រាជធានីរីយ៉ាដ៖ កងកម្លាំងរបស់ប្រទេសអារ៉ាប៊ីសាអូឌីត បានវាយប្រហារសងសឹកគ្នាទៅវិញទៅមក ជាមួយក្រុមឧទ្ទាមហ៊ូទី គាំទ្រដោយរដ្ឋាភិបាលទីក្រុងតេហ៊ីរ៉ង់ ដែលកំពុងតែបង្កើនភាពតានតឹងបន្ថែមពីលើជម្លោះ រវាងសហរដ្ឋអាម៉េរិក និងអ៊ីរ៉ង់ ហើយវាបង្កឱ្យប៉ះពាល់យ៉ាងខ្លាំងដល់ការដឹកជញ្ជូនពាណិជ្ជកម្មតាមច្រកសមុទ្ទ Bab el-Mandeb Strait (បាបអាល់ម៉ាន់ដាប) និងច្រកសមុទ្ទហ័រមូស។
សារព័ត៌មានរបស់កូរ៉េខាងត្បូង The Chosun Daily បានចេញផ្សាយនៅព្រឹក ថ្ងៃពុធទី៩ ខែកញ្ញានេះថា ជម្លោះប្រដាប់អាវុធ រវាងកងកម្លាំងយោធារបស់ប្រទេសអារ៉ាប៊ីសាអូឌីត និងក្រុមឧទ្ទាមហ៊ូទី (Houthi) ដែលគាំទ្រដោយអ៊ីរ៉ង់ នៅក្នុងប្រទេសយេម៉ែន បានកើនឡើងខ្លាំង រហូតឈានដល់កម្រិតស្ទើរតែក្លាយទៅជាសង្គ្រាមយ៉ាងពេញទំហឹង នៅជុំវិញច្រកសមុទ្ទ Bab el-Mandeb ជាផ្លូវទឹកយុទ្ធសាស្ត្រដ៏សំខាន់ នៅត្រង់ច្រកចូល នៃសមុទ្ទក្រហម ខណៈច្រកសមុទ្រហ័រមូស (Hormuz) នៅតែស្ថិតក្នុងស្ថានភាពបិទខ្ទប់ ដោយសារតែភាពតានតឹង រវាងសហរដ្ឋអាម៉េរិក និងអ៊ីរ៉ង់។ ការវាយប្រយុទ្ធគ្នាសងសឹកគ្នា កំពុងតែបន្ដកើនឡើងយ៉ាងខ្លាំង នៅច្រកសមុទ្ទ Bab el-Mandeb ដែលជាផ្លូវទឹកដ៏សំខាន់បំផុតមួយ សម្រាប់ការនាំចេញប្រេងរបស់អារ៉ាប៊ីសាអូឌីត។
បើតាមសេចក្ដីរាយការណ៍នានា បានឱ្យដឹងថា ការប៉ះទង្គិចគ្នានេះ ត្រូវបានគេប៉ាន់ប្រមាណថា មនុស្សជាង៥០០នាក់បានស្លាប់ និងប្រហែល២០០០០នាក់ទៀត បានរត់ភៀសខ្លួនចេញពីលំនៅឋានរបស់ពួកគេ។ បើតាមទីភ្នាក់ងារសារព័ត៌មានល្បីៗរបស់ពិភពលោក រួមមាន៖ Reuters, AFP…ជាដើម បានរាយការណ៍ កាលពីថ្ងៃទី៨ ខែកញ្ញា(វេលាក្នុងតំបន់)ថា ក្រុមឧទ្ទាមហ៊ូទី បានកំណត់គោលដៅវាយប្រហារដោយដ្រូន និងមីស៊ីល ទៅលើទីក្រុងនានា នៅភាគខាងត្បូងរបស់ប្រទេសអារ៉ាប៊ីសាអូឌីត រួមមាន ទីក្រុងខាមីស មូសៃត៍ (Khamis Mushait), ទីក្រុងអាប់ហា (Abha), ទីក្រុងណាចរ៉ាន (Najran) និងទីក្រុងជីហ្សាន់ (Jizan)។ អ្វីដែលកាន់តែក្ដៅខ្លាំងឡើងបន្ថែមទៀតនោះ ក្រុមឧទ្ទាមគាំទ្រដោយប្រទេសអ៊ីរ៉ង់មួយនេះ បានបង្កើនការវាយប្រហារទៅលើទីតាំងសំខាន់ៗរបស់ប្រទេសអារ៉ាប៊ីសាអូឌីត មានដួចជា៖ មូលដ្ឋានកងទ័ពអាកាស, ក្រុមហ៊ុនចម្រាញ់ប្រេងដ៏ធំបំផុតអារ៉ាមកូ (Aramco) និងរោងចក្រជាច្រើនទៀត។
អាជ្ញាធរអារ៉ាប៊ីសាអូឌីត បានអះអាងថា កាវាយប្រហាររបស់ពួកឧទ្ទាមហ៊ូទី បានសម្លាប់មនុស្សយ៉ាងតិច ចំនួន៧៣នាក់ ដោយរាប់បញ្ចូលទាំងស្ត្រី និងកុមារផងដែរ។ នេះជាការវាយប្រហារទ្រង់ទ្រាយធំបំផុតទៅលើទឹកដីអារ៉ាប៊ីសាអូឌីត ចាប់តាំងពីជម្លោះ រវាងសហរដ្ឋអាម៉េរិក និងអ៊ីរ៉ង់ បានផ្ទុះឡើង កាលពីខែចុងកុម្ភៈរហូតមក។ បើតាមរូបភាពពីផ្កាយរណបរបស់អង្គការ NASA បានបង្ហាញពីផ្សែងខ្មៅក្រាស់ៗ ហុយចេញពីរោងចក្រចម្រាញ់ប្រេងជីហ្សាន (Jizan) និងមជ្ឈមណ្ឌលចែកចាយប្រេងអាប់ហា (Abha)។ ស្របគ្នានេះដែរ លោក ទួរគី អាល់-ម៉ាលគី (Turki al-Malki) អ្នកនាំពាក្យ ក្រុមសម្ព័ន្ធមិត្ត ដឹកនាំដោយអារ៉ាប៊ីសាអូឌីត បានបញ្ជាក់ថា៖ «យើងនឹងឆ្លើយតបយ៉ាងម៉ឺងម៉ាត់ ដើម្បីទប់ស្កាត់ក្រុមឧទ្ទាមភេរវករ»។ យន្តហោះចម្បាំងរបស់អារ៉ាប៊ីសាអូឌីត បានវាយប្រហារតាមផ្លូវអាកាស ដើម្បីសងសឹកវិញ ទៅលើទីក្រុងសាណា (Sana’a) ជារដ្ឋធានីរបស់ប្រទេសយេម៉ែន ដែលស្ថិតក្រោមការគ្រប់គ្រងរបស់ក្រុមឧទ្ទាមហ៊ូទី និងតំបន់តៃហ្ស៍ (Taiz) នៅភាគនិរតី៕
