ខេត្តបន្ទាយមានជ័យ៖ កម្លាំងជំនាញនៃអធិការដ្ឋាននគរបាលក្រុងប៉ោយប៉ែត បានចុះប្រតិបត្តិការបង្ក្រាប និងឃាត់ខ្លួនជនសង្ស័យប្រុសស្រី២នាក់ ពាក់ព័ន្ធការរត់ពន្ធថ្នាំញៀននៅចំណុចភូមិក្បាលស្ពាន២ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ កាលពីថ្ងៃទី៤ ខែកញ្ញា ឆ្នាំ២០២៦...។
ក្រោយពីទទួលបានសេចក្តីរាយការណ៍ពីរឿងនេះ និងបើកការស្រាវជ្រាវស្វែងរួចមក កម្លាំងសមត្ថកិច្ច ក៏បានចុះអន្តរាគមន៍រហូតឈានដល់ការឃាត់ខ្លួនជនសង្ស័យទាំង ២នាក់ គឺ ឈ្មោះ DENY RIANTO (ដេនី រ៉េនតូ) ភេទប្រុស អាយុ២៤ឆ្នាំ ជនជាតិឥណ្ឌូណេស៊ី និងឈ្មោះ គាំ ស្រីឡែន ភេទស្រី អាយុ១៩ឆ្នាំ ជនជាតិខ្មែរ។
ក្រោយពីកម្លាំងជំនាញ បាននាំខ្លួនទៅប៉ុស្តិ៍នគរបាលរដ្ឋបាលដើម្បីសាកសួរ ជនសង្ស័យទាំង២នាក់ ក៏សារភាពពីអំពើខ្លួនដែលបានប្រព្រឹត្ត។ សមត្ថកិច្ច បានឆែកឆេរ ផ្ទះរបស់ជនសង្ស័យ ហើយដកហូតបានសម្ភារ: និងវត្ថុតាងមួយចំនួន រួមមាន៖ ក្បាលបារីអេឡិចត្រូនិច POD K រាប់រយកញ្ចប់, ឧបករណ៍សម្រាប់ប្រើប្រាស់ កែច្នៃគ្រឿងញៀន។ សមត្ថកិច្ច ពុំទាន់បានបញ្ជាក់នោះទេថា គ្រឿងញៀននោះ មានចំនួន ឬទម្ងន់ប៉ុន្មាន។ បច្ចុប្បន្ន ជនសង្ស័យទាំង២នាក់ ត្រូវបានកម្លាំងការិយាល័យជំនាញកសាងសំណុំរឿងបញ្ជូនទៅតុលាការ ដើម្បីផ្តន្ទាទោសតាមផ្លូវច្បាប់៕
