រាជធានីបាងកក៖ មានផ្នូរជនជាតិជ្វីស (ឬអ៊ីស្រាអែល?) ចំនួន៣ ក្នុងតំបន់កប់ខ្មោចមួយកន្លែង នៅស្រុកបាងខ្លា (บางคล้า) ខេត្តស្ទឹងជ្រៅ (ฉะเชิงเทรา) ត្រូវអាជ្ញាធរថៃបញ្ជាឱ្យគាស់យកសាកសពទៅបញ្ចុះនៅកន្លែងផ្សេងវិញ ដោយសំអាងថា សាកសពទាំង៣នោះ ត្រូវបានបញ្ចុះដោយគ្មានអាជ្ញាបណ្ណ ឬការអនុញ្ញាតត្រឹមត្រូវ។ នេះបើតាមការប្រកាសរបស់លោក ភលភី សុវណ្ណឆវី (พลพีร์ สุวรรณฉวี) អនុរដ្ឋមន្ត្រីមហាផ្ទៃថៃ នៅថ្ងៃទី៧ ខែកញ្ញា ឆ្នាំ២០២៦ ហើយត្រូវបានចុះផ្សាយដោយកាសែតបាងកកប៉ុស្តិ៍។
ទីបញ្ចុះសពខាងលើ មានទំហញ៩,៦ពាន់ម៉ែត្រការ៉េ ហើយជាទីបញ្ចុះសពសម្រាប់សហគមន៍ជនជាតិជ្វីសក្នុងស្រុកបាងខ្លា នៃខេត្តស្ទឹងជ្រៅ ប្រទេសថៃ។ លោក ភលភី សុវណ្ណឆវី និយាយថា ទីបញ្ចុះសពនេះ ទទួលអាជ្ញាបណ្ណរយៈពេល៣ឆ្នាំ កាលពីឆ្នាំ២០២១ ហើយត្រូវផុតកំណត់ត្រឹមឆ្នាំ២០២៣។ អាជ្ញាធរថៃ បានច្រានចោលសំណើសុំបន្តអាជ្ញាបណ្ណសម្រាប់ទីបញ្ចុះសពនេះ ព្រោះធ្លាប់បំពានគោលការណ៍ច្បាប់។ ចំពោះសាកសពទាំង៣ ត្រូវអាជ្ញាធរថៃរកឃើញថា បានបញ្ចុះនៅទីនេះ ក្រោយឆ្នាំ២០២៣ ដែលជាពេលវេលាផុតសុពលភាពអាជ្ញាបណ្ណទៅហើយ។
ដំណាក់កាលនេះ អាជ្ញាធរថៃ កំពុងស្វែងរកទីបញ្ចុះសពផ្សេងទៀត ដែលស្ថិតនៅក្នុងរាជធានីបាងកក ដើម្បីកប់សពជនជាតិជ្វីសទាំង៣។ ទោះយ៉ាងណា សពជនជាតិជ្វីសទាំង៣ មិនទាន់ត្រូវបានចាប់ផ្តើមគាស់នោះទេ ហើយទីតាំងថ្មីសម្រាប់បញ្ចុះ ក្នុងរាជធានីបាងកក ក៏រកមិនទាន់ឃើញជាផ្លូវការដែរ។ ករណីនេះ ហាក់ដូចជាមិនមែនតូចតាចឡើយ ដោយមានសកម្មជនថៃខ្លះ មិនពេញចិត្តចំពោះការចេញអាជ្ញាបណ្ណដល់ទីបញ្ចុះសពសម្រាប់សហគមន៍ជនជាតិជ្វីស ក្នុងស្រុកបាងខ្លាខាងលើ ដូច្នេះ ក៏ស្នើទៅគណៈកម្មការប្រឆាំងអំពើពុករលួយ ដើម្បីបើកការស៊ើបអង្កេតលើការផ្ដល់អាជ្ញាប័ណ្ណនេះ។
សកម្មជនថៃ លើកឡើងថា ច្បាប់ ឬបទប្បញ្ញត្តិ តម្រូវឱ្យទីបញ្ចុះសពត្រូវមានចម្ងាយយ៉ាងតិច៤០០ម៉ែត្រពីផ្លូវទឹក និង៥០ម៉ែត្រ ពីផ្លូវគោក ប៉ុន្តែទីបញ្ចុះសពសម្រាប់សហគមន៍ជនជាតិជ្វីសក្នុងស្រុកបាងខ្លា មានចម្ងាយពីផ្លូវតែ៣ទៅ៩ម៉ែត្រប៉ុណ្ណោះ។ មកដល់ពេលនេះ មិនទាន់ឃើញសហគមន៍ជនជាតិជ្វីស ចេញមកតវ៉ា ឬស្នើសុំរកដំណោះស្រាយនោះទេ ខណៈស្ថានទូតអ៊ីស្រាអែល ក៏មិនទាន់ប្រតិកម្មអ្វីដែរ៕
