រដ្ឋធានីព្យុងយ៉ាង៖ អនុរដ្ឋមន្ត្រីក្រសួងការពារជាតិកូរ៉េខាងជើង បានអះអាងនៅថ្ងៃព្រហស្បតិ៍ទី១៧ ខែកញ្ញានេះថា ការបង្កើនកម្លាំងយោធាកាន់តែខ្លាំងឡើង ដឹកនាំដោយសហរដ្ឋអាម៉េរិក និងការប្រមូលផ្តុំសម្ព័ន្ធមិត្តនុយក្លេអ៊ែរ រវាងរដ្ឋធានីវ៉ាស៊ីនតោន សេអ៊ូល និងតូក្យូ គឺជាហេតុផលសមស្របបំផុត ដែលតម្រូវឱ្យរដ្ឋធានីព្យុងយ៉ាង បន្តពង្រឹង និងពង្រីកកម្លាំងអាវុធនុយក្លេអ៊ែរររបស់ខ្លួន។

ថ្លែងនៅក្នុងវេទិកាសៀងសាន (Xiangshan) ក្នុងរដ្ឋធានីបេកាំង ដែលជាកិច្ចប្រជុំសន្តិសុខអន្តរជាតិដ៏សំខាន់របស់ចិន អនុរដ្ឋមន្ត្រីការពារជាតិកូរ៉េខាងជើង លោក គីម កាង អ៊ីល (Kim Kang Il) បានបញ្ជាក់ថា ស្ថានភាពររបស់កូរ៉េខាងជើង ជារដ្ឋប្រដាប់ដោយអាវុធនុយក្លេអ៊ែរ គឺជារឿងដែលមិនអាចកែប្រែបានឡើយ ហើយនឹងបន្តពង្រីកឃ្លាំងអាវុធនុយក្លេអ៊ែរឱ្យរឹតតែធំជាងមុន។ លោក គីម បានថ្លែងថា៖«ការកើនឡើងឥតឈប់ឈរនៃអាវុធនុយក្លេអ៊ែរររបស់រដ្ឋសត្រូវ បានផ្តល់ហេតុផលត្រឹមត្រូវពេញលេញ ក្នុងការបង្កើតខែលការពារជាតិ ដែកថែបនុយក្លេអ៊ែរររបស់កូរ៉េខាងជើង»។ លោកបានបន្ថែមថា៖«នៅពេលដែលការគំរាមកំហែងផ្នែកនុយក្លេអ៊ែរររបស់រដ្ឋសត្រូវឈានដល់កម្រិតកំពូល..កូរ៉េខាងជើងនឹងការពារសន្តិភាព និងស្ថិរភាពយ៉ាងរឹងមាំនៅលើទ្វីបកូរ៉េ និងក្នុងតំបន់ ដោយការប្រមូលផ្តុំ និងពង្រីកកម្លាំងរារាំងនុយក្លេអ៊ែរដើម្បីការពារខ្លួន»។

លោក គីម ទម្លាក់កំហុសចំពោះភាពតានតឹងនៅលើទ្វីបកូរ៉េ ទៅលើគោលនយោបាយរបស់រដ្ឋធានីវ៉ាស៊ីនតោនមកលើកូរ៉េខាងជើង និងបានចោទប្រកាន់សហរដ្ឋអាម៉េរិកថាបានបង្វែរកិច្ចសហប្រតិបត្តិការត្រីភាគីជាមួយកូរ៉េខាងត្បូង និងជប៉ុន ឱ្យទៅជាសម្ព័ន្ធមិត្តនុយក្លេអ៊ែរ។ លោកបានបញ្ជាក់ទៀតថា ស្ថានភាពរដ្ឋនុយក្លេអ៊ែរ ដែលមានចែងក្នុងរដ្ឋធម្មនុញ្ញកូរ៉េខាងជើង គឺជាខ្សែបន្ទាត់ដែលមិនអាចថយក្រោយបានឡើយ និងបានអំពាវនាវឱ្យប្រទេសដទៃបោះបង់សុបិនបោកប្រាស់នៃការលុបបំបាត់អាវុធនុយក្លេអ៊ែរចោលទៅ៕