រដ្ឋធានីព្យុងយ៉ាង៖ ថ្វីត្បិតប្រជាជនកូរ៉េខាងជើង មានជីវភាពដុនដាបខ្លាំង មិនដូចបងប្អូនឈាមជ័រតែមួយរស់ក្រោមរបបដឹកនាំសេរី[កូរ៉េខាងត្បូង]យ៉ាងណាក៏ដោយ ប៉ុន្តែរដ្ឋាភិបាលរដ្ឋធានីព្យុងយ៉ាង បាននិងកំពុងបន្ដខិតខំប្រឹងប្រែងយ៉ាងខ្លាំង ផលិត និងបាញ់សាកល្បងអាវុធនុយក្លេអ៊ែរ សម្ញើញទៅកាន់ពិភពលោក ខណៈបច្ចុប្បន្នមេដឹកនាំកូរ៉េខាងជើង បានប្រកាសអំពីការបំពាក់អាវុធដ៏សាហាវប្រភេទនេះ ដល់កងទ័ពជើងទឹករបស់ខ្លួន ដែលជាសញ្ញាមួយ ផ្ញើសារទៅកាន់ប្រទេសជប៉ុន និងកូរ៉េខាងត្បូង ជាសម្ពន្ធមិត្តដ៏ជិតស្និទ្ធបំផុតរបស់សហរដ្ឋអាម៉េរិក នៅតំបន់អាស៊ីបូព៌ា...។
សារព័ត៌មានកូរ៉េខាងត្បូង The Chosun Daily បានចេញផ្សាយនៅថ្ងៃចន្ទទី៧ ខែកញ្ញានេះថា មេដឹកនាំកូរ៉េខាងជើង លោក គីម ជុង-អ៊ុន (Kim Jong-un) បានថ្លែង នៅក្នុងពិធីដាក់ឱ្យដំណើរការនាវាពិឃាដថ្មី ចំណុះ៥០០០តោន ឈ្មោះ(Kang Kon កាង កុន)ថា៖«យើងបានសម្រេចនូវការផលិតនាវាពិឃាដ ដែលមានសមត្ថភាពបំពាក់អាវុធនុយក្លេអ៊ែរដល់កងទ័ពជើងទឹករបស់យើង។ នាវាពិឃាដប្រភេទនេះ មានសមត្ថភាពស័ក្ដិសម មានភាពចម្រុះ និងមានប្រសិទ្ធភាពជាក់ស្តែង សម្រាប់ការប្រើប្រាស់ ជាកម្លាំងទប់ទល់ ជាមួយនឹងការសង្កត់ធ្ងន់អំពីសារសំខាន់ នៃកងកម្លាំងនុយក្លេអ៊ែរ។ ផែនការដ៏សំខាន់របស់យើង កំពុងត្រូវអនុវត្ត ដើម្បីពង្រឹងសមត្ថភាពដល់កងកម្លាំងជើងទឹករបស់យើង»។
ជាមួយគ្នា មេដឹកនាំកូរ៉េខាងជើង បានលើកឡើងនៅក្នុងសុន្ទរកថារបស់ខ្លួនថា៖«សន្តិសុខរបស់ប្រទេសយើង កំពុងស្ថិតនៅក្រោមការគំរាមកំហែងដោយផ្ទាល់ជាប្រចាំ ហើយតំបន់ដែលប្រឈមនឹងការគំរាមកំហែងខ្លាំងជាងគេ គឺសមុទ្ទខាងកើត នៃឧបទ្វីបកូរ៉េ និងដែនទឹកដែលនៅជាប់គ្នា។ ប៉ុន្ដែការដាក់ឱ្យដំណើរការនាវាពិឃាដ Kang Kon ពិតជាមានសារសំខាន់ ជាងការប្រគល់នាវាចម្បាំង ឆូយ ហ្យុន-ហូ (Choi Hyun-ho) ដល់កងនាវាចរប្រចាំនៅសមុទ្ទខាងលិច កាលពីខែមិថុនាកន្លងទៅ។ មេដឹកនាំរបបផ្ដាច់ការរូបនេះ បន្ថែមថា ការដាក់ឲ្យដំណើរការនាវាពិឃាដ Kang Kon ចូលរួមជាផ្លូវការជាមួយកងកម្លាំងជើងទឹក នៅសមុទ្ទខាងកើត និងព័ត៌មានអំពីការសាងសង់មូលដ្ឋានទ័ពជើងទឹកនៅទីនោះ គឺជាសញ្ញាយ៉ាងច្បាស់លាស់មួយ ផ្ញើសារទៅកាន់សត្រូវរបស់យើង»។
លោក គីម ជុង-អ៊ុន ឱ្យដឹងបន្តថា៖«បច្ចុប្បន្ន យើងនឹងអនុវត្តសិទ្ធិស្របច្បាប់របស់យើង នៅក្នុងការ[ការពារ]ខ្លួន និងចាត់វិធានការឆ្លើយតបតាមការចាំបាច់។ រីឯការបំពាក់អាវុធនុយក្លេអ៊ែរដល់កងទ័ពជើងទឹក គឺបានសម្រេចរួចរាល់ហើយ តាមរយៈការបង្ហាញឱ្យកាន់តែច្បាស់នូវកម្លាំងទប់ស្កាត់នៃការវាយប្រហារដោយនុយក្លេអ៊ែរដ៏មានអានុភាព និងអាចទុកចិត្តបានរបស់យើង។ ដូច្នេះ យើងត្រូវតែអនុវត្តជាក់ស្តែងនូវប្រតិបត្តិការដ៏សម្បូរបែប និងមានប្រសិទ្ធភាពសម្រាប់ប្រព័ន្ធប្រយុទ្ធ ដោយអាវុធនុយក្លេអ៊ែរ ព្រមទាំងបញ្ជាក់ឱ្យកាន់តែច្បាស់ថែមទៀត អំពីសកម្មភាពយោធា សម្រាប់ការការពារដែនសមុទ្ទ និងការទប់ស្កាត់សង្គ្រាម»។
មេដឹកនាំកូរ៉េខាងជើង លោក គីម ជុង-អ៊ុន ប្រើពាក្យសម្តីធ្ងន់ៗថា៖«បច្ចុប្បន្ន យើងកំពុងអនុវត្តផែនការដ៏សំខាន់មួយ ដើម្បីពង្រឹងសមត្ថភាពដល់កងកម្លាំងជើងទឹករបស់យើង។ ខ្ញុំ[..]នឹងបង្ហាញឱ្យពិភពលោកបានឃើញជាថ្មីម្តងទៀត នៅក្នុងរយៈពេល៨ខែខាងមុខនេះ!»។ ទោះជាយ៉ាងណាក៏ដោយ មេដឹកនាំកូរ៉េខាងជើង មិនបានបញ្ជាក់លម្អិត អំពីលក្ខណៈនៃ«ផែនការដ៏សំខាន់»នោះឡើយ៕
