រដ្ឋធានីព្យុងយ៉ាង៖ ថ្វីដ្បិតតែ​ប្រធានាធិបតីសហរដ្ឋអាម៉េរិក លោក ដូណាល់ ត្រាំ បាននិងកំពុងតែខិតខំប្រឹងប្រែង ​ទាក់ទងទៅកាន់មេដឹកនាំផ្តាច់ការ នៃប្រទេសកូរ៉េខាងជើង លោក គីម ជុង-អ៊ុន ដើម្បីចរចាឈានដល់ការលុបបំបាត់អាវុធនុយក្លេអ៊ែរ នៅលើ​ឧបទ្វីបកូរ៉េយ៉ាងណាក៏ដោយ ក៏លទ្ធផលនៅតែមិនមានផ្លែផ្កា តែ​ផ្ទុយទៅវិញ​ រដ្ឋាភិបាលទីក្រុងព្យុងយ៉ាង បែរជាកាន់តែផ្គើនបន្ថែមទៀតដាក់សហរដ្ឋអាម៉េរិក ជាមួយនឹង​​ភាពក្លាហានកាន់តែខ្លាំងឡើង ហ៊ានពន្លឿនកម្មវិធីអាវុធនុយក្លេអ៊ែររបស់ខ្លួន និងពង្រឹងសម្ពន្ធភាពជាមួយប្រទេសរុស្ស៊ី និងមហាយក្សចិន ដោយមិនខ្វល់ខ្វាយ នៅក្នុងការបង្កើតកិច្ចព្រមព្រៀង ជាមួយនឹងទីក្រុង​វ៉ាស៊ីនតោន។

បណ្ដាញទូរទស្សន៍ គ្រប់គ្រងដោយរដ្ឋអាល្លឺម៉ង់ DW បានផ្សាយ កាលពីព្រឹក ថ្ងៃសៅរ៍ ទី១២ ខែកញ្ញា ថា កាលពីខែសីហា លោកប្រធានាធិបតី​ ដូណាល់ ត្រាំ បានចាប់ផ្តើមយុទ្ធនាការទាក់ទាញចិត្តពីទីក្រុងព្យុងយ៉ាងឡើងវិញ ដោយកាត់បន្ថយយ៉ាងខ្លាំងនូវការធ្វើសមយុទ្ធយោធារួមគ្នា រវាងកងទ័ពសហរដ្ឋអាម៉េរិក និងកូរ៉េខាងត្បូង ហើយថែមទាំងបានថ្លែងកោតសរសើរយ៉ាងខ្លាំង ដល់មេដឹកនាំកូរ៉េខាងជើង លោក គីម ជុងអ៊ុន ថែមទៀតផង។ ម្ចាស់សេតវិមាន​រូបនេះ បានលើកឡើងថា មេដឹកនាំផ្តាច់ការកូរ៉េខាងជើងរូបនេះ «តែងតែប្រព្រឹត្តល្អ ចំពោះ​ខ្ញុំ ដោយការគោរពយ៉ាងខ្លាំង»។

ការឆ្លើយតបរបស់កូរ៉េខាងជើង ចំពោះកាយវិការរបស់លោកប្រធានាធិបតី ដូណាល់ ត្រាំ  ហាក់មិនសូវមានផល​វិជ្ជមានប៉ុន្មាននោះទេ ​ដោយរាប់ចាប់តាំងពីការបាញ់បង្ហោះមីស៊ីលជាបន្តបន្ទាប់ រហូតដល់ការបដិសេធជាសាធារណៈនូវការអះអាងរបស់លោក ត្រាំ ដែលថា លោក គីម ជុង-អ៊ុន បានឆ្លើយតប «យ៉ាងវិជ្ជមាន» ចំពោះសំណើចង់ជួបចរចារបស់លោក។

ទន្ទឹមគ្នានឹង​កងទ័ពសហរដ្ឋអាម៉េរិក និងកូរ៉េខាងត្បូង រួមជាមួយជប៉ុន បានចាប់ផ្តើមសមយុទ្ធយោធា រយៈពេល៥ថ្ងៃ នៅសប្ដាហ៍នេះ គេមិនឃើញមានការលើកឡើង អំពីការថមថយ ឬការបន្ថយសកម្មភាពណាមួយ ពីរដ្ឋាភិបាលទីក្រុងវ៉ាស៊ីនតោននោះឡើយ ហើយ​ក៏មិនមានសញ្ញា នៃវឌ្ឍនភាពផ្នែកការទូត ជាមួយទីក្រុងព្យុងយ៉ាង នោះដែរ។

ផ្ទុយទៅវិញ កាលពីថ្ងៃចន្ទ ដើមសប្ដាហ៍នេះ មេដឹកនាំកូរ៉េខាងជើង លោក គីម ជុង-អ៊ុន បានដាក់ឱ្យដំណើរការនូវនាវាពិឃាដមួយគ្រឿង ជាមួយនឹង​ការបញ្ជាក់យ៉ាងម៉ឺងម៉ាត់ជាថ្មីម្តងទៀតថា កូរ៉េខាងជើង ត្រូវតែបង្កើត«សមត្ថភាពរារាំង ដោយអាវុធនុយក្លេអ៊ែរដ៏ខ្លាំងក្លា និងអាចទុកចិត្តបាន» ព្រមទាំងពង្រឹង «ការការពារដែនសមុទ្រ»។ លោក គីម ក៏បានលើកឡើងផងដែរថា កូរ៉េខាងជើង នឹងបង្ហាញនូវសមិទ្ធផលយោធាដ៏សំខាន់​របស់កងទ័ពជើងទឹក ក្នុងពេលឆាប់ៗនេះបន្ថែមទៀត។

កូរ៉េខាងជើង បានចាត់ទុក ថា កិច្ចព្រមព្រៀងជាមួយនឹងសហរដ្ឋអាម៉េរិក មិនមែនជាភាពបន្ទាន់ ត្រូវធ្វើនោះឡើយ។ ស្ថានការណ៍បច្ចុប្បន្ន មានភាពខុសប្លែកពីការទូត តាមរយៈកិច្ចប្រជុំកំពូល នៅក្នុងអាណត្តិទីមួយរបស់លោកប្រធានាធិបតី ដូណាល់ ត្រាំ។ ​​ឥរិយាបថមិនចាប់អារម្មណ៍របស់មេដឹកនាំកូរ៉េខាងជើង លោក គីម ជុង-អ៊ុន បានកើតឡើង ស្រប​ពេល​កូរ៉េខាងជើង មានជម្រើសផ្សេង​ទៀត ក្រៅតែពីការបង្កើតកិច្ចព្រមព្រៀងដ៏ធំ​ ជាមួយសហរដ្ឋអាម៉េរិក។

បើតាម​លោក ជូន ហា ផាក (Joon Ha Park) អ្នករាយការណ៍​ព័ត៌មាន ប្រចាំនៅក្រុមហ៊ុន Korea Risk Group ស្ថិតក្នុងទីក្រុងសេអ៊ូល ប្រទេសកូរ៉េខាងត្បូង បានប្រាប់ទូរទស្សន៍ DW ថា៖ «សម្រាប់លោក គីម (Kim) ផលប៉ះពាល់ ឬហានិភ័យ គឺមានកម្រិតទាបជាងអ្វីដែលធ្លាប់មាន កាលពីឆ្នាំ២០១៩។ រដ្ឋាភិបាលទីក្រុងព្យុងយ៉ាង លែងមានអារម្មណ៍ថា ចាំបាច់ត្រូវតែប្រញាប់ប្រញាល់វិលត្រឡប់ទៅកាន់តុចរចា ជាមួយទីក្រុងវ៉ាស៊ីនតោនទៀតហើយ។​ បច្ចុប្បន្ន កូរ៉េខាងជើង មានសម្ពន្ធមិត្តជាមួយទីក្រុងម៉ូស្គូ ដែលផ្អែកលើសន្ធិសញ្ញាការពារជាតិ ហើយកំពុងតែខិតទៅជិតទីក្រុងប៉េកាំង ខណៈ​សមត្ថភាពយោធារបស់ទីក្រុងព្យុងយ៉ាង ត្រូវបានពង្រីកយ៉ាងខ្លាំង។ មួយវិញទៀត ថ្វីបើ​មានការ​កាត់បន្ថយនូវការធ្វើសមយុទ្ធយោធា រវាងកូរ៉េខាងត្បូង និងសហរដ្ឋអាមេរិក មកនៅត្រឹមតែមួយលើកយ៉ាងណាក្ដី ក៏វាមិនគ្រប់គ្រាន់ សម្រាប់​ធ្វើឱ្យទីក្រុងព្យុងយ៉ាង សម្រាប់ផ្លាស់ប្តូរគោលជំហរនោះដែរ​​»។​

ប្រទេសចិនដែលក្លាយជាអ្នកឧបត្ថម្ភ ឬគាំទ្រដ៏ខ្លាំងក្លាដល់ប្រទេសកូរ៉េខាងជើង អស់រយៈពេលជាយូរយារណាស់មកហើយ​ បានកត់សម្គាល់យ៉ាងឆាប់រហ័ស អំពីការកើនឡើង នៃភាពស្និទ្ធស្នាល រវាងទីក្រុងមូស្គូ និងទីក្រុងព្យុងយ៉ាង ប៉ុន្តែនៅដំណាក់កាលដំបូង ទីក្រុងប៉េកាំង​ នៅតែ​រក្សាគម្លាត មិនលូកដៃចូលពាក់ព័ន្ធនោះឡើយ។

លោក អាឡិចសានដឺរ លីបខេ (Alexander Lipke) អ្នកជំនាញផ្នែកគោលនយោបាយប្រចាំកម្មវិធីអាស៊ី នៃក្រុមប្រឹក្សាអឺរ៉ុប ស្តីពីទំនាក់ទំនងអន្តរជាតិ (ECFR) បានប្រាប់​ DW ថា៖ «សង្គ្រាមនៅអ៊ុយក្រែន បានបើកផ្លូវដ៏សំខាន់មួយ សម្រាប់ការរស់រានមានជីវិតរបស់របបដឹកនាំកូរ៉េខាងជើង ដោយអនុញ្ញាតឱ្យមានការបញ្ជូនអាវុធ គ្រាប់រំសេវ និងទាហានទៅកាន់ប្រទេសរុស្ស៊ី ជាថ្នូរនឹងប្រាក់ ស្បៀងអាហារ និងអ្វីដែលគេអះអាងថា ជាបច្ចេកវិទ្យាយោធាកម្រិតខ្ពស់»៕