រាជធានីអូស្លូ(Oslo)៖ ស្របពេលរដ្ឋាភិបាលទីក្រុងប៊ែរឡាំង និងទីក្រុងមូស្គូ កំពុងតែតានតឹងដាក់គ្នា ជុំវិញការចោទប្រកាន់ អំពីការវាយប្រហារបរាជ័យ ដោយដ្រូនបំពាក់ដោយគ្រឿងបំផ្ទុះ នៅក្នុងអាកាសយានដ្ឋាន Leipzig របស់ខ្លួន ហើយប្រមុខអង្គការសន្ធិសញ្ញាអាត្លង់ទិកខាងជើង ហៅកាត់ NATO និងសហភាពអឺរ៉ុប កំពុងតែព្រមាន អំពីការប្រថុយប្រថានរបស់វិមានក្រឹមឡាំងនោះ ប្រទេសជាសមាជិកមួយរបស់អង្គការសម្ពន្ធមិត្តយោធារបស់លោកខាងលិចមួយនេះ ក៏បានចាប់កប៉ាល់មួយគ្រឿងរបស់រុស្ស៊ី ដើម្បីទាមទារសំណង រាប់ពាន់លានដុល្លារអាម៉េរិក។
សារព័ត៌មានរបស់ហុងកុង South China Morning Post បានផ្សាយ កាលពីថ្ងៃព្រហស្បតិ៍ ទី៣ ខែកញ្ញា ថា ក្រុមមន្រ្ដីន័រវែស បានបញ្ជាក់ ន័រវ៉ែស បានឃាត់ទុកកប៉ាល់មួយគ្រឿងរបស់រុស្ស៊ី នៅក្នុងតំបន់អាក់ទិក ដើម្បីទាមទារសំណង ចំនួន៤,២២ពាន់លានដុល្លារអាម៉េករិក ដែលក្រុមហ៊ុនថាមពលអ៊ុយក្រែន ណាហ្វតូហ្កាស (Naftogaz) បានទទួលជោគជ័យ នៅក្នុងបណ្តឹង ប្រឆាំងនឹងរុស្ស៊ី ពាក់ព័ន្ធនឹងការរឹបអូសទ្រព្យសម្បត្តិរបស់ខ្លួន ខណៈរុស្ស៊ី បានរឹបអូសឧបទ្វីបគ្រីមៀ (Crimea) ដោយខុសច្បាប់ យកទៅដាក់បញ្ចូលជាទឹកដីរបស់ខ្លួន កាលពីឆ្នាំ២០១៤។
បើតាមក្រុមហ៊ុនច្បាប់របស់អាម៉េរិក Covington (ខូវីងថុន) តំណាងឱ្យក្រុមហ៊ុនរបស់អ៊ុយក្រែន Naftogaz បានឲ្យដឹងថា កប៉ាល់ស្រាវជ្រាវនៅក្នុងមហាសមុទ្រដែលមានទឹកកកក្រាស់ខ្លាំងរបស់រុស្ស៊ី ឈ្មោះ Professor Molchanov (ប្រូហ្វេសស័រ ម៉ូលឆាណូវ) បានត្រូវរឹបអូស នៅក្បែរប្រជុំកោះ Svalbard (ស្វាលបាដ) ស្ថិតក្នុងតំបន់អាក់ទិក នៃប្រទេសន័រវ៉ែស។ ទីភ្នាក់ងារសារព័ត៌មាន គ្រប់គ្រងដោយរដ្ឋរុស្ស៊ី TASS បានដកស្រង់សម្តីរបស់អ្នកនាំពាក្យមួយរូប នៃក្រសួងការបរទេសរុស្ស៊ី បានចាត់ទុកសកម្មភាពរបស់ប្រទេសន័រវ៉ែស គឺជា«អំពើចោរសមុទ្រ»។
ជាការឆ្លើយតបទៅនឹងការឃាត់ទុកកប៉ាល់របស់ខ្លួន ទាមទារសំណង រហូតដល់៤,២២ពាន់លានដុល្លារអាម៉េរិកនោះ ប្រទេសរុស្ស៊ី កាលពីថ្ងៃព្រហស្បតិ៍ បានដាក់លិខិតតវ៉ាជាផ្លូវការ ទៅកាន់ឯកអគ្គរាជទូតន័រវ៉ែស ប្រចាំនៅទីក្រុងមូស្គូ។ ក្រសួងការបរទេសរុស្ស៊ី បានបញ្ជាក់ថា ទីក្រុងមូស្គូ បានទាមទារឱ្យមានការដោះលែងកប៉ាល់នោះ និងខិតខំប្រឹងប្រែង ដើម្បីនាំយកកប៉ាល់របស់ខ្លួនត្រឡប់មកវិញ។
ការិយាល័យអភិបាលតំបន់ប្រជុំកោះស្វាលបាដ (Svalbard) នៃប្រទេសន័រវែស បានចេញសេចក្តីថ្លែងការណ៍មួយ ដោយបញ្ជាក់ថា កប៉ាល់ខាងលើ បានត្រូវរឹបអូស ហើយនឹងត្រូវរក្សាទុកនៅតំបន់ប្រជុំកោះមួយនេះ ជាមួយនឹងការបន្ថែមថា៖«អភិបាលតំបន់នឹងទទួលខុសត្រូវលើការមើលថែទាំក្រុមនាវិក និងអ្នកដំណើរនៅលើកប៉ាល់នោះ ដោយសហការជាមួយក្រុមហ៊ុនរ៉ុករករ៉ែ និងសហគ្រាស គ្រប់គ្រងដោយរដ្ឋរុស្ស៊ី Trust Arktikugol (ត្រាស់ អាក់ធីគូហ្គោល)។
ការចាប់ទុកកប៉ាល់របស់រុស្ស៊ី បានកើតឡើង ចំពេលរដ្ឋាភិបាលទីក្រុងប៊ែរឡាំង បានចោទប្រកាន់ដល់ប្រទេសរុស្ស៊ី ជាអ្នកនៅពីក្រោយការវាយប្រហារបរាជ័យដោយដ្រូន មកលើអាកាសយានដ្ឋាន Leipzig ដែលផ្លូវដឹកជញ្ជូនតាមអាកាសដ៏សំខាន់បំផុតមួយរបស់អឺរ៉ុប និងជាមជ្ឈមណ្ឌលដឹកជញ្ជូនសម្ភារយោធារបស់អង្គការណាតូ នៅភាគខាងកើតប្រទេសអាល្លឺម៉ង់។
ទន្ទឹមគ្នានេះដែរ ប្រមុខអង្គការសម្ពន្ធមិត្តយោធាដ៏ខ្លាំងក្លារបស់លោកខាងមួយនេះ លោក ម៉ាក រូតថេ (Mark Rutte) និងប្រធានគណៈកម្មការអឺរ៉ុប លោកស្រី អ៊ូស៊ុយឡា វ៉ុន ដឺ ឡេយ៉ែន (Ursula von der Leyen) បានព្រមានដល់រុស្ស៊ី ជាមួយនឹងការលើកឡើងថា៖«ការរកឃើញដ្រូនបំពាក់គ្រឿងបំផ្ទុះ នៅអាកាសយានដ្ឋាន Leipzig បង្ហាញអំពីការកើនឡើងនូវភាពតានតឹងថ្មីមួយ នៅលើទឹកដីរបស់សហភាពអឺរ៉ុប ដែលមានប្រភពចេញមកពីរុស្ស៊ី ដោយផ្ទាល់។ សម្ពន្ធមិត្ត ដោយរាប់បញ្ចូលទាំងសហរដ្ឋអាម៉េរិកផងនោះ បានសាមគ្គីគ្នាយ៉ាងរឹងមាំ ជាមួយនឹងអាល្លឺម៉ង់»។
ទោះជាយ៉ាងណាក៏ដោយ រុស្ស៊ី បានច្រានចោលនូវការចោទប្រកាន់ទាំងនោះ ដែលថា ខ្លួនបានកំណត់គោលដៅវាយប្រហារបរាជ័យដោយដ្រូនបំពាក់គ្រឿងបំផ្ទុះ ទៅលើយន្ដហោះដឹកជញ្ជូនធុនធំរបស់អ៊ុយក្រែន កាលពីថ្ងៃទី៤ ខែសីហា។ ដ្រូននោះ បានត្រូវរ៉ូបូតបំផ្លាញចោល នៅអាកាសយានដ្ឋាន Leipzig Halle។ រីឯដ្រូនទី២ចំនួនមួយផ្សេងទៀត បានបុកជាមួយយន្តហោះដឹកទំនិញមួយគ្រឿង។ លុះរយៈពេល១០ថ្ងៃក្រោយមក ក៏ត្រូវគេរាយការណ៍ អំពីការប្រទះឃើញដ្រូនទី៣មួយគ្រឿងទៀត នៅឯព្រលានយន្តហោះនោះ។ អាកាសយានដ្ឋាន Leipzig Halle នេះ ជាមជ្ឈមណ្ឌលដឹកជញ្ជូនសម្ភារៈយោធាដ៏សំខាន់មួយរបស់អង្គការណាតូ (NATO) និងប្រើប្រាស់ជាប្រចាំ ដោយយន្តហោះដឹកជញ្ជូនរបស់អ៊ុយក្រែន ប្រភេទ Antonov ៕
