រាជធានីភ្នំពេញ៖ ត្មាត ជាសត្វមិនសម្លាប់សត្វដទៃធ្វើជាអាហារទេ ពួកវាស៊ីសាកសពស្អុយរលួយដែលងាប់ក្នុងព្រៃ និងក្បែរសហគមន៍ ដែលអាចជួយកាត់បន្ថយការរីករាលដាលនៃជំងឺឆ្លងនានា និងជួយបង្កើនជីវភាពសហគមន៍តាមរយៈអេកូទេសចរណ៍។ សត្វត្មាត មិនកាចសាហាវឡើយ ផ្ទុយទៅវិញវាជាសត្វមានអត្តចរិតស្លូត និងតែងរស់នៅហើយស៊ីចំណីជុំគ្នាជាក្រុម និងចូលចិត្តរស់នៅដោយស្ងប់ស្ងាត់ ក្នុងព្រៃឆ្ងាយដាច់ស្រយាល...។
អង្គការសមាគមអភិរក្សសត្វព្រៃ ហៅកាត់ WCS បានឱ្យដឹងថា សត្វនេះ មានបីប្រភេទគឺ ត្មាតភ្លើង ត្មាតពណ៌ប្រផេះ និងត្មាតត្នោត។ សត្វត្មាតទាំងបីប្រភេទនេះ ជាប្រភេទសត្វទទួលរងគ្រោះ ជិតផុតពូជបំផុតក្នុងសកលលោក។ សត្វត្មាត មានសារធាតុអាស៊ីតខ្លាំងក្នុងក្រពះរបស់វា ដែលអាចកម្ចាត់មេរោគកាចសាហាវបាន។ លក្ខណៈពិសេសពីធម្មជាតិនេះ អាចធ្វើឱ្យសត្វត្មាតជួយទប់ស្កាត់ការឆ្លងរាលដាលជំងឺពីសត្វទៅមនុស្ស។ សត្វត្មាត អាចស៊ីសាកសពសត្វអស់យ៉ាងលឿន ដែលអាចកម្ចាត់មេរោគចម្លងជំងឺបានទាន់ពេល និងកាត់បន្ថយហានិភ័យនៃការឆ្លងជំងឺរាតត្បាតដូចជា ជំងឺឆ្កែឆ្កួត ។ល។ តាមរយៈការសម្អាតសាកសពសត្វស្អុយរលួយឱ្យអស់ពីព្រៃ សត្វត្មាតជួយរក្សាប្រភពទឹក និងប្រព័ន្ធអេកូឡូស៊ី ឱ្យស្អាត និងមានសុខភាព។ នៅក្នុងពិភពសត្វព្រៃត្មាត ត្រូវបានគេទទួលស្គាល់ថា ជាសត្វគំរូ ដែលញី និងឈ្មោល ចេះចែករំលែកតួនាទីក្នុងការចិញ្ចឹមបីបាច់កូនស្មើៗគ្នា។ ពួកវា ក៏ជាប្រភេទសត្វជ្រើសរើសដៃគូតែមួយសម្រាប់ជីវិតផងដែរ។
សត្វត្មាតញី និងឈ្មោល បានចែករំលែកការទទួលខុសត្រូវ និងដូរវេនគ្នាក្រាបពង ដែលបង្ហាញពីការងារ និងការយកចិត្តទុកដាក់មើលថែពូជពង្ស បានយ៉ាងល្អ។ មិនថាស្ថិតនៅក្នុងព្រៃ ឬនៅក្នុងទីកន្លែងណានោះទេ ត្មាតញី និងឈ្មោល តែងចូលរួមដោយស្មើភាពគ្នា ក្នុងការចិញ្ចឹមកូន បង្ហាញពីតុល្យភាពដ៏គួរឱ្យកត់សម្គាល់ នៅក្នុងតួនាទីរបស់ពួកវា។ លើសពីនេះ ការប្តេជ្ញាចិត្តរបស់ត្មាតញី និងឈ្មោល ក្នុងការចិញ្ចឹមកូន បានបង្ហាញពីគំរូសមភាពយេនឌ័រ ដ៏គួរឱ្យស្ញប់ស្ញែងនៅក្នុងជីវិតធម្មជាតិ។ ដូច្នេះ បើលោកអ្នកបានឃើញសត្វត្មាត នៅថ្ងៃណាមួយ សូមចងចាំថា សត្វដ៏អស្ចារ្យនេះ មិនគ្រាន់តែជាសត្វដែលជួយសម្អាតបរិស្ថានប៉ុណ្ណោះទេ ប៉ុន្តែពួកវាក៏ជាគំរូល្អក្នុងតួនាទីជាឪពុកម្តាយ និងសមភាពយេនឌ័រផងដែរ៕
