ទីក្រុងតៃប៉ិ៖ ការបង្កើនសម្មភាពយោធារបស់មហាយក្សចិន បានធ្វើឱ្យក្រុមអ្នកជំនាញវិស័យការពារជាតិ មានការព្រួយបារម្ភកាន់តែខ្លាំងឡើង អំពីការឈ្លានពានរបស់រដ្ឋាភិបាលរដ្ឋធានីប៉េកាំង ទៅលើកោះតៃវ៉ាន់ ខណៈទស្សនាវដ្ដីរបស់អាម៉េរិកាំង ក៏បានលើកឡើង អំពីអាជ្ញាធរទីក្រុងតៃប៉ិ អាចនឹងខ្វះឆន្ទៈតស៊ូ ប៉ុន្ដែត្រូវបានប្រមុខក្រុមប្រឹក្សាសន្ដិសុខជាតិរបស់ដែនកោះមួយនេះ ច្រានចោល ហើយបានប្រកាសយ៉ាងម៉ឺងម៉ាត់ អំពីគោលជំហររបស់ខ្លួនដាច់ខាត ត្រូវតែទប់ទល់នឹងការឈ្លានពានណាមួយ មកលើដែនកោះរបស់ខ្លួន...។
សារព័ត៌មាន Taiwan News បានចេញផ្សាយនៅព្រឹកថ្ងៃសុក្រទី១១ ខែកញ្ញានេះថា អគ្គលេខាធិការក្រុមប្រឹក្សាសន្ដិសុខជាតិតៃវ៉ាន់ លោក ចូសេហ្វ វូ (Joseph Wu) កាលពីថ្ងៃព្រហស្បតិ៍ បានច្រានច្រោល ចំពោះការលើកឡើងថា កោះតៃវ៉ាន់ខ្វះឆន្ទៈតស៊ូ ប្រឆាំងនឹងការប៉ុនប៉ង ដណ្ដើមកាន់កាប់ដោយប្រទេសចិន មកលើដែនកោះរបស់ខ្លួន។ការធ្វើអត្ថាធិប្បាយរបស់ប្រមុខក្រុមប្រឹក្សាសន្ដិសុខជាតិតៃវ៉ាន់រូបនេះ កើតឡើង ក្រោយពេលទស្សនាវដ្ដីអាម៉េរិកាំង The Atlantic ចេញផ្សាយនូវអត្ថបទមួយមានចំណងជើងថា«តើនឹងដល់ពេលតៃវ៉ាន់ឬ ត្រូវបោះបង់ចោលការតស៊ូ..?» អត្ថបទនោះចោទជាសំណួរអំពីការប្តេជ្ញាចិត្តរបស់មេដឹកនាំកោះតៃវ៉ាន់ នៅក្នុងការប្រឈមមុខនឹងការគំរាមកំហែងផ្នែកនយោបាយ និងយោធាពីមហាយក្សចិន។ អត្ថបទទស្សនាវដ្ដីដដែលនោះ ក៏បានរងការរិះគន់នៅលើបណ្ដាញអ៊ិនធើរណេតផងដែរ រួមទាំងការលើកឡើងថា មានចំណុចមិនត្រឹមត្រូវ និងខ្វះការយល់ដឹងស៊ីជម្រៅព័ត៌មាន អំពីកោះតៃវ៉ាន់ និងចិន។
ជាការឆ្លើយតប អគ្គលេខាធិការក្រុមប្រឹក្សាសន្ដិសុខជាតិតៃវ៉ាន់ បានសរសេរនៅលើបណ្ដាញសង្គម X ថា៖«វាជាកំហុសមួយ នៅក្នុងការសន្និដ្ឋានថា តៃវ៉ាន់ គ្មានឆន្ទៈក្នុងការការពារខ្លួន។ បើផ្អែកតាមការបង្កើនការវិនិយោគលើវិស័យយោធា ការបំពាក់ឧបករណ៍យោធាកាន់តែប្រសើរឡើង ការហ្វឹកហាត់កាន់តែតឹងរ៉ឹង និងការធ្វើសមយុទ្ធផ្ដោតលើស្ថានភាពជាក់ស្តែងនោះ កំពុងបង្ហាញយ៉ាងច្បាស់ ថា តៃវ៉ាន់ មានឆន្ទៈការពារខ្លួនកាន់តែរឹងមាំ និងខ្លាំងក្លាជាងពេលណាៗទាំងអស់»។ អគ្គលេខាធិការ ក្រុមប្រឹក្សាសន្ដិសុខជាតិតៃវ៉ាន់ លោក ចូសេហ្វ វូ បានសង្កត់ធ្ងន់ថា៖«តៃវ៉ាន់ នឹងមិនបោះបង់ចោលខ្លួនឯងឡើយ ហើយការចុះចាញ់មិនមែនជាជម្រើសនោះទេ»។ នេះបើតាមការចុះផ្សាយរបស់សារព័ត៌មាន CTS News។
បើតាមស្ទង់មតិរយៈពេលវែងមួយរបស់វិទ្យាស្ថានស្រាវជ្រាវវិស័យការពារជាតិ និងសន្តិសុខ (Institute for National Defense and Security Research) បានឱ្យដឹងថា នៅក្នុងការស្ទង់មតិកាលពីខែមីនា ឆ្នាំ២០២៥ បានឱ្យដឹងថា អ្នកឆ្លើយតបចំនួន៤១ភាគរយ និយាយថា ពួកគេ«មានឆន្ទៈខ្ពស់»ក្នុងការប្រយុទ្ធ ដើម្បីការពារកោះតៃវ៉ាន់ ហើយ២៥ភាគរយ និយាយថា ពួកគេ«មានឆន្ទៈខ្លះៗ»ដែលសរុបទៅមានចំនួន៦៦ភាគរយ។ ស្របគ្នានេះ សារព័ត៌មាន CTS News ក៏បានរាយការណ៍ផងដែរថា បើតាមការស្ទង់មតិចំនួន៧លើក ចាប់តាំងពីឆ្នាំ២០២១មក សមាមាត្រនៃប្រជាជនដែលមាន«ឆន្ទៈ» ក្នុងការការពារកោះតៃវ៉ាន់ គឺស្ថិតនៅកម្រិតប្រហែល៧០ភាគរយ ទោះបីជាមានការកើនឡើងនូវការគំរាមកំហែងផ្នែកយោធាពីប្រទេសចិន និងការផ្លាស់ប្ដូរនៅក្នុងឆាកនយោបាយរបស់សហរដ្ឋអាម៉េរិកយ៉ាងណាក៏ដោយ។
ការលើកឡើងរបស់ប្រមុខក្រុមប្រឹក្សាសន្ដិសុខជាតិតៃវ៉ាន់ កើតឡើង បន្ទាប់ពីកោះតៃវ៉ាន់ បានរៀបចំកិច្ចសន្ទនាសន្តិសុខទីក្រុងតៃប៉ិ (Taipei Security Dialogue) កាលពីថ្ងៃពុធ។ ព្រឹត្ដិការណ៍ប្រចាំឆ្នាំ ដែលប្រមូលផ្តុំដោយក្រុមអ្នកជំនាញផ្នែកការពារជាតិ និងសន្តិសុខនេះ បានផ្តោតការយកចិត្តទុកដាក់ នៅឆ្នាំ២០២៦នេះ ទៅលើបញ្ហាសន្តិសុខក្នុងតំបន់ ការទប់ស្កាត់ការគំរាមកំហែង បច្ចេកវិទ្យាដែលកំពុងលេចឡើងថ្មីៗ និងភាពធន់ ប្រឆាំងនឹងការគំរាមកំហែងក្នុងកម្រិត«តំបន់ពណ៌ប្រផេះ» (gray-zone threats)៕
