រាជធានីបាងកក៖ បុរសជនជាតិថៃម្នាក់ បានលង់ស្នេហ៍នឹងស្ដ្រីមេម៉ាយម្នាក់យ៉ាងខ្លាំង លុះពេលឃើញបុរសម្នាក់ ចូលមកចែចូវតាមស្រលាញ់នាងដែរ ក៏ផ្ទុះភ្លើងប្រចណ្ឌយ៉ាងខ្លាំង ដកកាំភ្លើងបាញ់ផ្ដាច់ជីវិតរបស់គូប្រជែងស្នេហា នៅមុនលើកដៃបន្ដបាញ់ប្រហារទៅលើនាង និងកូនរបស់នាង បណ្ដាលឲ្យស្លាប់យ៉ាងអាណោចអាធ័ម នៅក្នុងថ្លុងឈាមចំនួន៣នាក់។
បើតាមសារព័ត៌មានថៃ បានរាយការណ៍ ថា អំពើឃាតកម្ម ដែលបានផ្ដើមចេញពីភ្លើងប្រចណ្ឌនេះ បានកើតឡើង នៅក្នុងផ្ទះរបស់ជនរងគ្រោះជាស្រ្ដីមេម៉ាយ កាលពីថ្ងៃអាទិត្យ ទី២៧ ខែកញ្ញា នៅស្រុកសាមឈុក (Sam Chuk) ខេត្តស៊ូផាន់ ប៊ូរី (Suphan Buri)។ ប៉ូលិស បានស្រាវជ្រាវ និងកំណត់អត្ដសញ្ញាណរបស់ជនរងគ្រោះទាំង៣នាក់នេះ រួមមាន៖ ស្រ្ដីម្ចាស់ផ្ទះ ឈ្មោះ ធីរ៉ាយ៉ាដា (Tirayada) អាយុ៤៤ឆ្នាំ, កូនប្រុសអាយុ៦ឆ្នាំរបស់នាង និងបុរសម្នាក់ទៀត ឈ្មោះ អាធីពង់ (Atipong) អាយុ៤១ឆ្នាំ ជាអតីតជំនួយការ មេដឹកនាំសហគមន៍ ដែលមានទំនាក់ទំនងស្នេហាជាមួយនឹងនាង។
បើតាមសេចក្តីរាយការណ៍របស់ប្រព័ន្ធផ្សព្វផ្សាយនានារបស់ថៃ បានឲ្យដឹងថា អាធីពង់ តែងតែចេញចូល និងព្យាយាមតាមស្រឡាញ់នាង ធីរ៉ាយ៉ាដា (Tirayada) ដែលជាស្ត្រីមេម៉ាយ។ លុះមកដល់ថ្ងៃកើតហេតុ បុរសម្នាក់នេះ ក៏បានមកលេងផ្ទះរបស់នាង ដូចសព្វមួយដង ស្រាប់តែមានហេតុការណ៍បាញ់ប្រហារបែបនេះ បានកើតឡើងតែម្ដង។
មន្ត្រីប៉ូលិសស្រុក Sam Chuk ដែលបានស៊ើបអង្កេតលើករណីឃាតកម្មនេះ បានឲ្យដឹងថា ក្រោយពេលកើតមានករណីបាញ់ប្រហាររួចមក សមត្ថកិច្ចបានចុះស្រាវជ្រាវ និងកំណត់បានអត្តសញ្ញាណរបស់ជនសង័្សយឈ្មោះ ឆាត ឆៃ (Chatchai) អាយុ៤៤ឆ្នាំ។ ប៉ុន្ដែបន្ទាប់ពីប៉ូលិសបានបើកប្រតិបត្តិការស្វែងរករួចមក នៅទីបំផុត ជនសង័្សយ បានយល់ព្រមចូលខ្លួនសារភាព នៅចំពោះមុខប៉ូលិស កាលពីថ្ងៃចន្ទ ទី២៨ ខែកញ្ញា។
ស្ថានីយទូរទស្សន៍ Amarin TV បានរាយការណ៍ថា លោក ឆាតឆៃ (Chatchai) ក៏មានចិត្តស្រឡាញ់អ្នកមេម៉ាយ ធីរ៉ាយ៉ាដា (Tirayada) យ៉ាងខ្លាំងផងដែរ ហើយគេក៏មិនចង់ឲ្យនាង ធ្លាក់ទៅលើដៃរបស់លោក អាធីពង់ ដែលជាគូប្រជែងស្នេហា។ ប៉ុន្ដែភ្លើងប្រចណ្ឌនេះ បានធ្វើឲ្យលោក ឆាតឆៃ ទប់កំហឹងមិនបាន ខណៈគេបានឃើញនាង Tirayada កំពុងតែនៅយ៉ាងស្និទ្ធស្នាលជាមួយលោក Atipong។ ជនដៃដល់ បានបាញ់លោក Atipong ជាមុន ទើបបន្ដបាញ់ប្រហារទៅលើនាង Tirayada ធ្វើឲ្យនាងព្យាយាមរត់ទៅលាក់ខ្លួនដល់ក្នុងបន្ទប់ទឹក ប៉ុន្តែនាងមិនអាចគេចផុតពីការតាមសម្លាប់ពីលោក ឆាតឆៃ។
ទោះជាយ៉ាងណាក៏ដោយ ជនសង័្សយ ឈ្មោះ ឆាតឆៃ បានបដិសេធថា គេមិនបានបាញ់ស្លាប់ក្មេងប្រុសអាយុ៦ឆ្នាំនេះ ដោយចេតនានោះទេ ប៉ុន្ដែគ្រាប់កាំភ្លើងបានផ្ទុះឡើង ដោយចៃដន្យ បណ្ដាលឲ្យក្មេងនោះស្លាប់។ ប៉ុន្ដែប៉ូលិសមិនទាន់បានបញ្ជាក់ អំពីការអះអាងនេះនៅឡើយ ហើយការសាកសួរចម្លើយទៅលើជនសង្ស័យ នឹងនៅតែធ្វើឡើងបន្ដទៀត៕
