រដ្ឋធានីព្យុងយ៉ាង៖ របបដឹកនាំរដ្ឋធានីព្យុងយ៉ាង បានចេញមកប្រើវោហារសាស្ត្រជាថ្មីម្ដងទៀត ដោយលោកស្រី គីម យ៉ូជុង (Kim Yo Jong) ប្អូនស្រីបង្កើតរបស់មេដឹកនាំផ្តាច់ការ គីម ជុងអ៊ុន (Kim Jong Un) នៅថ្ងៃសៅរ៍ទី១៩ ខែកញ្ញានេះ ចោទប្រកាន់ទីភ្នាក់ងារថាមពលបរមាណូអន្តរជាតិ (IAEA) ថា «ប្រើស្ដង់ដារ២» បន្ទាប់ពីស្ថាប័នមួយនេះ បានអនុម័តសេចក្តីសម្រេចថ្កោលទោសកម្មវិធីអាវុធមហាប្រល័យរបស់កូរ៉េខាងជើង។

តាមរយៈសេចក្តីថ្លែងការណ៍ លោកស្រី គីម យូជុង (Kim Yo Jong) បានស្តីបន្ទោសលើ IAEA ថា ការមើលឃើញប្រកបដោយភាពលម្អៀង និងស្ដង់ដារពីរ របស់ស្ថាប័ននេះទៅវិញទេ ដែលជាដើមហេតុនាំឱ្យឱ្យរលំរលាយនៃកិច្ចព្រមព្រៀងមិនរីកសាយភាយនុយក្លេអ៊ែរអន្តរជាតិ។ ស្ត្រីខ្លាំងរូបនេះបានរិះគន់ទៀតថា IAEA ធ្វើជាភ្នែកខ្វាក់ ត្រចៀកថ្លង់ មើលមិនឃើញ ស្ដាប់មិនឮ អំពីសកម្មភាពរីកសាយភាយនុយក្លេអ៊ែរយ៉ាងគ្រោះថ្នាក់របស់អាម៉េរិក និងផែនការយកនាវាមុជទឹកនុយក្លេអ៊ែររបស់កូរ៉េខាងត្បូង ប៉ុន្តែបែរជាស្រែកគំរាម និងអនុម័តសេចក្តីសម្រេចប្រឆាំងសកម្មភាពនុយក្លេអ៊ែរស្របច្បាប់ ដែលកូរ៉េខាងជើងអះអាងថាជាការការពារខ្លួនទៅវិញ។ ទន្ទឹមគ្នានេះ ក្រសួងការបរទេសកូរ៉េខាងជើងក៏បានចេញមុខច្រានចោលសេចក្តីសម្រេចរបស់ UN ទាំងដោយបានប្រកាសយ៉ាងតឹងសរសៃកថា ក្រុងព្រុងយ៉ាងជាមហាអំណាចនុយក្លេអ៊ែរដាច់ខាត ដែលគ្មាននរណាអាចកែប្រែបានឡើយ។

មិនត្រឹមតែប៉ុណ្ណោះ KCNA បានទម្លាយថា មេដឹកនាំផ្តាច់ការ គីម ជុងអ៊ុន បានចំណាយពេល ៣ថ្ងៃពេញ ចុះត្រួតពិនិត្យរោងចក្រផលិតគ្រាប់កាំភ្លើង និងអាវុធយុទ្ធភណ្ឌសំខាន់ៗ ដើម្បីបង្កើនសន្ទុះសង្គ្រាម។ លោក គីម បានបញ្ជាឱ្យកងកម្លាំងកាំភ្លើងធំរបស់ខ្លួនត្រៀមលក្ខណៈវាយប្រហារ ជាមួយនឹងសមត្ថភាពបំផ្លិចបំផ្លាញប្រកបដោយគ្រោះថ្នាក់បំផុត និងខ្លាំងបំផុត។ ក្រុមអ្នកវិភាគអន្តរជាតិបានព្រមានថា កូរ៉េខាងជើងកំពុងធ្វើទំនើបកម្មយោធារបស់ខ្លួនយ៉ាងគំហុក ដោយមានការជ្រោមជ្រែងនៅពីក្រោយខ្នងពីរុស្ស៊ី តាមរយៈសន្ធិសញ្ញាការពារជាតិឆ្នាំ២០២៤។ លើសពីនេះ កងទ័ពរដ្ឋធានីព្យុងយ៉ាង ដែលត្រូវបានបញ្ជូនទៅជួយចម្បាំងក្នុងសង្គ្រាមឈ្លានពាននៅអ៊ុយក្រែន។ ជាចុងក្រោយ មេដឹកនាំកំពូលរបស់កូរ៉េខាងរូបនេះ ក៏បានសង្កត់ធ្ងន់ថា រដ្ឋធានីត្រូវតែប្រើប្រាស់សង្គ្រាមមនោគមវិជ្ជាបែបប្រហារ និងវាយប្រហារយ៉ាងចាស់ដៃ ដើម្បីកម្ទេចសត្រូវ ជំនួសឱ្យការប្រើវិធីសាស្ដ្របុរាណ៕