រដ្ឋធានីវ៉ាស៊ីនតោន៖ ​យន្តហោះដឹកទំនិញមួយគ្រឿងរបស់ក្រុមហ៊ុនអាកាសចរណ៍ Amazon Air ​បានចុះចតហើយ​ហោះហើរហួសពីផ្លូវរត់ ជ្រុលទៅបុកយានយន្ដ នៅអាកាសយានដ្ឋាន​អន្តរជាតិ Miami (ម៉ៃអាមី) ស្ថិតក្នុងរដ្ឋផ្លរីដា សហរដ្ឋអាម៉េរិក ​បណ្ដាលឱ្យមនុស្ស៥នាក់បាត់បង់ជីវិត និង៥នាក់ទៀតរងរបួសធ្ងន់។ នេះបើតាមបណ្ដាញទូរទស្សន៍របស់ចក្រភពអង់គ្លេស BBC ចេញផ្សាយនៅព្រឹកថ្ងៃចន្ទទី៧ ខែកញ្ញា...។

យន្តហោះដឹកទំនិញ ប្រភេទ Boeing 767-300 មួយគ្រឿងនេះ បានចុះចតនៅវេលាជិត​​ម៉ោង២រសៀល (ម៉ោងក្នុងតំបន់​ ឬម៉ោង៧យប់​ម៉ោងសកល) បន្ទាប់ពីបានហោះចេញពីអាកាសយានដ្ឋាន​អន្តរជាតិល្វីសមូញ៉ូស ម៉ារីន (Luis Muñoz Marín) ស្ថិតក្នុងទីក្រុងសានជួន (San Juan) នៃតំបន់ Puerto Rico។ យន្តហោះមួយគ្រឿងនេះ ក៏បានបុកយានយន្តមួយចំនួននៅលើដី​ដែលកំពុងចត និងឈប់នៅក្បែរអាកាសយានដ្ឋាន។ ក្រុមហ៊ុន Amazon បញ្ជាក់ ថា ខ្លួនកំពុងសហការយ៉ាងជិតស្និទ្ធជាមួយអាជ្ញាធរ និងមន្ត្រីមូលដ្ឋាន ដើម្បីឈ្វេងយល់ឱ្យបានច្បាស់លាស់ អំពីហេតុការណ៍ដែលបានកើតឡើង​​។ រាល់ជើងហោះហើរត្រូវបានបញ្ជាឱ្យផ្អាកដំណើរការ ដោយរដ្ឋបាលអាកាសចរណ៍សហព័ន្ធ (FAA) ខណៈ​​ក្រុមពន្លត់អគ្គិភ័យ បានប្រញាប់ប្រញាល់ទៅកាន់កន្លែងកើតហេតុ ដែលមានផ្សែងហុយចេញពីយន្តហោះ។ ហេតុការណ៍យន្តហោះនេះ កើតឡើងនៅចុងសប្តាហ៍នៃថ្ងៃឈប់សម្រាក ដែលជាពេលវេលាដ៏មមាញឹកបំផុតមួយ សម្រាប់ការធ្វើដំណើរប្រចាំឆ្នាំ។

លោកស្រី ដានីញ៉ែលឡា ឡេវីន កាវ៉ា (Daniella Levine Cava) ចៅហ្វាយក្រុង  Miami-Dade បានបញ្ជាក់នៅក្នុងសន្និសីទសារព័ត៌មានមួយ កាលពីល្ងាចថ្ងៃអាទិត្យថា៖«មនុស្សយ៉ាងហោចណាស់៥នាក់ បានបាត់បង់ជីវិត និង​៥នាក់ទៀតបានរងរបួស​។ រីឯ​ក្រុមជួយសង្គ្រោះបានទៅដល់កន្លែងកើតហេតុ ​ត្រឹមតែប៉ុន្មាននាទីប៉ុណ្ណោះ បន្ទាប់ពីយន្តហោះមួយគ្រឿងនេះធ្លាក់ចេញពីផ្លូវរត់របស់ខ្លួន។ រីឯ​ការយកចិត្តទុកដាក់ គឺផ្តោតទៅលើក្រុមគ្រួសារ អ្នករងរបួស និងប្រតិបត្តិការឆ្លើយតប ដែលកំពុងបន្តធ្វើ​»។ លោក រ៉ៃអេដ ចាដាលឡាហ៍ (Raied Jadallah) ប្រធានក្រុមពន្លត់អគ្គិភ័យទីក្រុងម៉ៃអាមី ( Miami) បញ្ជាក់ថា ក្នុងចំណោមមនុស្ស៥នាក់ដែលរងរបួសនោះ មាន៣នាក់ស្ថិតក្នុងស្ថានភាពធ្ងន់ធ្ងរ។ ប៉ុន្ដែលោកស្រីចៅហ្វាយក្រុង ប្រាប់ថា ពួកគេទាំងអស់​បានបញ្ជូនទៅកាន់មន្ទីរពេទ្យ។ បច្ចុប្បន្ន អាជ្ញាធរមានសមត្ថកិច្ច កំពុងតែស៊ើបអង្កេតលើករណីនេះ៕​​