមើលតែប៉ុណ្ណោះ។ ការកែប្រែច្បាប់​បែបនេះ បានអនុញ្ញាតឱ្យជប៉ុន អាចនាំចេញគ្រឿងសព្វា​វុធយ៉ាងពេញទំហឹង​ ទៅកាន់ប្រទេសចំនួន១៧ ដែលមានកិច្ចព្រមព្រៀងផ្ទេរឧបករណ៍ការពារជាតិ ជាមួយនឹងរដ្ឋាភិបាលទីក្រុងតូក្យូ។ ការកែប្រែច្បាប់​​នេះ បានបើកផ្លូវដល់វិស័យការពារជាតិរបស់ជប៉ុន (J-defense) ហក់ចូលទៅក្នុងទីផ្សារសកល ជាមួយនឹងការ​ការព្យាករណ៍ថា ជប៉ុននឹងអាចក្លាយជាគូប្រជែងដ៏ខ្លាំងក្លាមួយ ជាមួយនឹង​វិស័យការពារជាតិរបស់កូរ៉េខាងត្បូង (K-defense) នៅពេលឆាប់ៗនេះ។​​

ប្រទេសជប៉ុន បានចាប់ផ្តើមឆក់​​យកឱកាស នៅក្នុងទីផ្សារការពារជាតិដ៏ធំ នៅតំបន់អាស៊ីអាគ្នេយ៍ ឬអាស៊ាន​។ ជាមួយគ្នានេះ លោក ស៊ីនជីរ៉ូ កូអ៊ិហ្ស៊ូមិ (Shinjiro Koizumi) រដ្ឋមន្ត្រីក្រសួងការពារជាតិ កាលពីខែឧសភាកន្លងទៅនេះ បានទៅបំពេញទស្សនកិច្ច នៅប្រទេសហ្វីលីពីន និងឥណ្ឌូណេស៊ី ដើម្បីពិភាក្សា អំពីការផ្ទេរនាវាចម្បាំង ដែលធ្លាប់​ប្រើប្រាស់រួចហើយ។ ជប៉ុនបានត្រូវស្នើឲ្យផ្តល់នាវាចម្បាំង ប្រភេទ Abukuma (អាប៊ូគូម៉ា) ចំណុះ ២ ០០០តោន ដល់ហ្វីលីពីន និងនាវាចម្បាំង ប្រភេទ Asagiri (អាសាហ្គីរិ) ចំណុះ ៤ ៩០០ តោន ដល់ប្រទេសឥណ្ឌូណេស៊ី ដោយឥតគិតថ្លៃ ឬក្នុងតម្លៃទាប។

ដោយឡែក ក្រុមអ្នកវិភាគយល់ឃើញថា យុទ្ធសាស្ត្របែបនេះ មានគោលបំណងដាក់បញ្ចូលនាវាចម្បាំងរបស់ជប៉ុន ទៅក្នុងប្រព័ន្ធប្រតិបត្តិការ នៅក្នុងតំបន់ ដែលជាការត្រួសត្រាយផ្លូវដ៏សំខាន់មួយ សម្រាប់ការលក់នាវាចម្បាំងថ្មីៗ និងសេវាកម្មថែទាំ ជួសជុល និងប្រតិបត្តិការ (MRO) នាពេលអនាគត។​

ប្រទេសហ្វីលីពីន ក្លាយ​ជាចំណែកទីផ្សារដ៏ធំមួយ សម្រាប់ក្រុមហ៊ុននានារបស់កូរ៉េខាងត្បូង។ នៅក្នុងចំណោមក្រុមហ៊ុនរបស់ប្រទេសកូរ៉េខាងត្បូងទាំងនោះ ​គឺក្រុមហ៊ុន HD Hyundai បាននាំចេញនាវាចម្បាំង ប្រភេទ Jose Rizal (ចូសេ រីហ្សាល់) ចំណុះ ២​​ ៦០០តោន ចំនួន២គ្រឿង កាលពី​ឆ្នាំ២០១៦ ហើយបើគិតមកទល់ពេលនេះ បានប្រគល់នាវាចម្បាំង សរុប​១២គ្រឿងរួចមកហើយ។ លុះមកដល់ឆ្នាំ២០២៤ ក្រុមហ៊ុន HD Hyundai បានជួល​កន្លែងផលិតនាវា​មួយផ្នែក ដើម្បីបង្កើតក្រុមហ៊ុនបុត្រសម្ព័ន្ធក្នុងស្រុក។ ស្របគ្នានេះដែរ ​ក្រុមហ៊ុនកូរ៉េខាងត្បូង Hanwha Systems បាននាំចេញប្រព័ន្ធគ្រប់គ្រងការប្រយុទ្ធ (CMS) កាលពីឆ្នាំ ២០១៧ ហើយក្រុមហ៊ុន LIG D&A បានលក់គ្រាប់ Torpedo ប្រភេទ «Chonsang-eo»​ កាលពីឆ្នាំ ២០១៦។ ប្រទេសឥណ្ឌូណេស៊ី ក៏មានទំនាក់ទំនងផ្នែកការពារជាតិយ៉ាងសំខាន់ ជាមួយកូរ៉េខាងត្បូងផងដែរ រួមទាំងការនាំចេញនាវាមុជទឹក ដោយក្រុមហ៊ុន Hanwha Ocean កាលពីឆ្នាំ២០១១ ដែលជាការលក់ទៅក្រៅប្រទេស​ជាលើកដំបូងបង្អស់ ដោយក្រុមហ៊ុនកូរ៉េខាងត្បូង។

វិស័យការពារជាតិរបស់កូរ៉េខាងត្បូង បានប្រឈមនឹងឧបសគ្គរួចមកហើយ នៅក្នុងការប្រកួតប្រជែងជាមួយប្រទេសជប៉ុន។ កាលពីខែមេសា ក្រុមហ៊ុនឧស្សាហកម្មធុនធ្ងន់របស់ជប៉ុន Mitsubishi បានចុះកិច្ច​ព្រមព្រៀង​មួយ ​មានទំហំទឹកប្រាក់ប្រហែល ១០ពាន់ពាន់លាន ឬទ្រីលលានវ៉ុនកូរ៉េ ឬស្មើនឹងប្រហែលជាង៧,៣៥ពាន់លានដុល្លារអាម៉េរិក​ ដើម្បីនាំចេញនាវាចម្បាំង ប្រភេទ Mogami (ម៉ូហ្កាមិ) ចំនួន៣គ្រឿង ទៅកាន់ប្រទេសអូស្ត្រាលី។ ទន្ទឹមគ្នានេះដែរ ក្រុមហ៊ុនឧស្សាហកម្មធុនធ្ងន់របស់កូរ៉េខាងត្បូង ​HD Hyundai ​និងក្រុមហ៊ុន Hanwha Ocean បានចូលរួមក្នុងការដេញថ្លៃនេះផងដែរ ប៉ុន្តែមិនទទួលបានជោគជ័យ​។ បច្ចុប្បន្ននេះ ប្រទេសជប៉ុន ក៏កំពុងតែស្វែងរកឱកាសនាំចេញគ្រឿងសព្វាវុធ ទៅកាន់ប្រទេសនូវ៉ែលសេឡង់ដ៍ផងដែរ​។

បច្ចុប្បន្ន ​ការប្រកួតប្រជែងរបស់ប្រទេសជប៉ុន ​លើប្រព័ន្ធបច្ចេកវិទ្យាទំនើបៗ ដូចជា៖ យន្តហោះចម្បាំង និងមីស៊ីល បានបង្កើនសម្ពាធយ៉ាងខ្លាំង ដល់វិស័យការពារជាតិរបស់កូរ៉េខាងត្បូង (K-defense)។ ប៉ុន្ដែចាប់តាំងពីឆ្នាំ២០២២មក ជប៉ុនបានសហការជាមួយចក្រភពអង់គ្លេស និងអ៊ីតាលី ដើម្បីអភិវឌ្ឍយន្តហោះចម្បាំងជំនាន់ទី៦ ដែលមានសមត្ថភាពខ្ពស់ជាងយន្តហោះចម្បាំងបំបាំងកាយ F-35 ផលិតដោយសហរដ្ឋអាម៉េរិក។ កាលពីខែកក្កដា ប្រទេសកាណាដា បានចូលរួមក្នុងនាមជាអ្នកសង្កេតការណ៍ ដែលជា​បង្ហាញពីចំណាប់អារម្មណ៍របស់បណ្តាប្រទេសជាសមាជិករបស់អង្គការណាតូ (NATO) ក្នុងការទិញ​យន្តហោះជំនាន់ទី៦នេះ។ ស្ថានភាពបែបនេះ អាចបើកឱកាស សម្រាប់ការនាំចេញទៅកាន់តំបន់អាស៊ីអាគ្នេយ៍ និងមជ្ឈិមបូព៌ា ​ជាទីផ្សារដែលក្រុមហ៊ុន Korea Aerospace Industries (KAI) កំពុងតែផ្សព្វផ្សាយលក់យន្តហោះចម្បាំងល្បឿនលឿនជាងសំឡេង (supersonic) ជំនាន់ទី ៤.៥ ម៉ូដែល KF-21 របស់ខ្លួន។

លោកសាស្រ្តាចារ្យ ចាង វ៉ុន-ចុន (Jang Won-jun) មកពីនាយកដ្ឋានសិក្សាវិស័យការពារជាតិកម្រិតខ្ពស់ នៃសាកលវិទ្យាល័យជាតិ Jeonbuk (ជេអនប៊ុក) បានលើកឡើងថា៖ «ទោះបីជាគេរំពឹងថា នឹងមានការប្រកួតប្រជែងយ៉ាងខ្លាំងក្លា ជាមួយជប៉ុនក៏ដោយ ក៏ក្រុមហ៊ុននានារបស់កូរ៉េខាងត្បូង ចាំបាច់ត្រូវតែរៀបចំយុទ្ធសាស្ត្រឱ្យបានច្បាស់លាស់ ដើម្បីរក្សាតុល្យភាព រវាងការប្រកួតប្រជែង និងកិច្ចសហប្រតិបត្តិការ ដូចជា ការស្វែងរកឱកាស នៅក្នុងវិស័យការពារជាតិលើផ្លូវគោក ​ជាឧទាហរណ៍ដូចជា៖ រថក្រោះ​ ដែលកូរ៉េខាងត្បូង មានឧត្តមភាពខ្លាំងជាង»៕