រដ្ឋធានីវ៉ាស៊ីនតោន៖ ថ្វីដ្បិតរដ្ឋាភិបាលរដ្ឋធានីវ៉ាស៊ីនតោន មិនទំនាក់ទំនងការទូតជាផ្លូវការជាមួយទីក្រុងតៃប៉ិ យ៉ាងណាក្ដី ប៉ុន្ដែសហរដ្ឋអាម៉េរិក បានប្រកាសយ៉ាងដាច់អហង្កា ចំពោះការផ្លាស់ប្ដូរស្ថានការណ៍បច្ចុប្បន្ន នៅច្រកសមុទ្ទតៃវ៉ាន់ និងតំបន់ជុំវិញ ហើយថែមទាំងផ្ដល់គ្រឿងសព្វាវុធទំនើបៗ ទៅឱ្យមេដឹកនាំដែនកោះមួយនេះទៀតផង ធ្វើឱ្យមហាយក្សចិន បង្ហាញការព្រួយបារម្ភ អំពីសកម្មភាពរបស់ប្រទេសអមិត្ត ដែលជាមហាអំណាចកំពូលទាំងសេដ្ឋកិច្ច និងយោធាមួយនេះជាយ៉ាងខ្លាំង...។
សារព័ត៌មាន Taiwan News បានចេញផ្សាយនៅរសៀលថ្ងៃចន្ទទី៧ ខែកញ្ញានេះថា លោក អ៊ាន អ៊ីស្ដុន (Ian Easton) សាស្ត្រាចារ្យរងនៃវិទ្យាស្ថានសិក្សាដែនសមុទ្ទចិន (CMSI) នៃកងទ័ពជើងទឹកសហរដ្ឋអាម៉េរិក បានលើកឡើងនៅក្នុងរបាយការណ៍មួយ ថា រដ្ឋាភិបាលរដ្ឋធានីប៉េកាំង មានការព្រួយបារម្ភ អំពីយុទ្ធសាស្ត្រប្រើប្រាស់ហ្វូងយន្តហោះគ្មានមនុស្សបើក ឬដ្រូនដ៏កំណាចរបស់សហរដ្ឋអាម៉េរិក ដែលគេហៅថា «ឋាននរក» សម្រាប់ការពារកោះតៃវ៉ាន់ នៅក្នុងករណីមានការឈ្លានពាន ប៉ុន្តែគេជឿថា យុទ្ធសាស្ត្រនេះ នៅតែមិនទាន់ក្លាយជាការពិតនៅឡើយទេ។
អ្នកជំនាញរូបនេះ បញ្ជាក់បន្ថែមថា បញ្ជាការដ្ឋានប្រចាំនៅតំបន់ប៉ាស៊ីហ្វិករបស់សហរដ្ឋអាម៉េរិក បានប្រើប្រាស់ពាក្យ«Hellscape»ជាលើកដំបូង ចាប់តាំងពីខែសីហា ឆ្នាំ២០២៣រហូតមក ដើម្បីពណ៌នាអំពីទម្រង់ជម្លោះដែលអាចនឹងកើតឡើងនៅច្រកសមុទ្ទតៃវ៉ាន់ នាពេលអនាគត។ ទន្ទឹមគ្នានេះ បញ្ជាការដ្ឋានកងទ័ពជើងទឹកសហរដ្ឋអាម៉េរិក ដដែល ក៏បានប្រកាសអំពីគំនិតផ្តួចផ្តើម«Replicator» ដែលមានគោលបំណងដាក់ពង្រាយហ្វូងយន្តហោះគ្មានមនុស្សបើក ឬដ្រូនរាប់ពាន់គ្រឿងយ៉ាងឆាប់រហ័ស ដើម្បីអាចបង្កើតយុទ្ធសាស្ត្រដ៏គួរឱ្យភ័យខ្លាចនេះ ក្លាយជាការពិត។
បើតាមរបាយការណ៍មួយ ចុះថ្ងៃទី១០ ខែមិថុនា ឆ្នាំ២០២៤ មេបញ្ជាការតំបន់ឥណ្ឌូ-ប៉ាស៊ីហ្វិក (PACOM) លោកឧត្តមនាវីឯក សាំយូអែល ប៉ាប៉ារ៉ូ (Samuel Paparo) បានពិពណ៌នាអំពីយុទ្ធសាស្ត្រ«ឋាននរក ឬhellscape strategy» ថា ជាការប្រើប្រាស់ហ្វូងអាវុធគ្មានមនុស្សបើកយ៉ាងច្រើនសន្ធឹកសន្ធាប់ សម្រាប់វាយប្រហារកម្ទេចកងកម្លាំងរំដោះប្រជាជនចិន។ មេបញ្ជាការប្រចាំតំបន់ឥណ្ឌូ-ប៉ាស៊ីហ្វិក រូបនេះ បញ្ជាក់ថា៖«ខ្ញុំចង់ប្រែក្លាយច្រកសមុទ្ទតៃវ៉ាន់ ទៅជាតំបន់ឋាននរក ពោរពេញដោយហ្វូងអាវុធដ្រូន ដោយប្រើប្រាស់សមត្ថភាពសម្ងាត់មួយចំនួន ដើម្បីធ្វើឱ្យជីវិតរបស់ពួកគេ ប្រឈមនឹងការលំបាកយ៉ាងវេទនាបំផុត ត្រឹមតែរយៈពេលមួយខែ។ ហ្វូងដ្រូនទាំងនោះ នឹងផ្តល់ពេលវេលាគ្រប់គ្រាន់ សម្រាប់ខ្ញុំ នៅក្នុងការអនុវត្តផែនការផ្សេងៗទៀត»។
ដោយឡែក លោកវរសេនីយ៍ អ៊ូ ចៀន (Wu Qian) អ្នកនាំពាក្យក្រសួងការពារជាតិចិន បានបញ្ជាក់ថា៖«កងទ័ពអាម៉េរិកាំងមួយចំនួន» ចង់ប្រើប្រាស់កោះតៃវ៉ាន់ ដើម្បីទប់ទល់ចិន និងបញ្ជូនហ្វូងយន្តហោះគ្មានមនុស្សបើក ឬដ្រូនយ៉ាងច្រើនសន្ធឹកសន្ធាប់ ចូលទៅក្នុងច្រកសមុទ្ទតៃវ៉ាន់ ដោយលោកបានហៅសកម្មភាពទាំងនោះថា ជា«ការឆ្កួតលីលាបំផុត»។ ប៉ុន្ដែនៅទីបំផុត សហរដ្ឋអាម៉េរិក អាចនឹងបោះបង់ចោលកោះតៃវ៉ាន់។បើតាមលោក អ៊ីស្ដុន បានឱ្យដឹងថា លោក រ៉ែន ហ្គួចេង (Ren Guozheng) មន្រ្ដីជំនាញផ្នែកកិច្ចការកោះតៃវ៉ាន់ នៃវិទ្យាស្ថានវិទ្យាសាស្ត្រយោធារបស់កងទ័ពរំដោះប្រជាជនចិន (PLA) បានសរសេរថា យុទ្ធសាស្ត្រ«ឋាននរក» គឺការប្រែក្លាយសមរភូមិទៅជាឋាននរក ហើយវាជាផ្នែកមួយនៃសង្គ្រាមតាមយល់ឃើញរបស់សហរដ្ឋអាម៉េរិក និងកំពុងព្យាយាមបំភិតបំភ័យដល់ប្រទេសចិន តាមរយៈផែនការ និងប្រតិបត្តិការទាំងនោះ។
ទោះបីជាការឃោសនារបស់ចិន ច្រានចោលយុទ្ធសាស្ត្រឋាននរកយ៉ាងណាក៏ដោយ ក៏ក្រុមអ្នកជំនាញយោធាចិនជាច្រើន កំពុងយកចិត្តទុកដាក់ និងគោរពគំនិតជាមូលដ្ឋានរបស់ខ្លួន នៅក្នុងការប្រើប្រាស់យន្តហោះគ្មានមនុស្សបើក ឬដ្រូន ដែលមានតម្លៃថោកជាច្រើន ដោយមើលឃើញថា វាមានសារសំខាន់សម្រាប់សង្គ្រាម នាពេលអនាគត។ បើតាមទស្សនាវដ្តីយោធាចិន បានចាត់ទុកផែនការយុទ្ធសាស្រ្ដឋាននរករបស់សហរដ្ឋអាម៉េរិកថា ជា«ការគំរាមកំហែង» ហើយបានលើកឡើងថា អាវុធឡាស៊ែរបំពាក់នៅលើនាវា អាចជាវិធានការតបតដ៏មានសក្តានុពល ចំពោះហ្វូងនាវាដ្រូន និងយានហោះគ្មានមនុស្សបើក។
មីស៊ីលរបស់មហាយក្សចិន មានដូចជា Hongqi-9 និង Hongqi-16 មានតម្លៃថ្លៃពេក ខណៈការបាញ់អាវុធឡាស៊ែរ ប្រភេទ Solid-state ម្ដងៗ មានតម្លៃត្រឹមតែប៉ុន្មានពាន់យន់ប៉ុណ្ណោះ។ លើសពីនេះទៅទៀត អាវុធឡាស៊ែរ មិនមានកម្រិតកំណត់ ហើយវាមានល្បឿនលឿន និងភាពត្រឹមត្រូវខ្ពស់ជាង។ អាវុធឡាស៊ែរ ក៏អាចកម្ទេចមីស៊ីលប្រឆាំងនឹងនាវា ដែលធន់នឹងការរំខានសញ្ញាអេឡិកត្រូនិក (electronic jamming) បានថែមទៀតផង៕
