ទីក្រុងតៃប៉ិ៖ ជាមួយនឹងស្ថានការណ៍ភូមិសាស្ត្រនយោបាយ កំពុងតែប្រកួតប្រជែង រវាងប្រទេសមហាអំណាចនានា និងភាពមិនប្រាកដប្រជាខាងសន្ដិសុខរបស់ពិភពលោក ក្រុមអ្នកជំនាញវិទ្យាសាស្រ្តនយោបាយ និងសង្គ្រាមនៅអាស៊ីបូព៌ា បានព្រមានដល់រដ្ឋបាលកោះតៃវ៉ាន់ ត្រូវមានវិធានការបន្ទាន់លើវិស័យការពារជាតិរបស់ខ្លួន...។
សារព័ត៌មាន Taiwan News បានចេញផ្សាយនៅព្រឹកថ្ងៃពុធទី៩ ខែកញ្ញានេះថា លោកស្រី អូរៀនណា ស្គីឡា ម៉ាស្ដ្រូ (Oriana Skylar Mastro) វរសេនីយ៍ទោនៅក្នុងកងកម្លាំងបម្រុងនៃកងទ័ពអាកាសសហរដ្ឋអាម៉េរិក, ជាអ្នកវិទ្យាសាស្រ្តនយោបាយ និងអ្នកស្រាវជ្រាវនៃវិទ្យាស្ថានសិក្សាអន្ដរជាតិ Freeman Spogli (ហ្វ្រីម៉ែន ស្ប៉ក់គ្លី) នៃសាកលវិទ្យាល័យ Stanford (ស្ដែនហ្វដ) ស្ថិតក្នុងរដ្ឋកាលីហ្វ័រញ៉ា សហរដ្ឋអាម៉េរិក និងលោក អាឡេសស្យ៉ូ ប៉ាតាឡាណូ (Alessio Patalano) សាស្ត្រាចារ្យផ្នែកសង្គ្រាម និងយុទ្ធសាស្ត្រនៅអាស៊ីបូព៌ា នៃមហាវិទ្យាល័យ King’s College (ឃីងស៍ ខលឡេច) ស្ថិតក្នុងរាជធានីឡុងដ៍ ចក្រភពប្រ៊ីតថេន បានលើកឡើងកាលពីថ្ងៃអង្គារទី០៨កញ្ញាថា កោះតៃវ៉ាន់ ត្រូវតែមានភាពចាំបាច់ផ្តល់អាទិភាពលើសន្តិសុខជាតិ និងពង្រឹងសមត្ថភាពធ្វើសង្គ្រាមបែបអសមមាត្រ (asymmetric warfare)។
អ្នកជំនាញជាន់ខ្ពស់ទាំង២រូបនេះ បានផ្តល់អនុសាសន៍ អំពីយុទ្ធសាស្ត្រដែលតៃវ៉ាន់អាចពង្រឹងសមត្ថភាពការពារខ្លួនឱ្យកាន់តែល្អប្រសើរឡើង ប្រឆាំងនឹងការឈ្លានពានពីសំណាក់ប្រទេសចិន។ ការផ្ដល់អនុសាសន៍បែបនេះ ធ្វើឡើងនៅក្នុងកិច្ចពិភាក្សាមួយរបស់ក្លឹបអ្នកសារព័ត៌មានបរទេស ប្រចាំនៅកោះតៃវ៉ាន់ កាលពីថ្ងៃអង្គារ។ លោកស្រី អូរៀនណា ស្គីឡា ម៉ាស្ដ្រូ បានបញ្ជាក់ថា៖«អ្នកមិនអាចយកចិត្តទុកដាក់យ៉ាងពិតប្រាកដតែចំពោះវិស័យការពារជាតិ ដោយមិនមានការចូលរួមពីសង្គមទាំងមូលនោះទេ ប្រសិនបើការជ្រើសរើសទាហានរបស់អ្នក មានតែបុរសនោះ។ វាជារឿងមិនល្អនោះឡើយ ព្រោះពលរដ្ឋប្រហែលពាក់កណ្តាល នៃចំនួនប្រជាជនសរុប មិនមានលទ្ធភាពពេញលេញ នៅក្នុងការការពារខ្លួនឯង»។
កោះតៃវ៉ាន់ កាលពីដើមឆ្នាំ២០២៤ បានចាប់ផ្ដើមអនុវត្ដកាតព្វកិច្ចយោធា រយៈពេលមួយឆ្នាំ សម្រាប់តែបុរសទាំងអស់ ដែលបានកើតនៅក្នុងអំឡុងឆ្នាំ២០០៥ ឬក្រោយពីឆ្នាំនេះ។ បន្ថែមពីលើនេះ លោកស្រី ម៉ាស្ដ្រូ បានជំរុញឱ្យមេដឹកនាំកោះតៃវ៉ាន់ ចាប់ផ្តើមជ្រើសរើសស្ត្រីឱ្យចូលបម្រើនៅក្នុងជួរកងទ័ព ដើម្បីលើកកម្ពស់ដល់វិស័យការពារជាតិ ដែលមានការចូលរួមពីសង្គមទាំងមូល។ អ្នកជំនាញរូបនេះ ក៏បានស្នើឱ្យមេដឹកនាំកោះតៃវ៉ាន់ រៀនសូត្រពីយុទ្ធសាស្ត្ររបស់ប្រទេសអ៊ីស្រាអែល និង[ត្រូវ]«បណ្ដុះបណ្ដាលមនុស្សគ្រប់រូបឱ្យចេះតស៊ូ និងប្រយុទ្ធយ៉ាងពិតប្រាកដ»។
ជាមួយគ្នានេះដែរ លោកស្រី ម៉ាស្រ្ដូ ក៏បានជំរុញឱ្យមេដឹកនាំកោះតៃវ៉ាន់ បន្តបង្កើនការចំណាយលើវិស័យការពារជាតិ និងវិនិយោគលើសមត្ថភាពយោធាបែបមិនសមមាត្រផងដែរ។ លោកស្រីបានកត់សម្គាល់ថា យោធាបានចាប់ផ្តើមអនុវត្តវិធានការទាំងនេះហើយ ប៉ុន្តែ«ចាំបាច់ត្រូវមានភាពស្មោះត្រង់ជាងនេះបន្តិច អំពីគុណភាពនៃសមត្ថភាពដែលកំពុងតែត្រូវអភិវឌ្ឍ»។ មេដឹកនាំកោះតៃវ៉ាន់ បានស្នើកញ្ចប់ថវិកា សម្រាប់វិស័យការពារជាតិចំនួន១,១២២៥ពាន់ពាន់លានដុល្លារតៃវ៉ាន់ ឬស្មើនឹង៣៥,៣ពាន់លានដុល្លារអាម៉េរិក សម្រាប់ឆ្នាំសារពើពន្ធ២០២៧ ដែលអ្នកជំនាញរូបនេះ កត់សម្គាល់ថា វាមានទំហំប្រហែល២៩ភាគរយនៃថវិកាចំណាយសរុប៣,៩៣ពាន់ពាន់លានដុល្លារតៃវ៉ាន់ ដែលត្រូវបានអនុម័ត ដោយរដ្ឋបាលកណ្តាល។
អ្នកជំនាញវិទ្យាសាស្រ្តនយោបាយ និងយោធារបស់សហរដ្ឋអាម៉េរិករូបនេះ បន្ថែមថា កោះតៃវ៉ាន់ ត្រូវតែសម្រេចចិត្ត ថាតើអ្វីជាអាទិភាពរបស់ខ្លួន? អ្វីៗទាំងអស់ត្រូវតែផ្តោតលើការការពារ សមត្ថភាពទប់ទល់ និងសន្តិសុខរបស់កោះតៃវ៉ាន់។ នោះមានន័យថា មេដឹកនាំកោះតៃវ៉ាន់ ត្រូវតែសម្រេចចិត្តដ៏លំបាក និងលះបង់មួយចំនួន។ ទន្ទឹមគ្នានេះដែរ លោកស្រី ក៏បានកត់សម្គាល់ផងដែរថា គណបក្សប្រឆាំងរបស់កោះតៃវ៉ាន់ «គួមីនតាំង (KMT)» នៅតែរក្សាទំនាក់ទំនងយ៉ាងជិតស្និទ្ធ ជាមួយបក្សកុម្មុយនីស្ដចិន ដែលជាហានិភ័យមួយសម្រាប់តៃវ៉ាន់ទាំងមូល។ ស្របគ្នានេះ លោក អេឡេសស៊ីយ៉ូ ផាថាឡាណូ សាស្ត្រាចារ្យផ្នែកសង្គ្រាម និងយុទ្ធសាស្ត្រនៅអាស៊ីបូព៌ា បានសង្កត់ធ្ងន់ថា មេដឹកនាំតៃវ៉ាន់ គួរតែ«វិនិយោគយ៉ាងខ្លាំងក្លាបំផុត លើសមត្ថភាពប្រតិបត្តិការ នៅក្នុងដែនទឹកជ្រៅ»។ វាជាទីតាំងតែមួយគត់ដែលគេអាចបង្កើតតំបន់កម្ទេចសត្រូវយ៉ាងមានប្រសិទ្ធភាពបំផុត ហើយនេះជាគុណសម្បត្តិមួយសម្រាប់យោធាកោះតៃវ៉ាន់។
បើតាម Radio Taiwan International បានឱ្យដឹងថា មេដឹកនាំកោះតៃវ៉ាន់កំពុងអភិវឌ្ឍនាវាដ្រូន សម្រាប់ប្រតិបត្តិការនៅក្រោមទឹកមួយ ឈ្មោះ«Huilong (ហ៊ុយឡុង)»។ នេះជាគម្រោងរួមគ្នា រវាងវិទ្យាស្ថានបច្ចេកវិទ្យាជាតិចុងសាន (National Chung Shan Institute of Technology) និងក្រុមហ៊ុនសាងសង់នាវាតៃវ៉ាន់ Lungteh Shipbuilding (លុងតិច ស៊ីបប៊ីលឌីង) ហើយនាវានេះ បានឆ្លងកាត់ការសាកល្បងនៅក្នុងសមុទ្ទរួចមកហើយ កាលពីឆ្នាំ២០២៤៕
