ទីក្រុងតៃប៉ិ៖ ជាមួយនឹងការព្រួយបារម្ភអំពីការឈ្លានពានរបស់មហាយក្សចិន ទៅលើកូនកោះប្រជាធិបតេយ្យតៃវ៉ាន់ ក្រុមអ្នករៀបចំផែនការយោធារបស់រដ្ឋបាលទីក្រុងតៃប៉ិ បានបង្កើនការទិញគ្រឿងសព្វាវុធទំនើបៗ ពីសហរដ្ឋអាម៉េរិក និងខិតខំផលិតមីស៊ីលដោយខ្លួនឯង ខណៈបច្ចុប្បន្ន យន្ដហោះគ្មានមនុស្សបើកដ៏ធំ ចំនួន២គ្រឿង មានតម្លៃរាប់រយលានដុល្លារ បានមកដល់ដៃកងទ័ពអាកាសតៃវ៉ាន់ហើយ...។
សារព័ត៌មាន Taiwan News បានចេញផ្សាយនៅព្រឹកថ្ងៃចន្ទទី១៤ ខែកញ្ញានេះថា បើតាមប្រភពព័ត៌មានពីមន្ត្រីយោធា បានឱ្យដឹងថា យន្ដហោះគ្មានមនុស្សបើក ប្រភេទ MQ-9B ចំនួន២គ្រឿង បានទៅដល់ដៃកងទ័ពអាកាសតៃវ៉ាន់ ហើយបាននិងកំពុងហោះហើរសាកល្បងជាលើកដំបូង ដោយបានហោះចេញពីមូលដ្ឋានកងទ័ពអាកាសតៃវ៉ាន់ Hualien (ហ៊ួលៀន) នៅថ្ងៃចន្ទទី១៤កញ្ញានេះ។ យន្តហោះគ្មានមនុស្សបើកទាំង២គ្រឿងនេះ បានផ្ដល់ជូនកងទ័ពអាកាសសហរដ្ឋអាម៉េរិក កាលពីខែមីនា ដោយក្រុមហ៊ុនផលិតយន្តហោះគ្មានមនុស្សបើកដ៏ធំមួយ ប៉ុន្ដែវាទើបនឹងធ្វើដំណើរមកដល់កោះតៃវ៉ាន់ កាលពីពេលថ្មីៗនេះ។
ទីភ្នាក់ងារសារព័ត៌មានសិង្ហបុរី CNA បានរាយការណ៍ថា បុគ្គលិកមកពីក្រុមហ៊ុនផលិតយន្ដហោះគ្មានមនុស្សបើក General Atomics និងកងទ័ពអាកាស បានដំឡើង និងហោះសាកល្បងយន្តហោះគ្មានមនុស្សបើក ឬដ្រូនទាំងនោះ នៅតំបន់ Hualien។ កងទ័ពកោះតៃវ៉ាន់ សង្ឃឹមថា នឹងប្រើប្រាស់សមត្ថភាពហោះហើរបានយូររបស់ ដែលមានសមត្ថភាពឃ្លាំមើលពេញលេញ រយៈពេល២៤ម៉ោង ដើម្បីពង្រឹងការតាមដានសកម្មភាពតាមផ្លូវអាកាស និងផ្លូវសមុទ្ទ នៅជុំវិញច្រកសមុទ្ទកោះតៃវ៉ាន់។កងទ័ពអាកាសកោះតៃវ៉ន់ ក៏បានចាត់ចែងថវិកាចំនួន២១,៧ពាន់លានដុល្លារតៃវ៉ាន់ ឬប្រហែល៦៨៤,០៣លានដុល្លារអាម៉េរិក សម្រាប់រយៈពេលចន្លោះពីឆ្នាំ២០២២-២០២៩ ដើម្បីទិញយន្ដហោះគ្មានមនុស្សបើកចំនួន៤គ្រឿង ប្រភេទ MQ-9B រួមជាមួយឧបករណ៍ពាក់ព័ន្ធ ដូចជា ស្ថានីយគ្រប់គ្រងនៅលើដី។ សហរដ្ឋអាម៉េរិក ត្រូវផ្គត់ផ្គង់យន្ដហោះគ្មានមនុស្សបើកដល់មេដឹកនាំកោះតៃវ៉ាន់ ចំនួន២គ្រឿងបន្ថែមទៀត នៅឆ្នាំ២០២៧។
បើតាមទូរទស្សន៍ប្រទេសសិង្ហបុរី CAN បានឱ្យដឹងថា របាយការណ៍កញ្ចប់ថវិកាវិស័យការពារជាតិរបស់កោះតៃវ៉ាន់ កងទ័ពអាកាសដែនកោះមួយនេះ បានសង្កត់ធ្ងន់ពីភាពចាំបាច់ នៅក្នុងការអភិវឌ្ឍប្រព័ន្ធយន្តហោះគ្មានមនុស្សបើក ឬដ្រូន ដែលមានសមត្ថភាពឃ្លាំមើល នៅក្នុងរយៈចម្ងាយឆ្ងាយ និងគ្រប់លក្ខខណ្ឌអាកាសធាតុ ដើម្បីតាមដានសកម្មភាពយោធារបស់ចិន ក៏ដូចជាសកម្មភាពតាមផ្លូវអាកាស និងផ្លូវសមុទ្ទ នៅជុំវិញច្រកសមុទ្ទតៃវ៉ាន់។ លោក ហ៌សៀហ៍ ប៉ី-សៀហ៍ (Hsieh Pei-hsueh) អ្នកវិភាគនៃវិទ្យាស្ថានស្រាវជ្រាវការពារជាតិ និងសន្តិសុខជាតិ បានលើកឡើងនៅមុននេះថា ប្រព័ន្ធតភ្ជាប់ទិន្នន័យរបស់យន្តហោះគ្មាមនុស្សបើក MQ-9B អាចជួយសម្រួលដល់ការចែករំលែកព័ត៌មានស៊ើបការណ៍សម្ងាត់ នៅក្នុងពេលជាក់ស្តែង រវាងកោះតៃវ៉ាន់ និងសហរដ្ឋអាម៉េរិក ដែលសកម្មភាពនេះ នឹងបង្កើតឱកាសសម្រាប់កិច្ចសហប្រតិបត្តិការការពារជាតិ កាន់តែស៊ីជម្រៅ។
យន្ដហោះគ្មានមនុស្សបើក ឬដ្រូនយក្ស ប្រភេទ MQ-9B មានបណ្ដោយប្រវែង១១,៧ម៉ែត្រ, ស្លាបប្រវែង២៤ម៉ែត្រ វាអាចហោះនៅក្នុងកម្ពស់១២គីឡូម៉ែត្រ ជាមួយនឹងល្បឿន ប្រហែល៣៨៨គីឡូម៉ែត្រក្នុងមួយម៉ោង។ MQ-9B អាចផ្ទុកទម្ងន់ហោះហើរជាអតិបរមា ជាង៦១០០គីឡូក្រាម វាមានសមត្ថភាពហោះឈ្លបយកការណ៍ និងវាយប្រហារនៅក្នុងចម្ងាយប្រហែលជាង១០ ០០០គីឡូម៉ែត្រ។ MQ-9B ក្នុងមួយគ្រឿងៗ មានតម្លៃចន្លោះពី៦៤លាន ដល់២០០លានដុល្លាអាម៉េរិក ដោយអាស្រ័យ ទៅលើឧបករណ៍យោធា និងប្រព័ន្ធរ៉ាដា សម្រាប់បំពាក់ជាមួយវា៕
