ខេត្តសៀមរាប៖ លោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកស៊ីម៉ាក់ (CMAC) បន្តបើកបង្ហាញពីផលប៉ះពាល់ និងភស្តុតាងទាហានថៃ គ្រាប់បែកចង្កោម ដែលផ្ទុកកូនគ្រាប់បែករាប់លានគ្រាប់ ក្នុងសង្គ្រាមឈ្លានពានកម្ពុជា អំឡុងឆ្នាំ២០២៥។ អគ្គនាយកស៊ីម៉ាក់ បង្ហាញរបាយការណ៍នេះ អំឡុងពេលអង្គការដៃគូ និងអង្គភាពព័ត៌មាន​នានា ចុះទៅពិនិត្យជាក់ស្តែងនៅតំបន់គ្រាប់បែកចង្កោមក្នុងខេត្តបន្ទាយមានជ័យ​ ខេត្តឧត្តរមានជ័យ​ និងខេត្តព្រវិហារ​ ព្រមទាំងប្រជុំផ្សព្វផ្សាយខ្លឹមសារគ្រាប់បែកចង្កោម នៅសារមន្ទីរតេជោសន្តិភាពខេត្តសៀមរាប នៅថ្ងៃទី១០-១១​ ខែកញ្ញា​ ឆ្នាំ២០២៦...។

លោក ហេង រតនា ថ្លែងថា៖«ក្នុងសង្គ្រាមក្នុងឆ្នាំ២០២៥​ ទាហានថៃបានប្រើប្រាស់គ្រាប់បែកចង្កោមជាគ្រាប់កាំភ្លើងធំប្រភេទ១៥៥មិល្លីម៉ែត្រ​ មានចំនួនប្រមាណ ១២ទៅ១៣ម៉ឺនគ្រាប់ ដែលមានផ្ទុកកូនគ្រាប់ចង្កោមចំនួនប្រមាណ៦ទៅ៧​លានគ្រាប់»។ គ្រាប់បែកចង្កោមដែលថៃ ប្រើប្រាស់ប្រភេទ M42, M46 និងM85 ផលិតនៅប្រទេសអុីស្រាអ៊ែល​ ហើយគ្រាប់បែកចង្កោមនេះ​ ស្ថិតក្រោមការហាមឃាត់ប្រើប្រាស់នៃអនុសញ្ញាគ្រាប់បែកចង្កោមអន្តរជាតិអូស្លូ។ លោកបន្ថែមថា៖« ការបាញ់ប្រហារគ្រាប់បែកចង្កោមរបស់ទាហានថៃនេះ​ មានយុទ្ធសាស្ត្រនិងយុទ្ធវិធីយោធាច្បាស់លាស់ និងមានគោលបំណងបង្កវិនាសកម្មសេដ្ឋកិច្ចសង្គមចំពោះប្រជាពលរដ្ឋខ្មែរ និងប្រទេសកម្ពុជាក្នុងរយៈពេលយូរអង្វែង»។ តាមអង្គភាពស៊ីម៉ាក់ គ្រាប់ទាំងនោះ បានបង្កផលប៉ះពាល់លេីភូមិចំនួន៣៣៥ នៃឃុំចំនួន៦០ ស្ថិតតាមបណ្តោយព្រំដែន ដែលមានផ្ទៃដីរងផលប៉ះពាល់ជាង២៩ម៉ឺនហិកតា ខណៈភូមិចំនួន១៤ និងតំបន់តាមបណ្តោយខ្សែបន្ទាត់ព្រំដែនកម្ពុជា-ថៃ នៅមិនទាន់ការសិក្សាស្រាវជ្រាវបាន ដោយសារបញ្ហាសន្តិសុខ។

និយាយដោយឡែក ក្នុងសិក្ខាសាលាស្តីពី«ផលប៉ះពាល់ដោយសារគ្រាប់បែកចង្កោមពីការឈ្លានពានរបស់ថៃ ក្នុងឆ្នាំ២០២៥ និងដំណើរឆ្ពោះទៅរកការធានាសុវត្ថិភាពដល់តំបន់រងផលប៉ះពាល់» ចូលរួមពីស្ថាប័នជាតិ អន្តរជាតិ ដៃគូអភិវឌ្ឍន៍ និងប្រតិបត្តិករសកម្មភាពមីនជាច្រើន នៅថ្ងៃទី១១កញ្ញា ស៊ីម៉ាក់ បញ្ជាក់ថា តាមការស្រាវជ្រាវបច្ចេកទេស បានរកឃើញសំណល់គ្រាប់បែកចង្កោមប្រភេទ M42, M46 និង M85 ដែលមានកូនគ្រាប់មិនទាន់ផ្ទុះ និងបន្តបង្កហានិភ័យដល់អាយុជីវិតប្រជាពលរដ្ឋ ជាពិសេសកុមារ និងកសិករ ព្រមទាំងរាំងស្ទះដល់ការប្រើប្រាស់ដីធ្លី។ ស៊ីម៉ាក់ បន្ថែមថា ការបញ្ចប់ការប្រយុទ្ធមិនមានន័យថា គ្រោះថ្នាក់ពីសំណល់យុទ្ធភណ្ឌបានបញ្ចប់នោះទេ ហើយការបន្តបោសសម្អាត គឺជាកត្តាសំខាន់សម្រាប់ធានាសុវត្ថិភាព និងការអភិវឌ្ឍនៅតំបន់រងផលប៉ះពាល់៕