រាជធានីភ្នំពេញ៖ ក្រសួងការងារ និងបណ្ដុះបណ្ដាលវិជ្ជាជីវៈ បានជំរុញឱ្យយុវជន និងកម្លាំងពលកម្មកម្ពុជា ពង្រឹងចំណេះជំនាញ សម្របខ្លួននឹងឥទ្ធិពលរបស់បញ្ញាសិប្បនិម្មិត (AI) និងអនាគតទីផ្សារការងារ…។
សារនេះ លើកឡើងដោយលោក គួច សុមាន រដ្ឋលេខាធិការក្រសួងការងារ ក្នុងវេទិកាកម្ពុជា ៤.០ លើកទី៦ ស្តីពី «ឥទ្ធិពលនៃ AI លើទីផ្សារការងារ និងអនាគតនៃការងារ» កាលពីរសៀលថ្ងៃទី២ ខែកញ្ញា ឆ្នាំ២០២៦ ក្រោមអធិបតីភាពលោកឧបនាយករដ្ឋមន្រ្តី ហ៊ុន ម៉ានី ប្រធានក្រុមប្រឹក្សាភិបាល នៃមជ្ឈមណ្ឌលកម្ពុជា ៤.០ និងជាប្រធានសហភាពសហព័ន្ធយុវជនកម្ពុជា។ លោក គួច សុមាន និងអង្គវេទិកា បានលើកឡើងពីសារសំខាន់ និងឥទ្ធិពលរបស់ AI លើទីផ្សារការងារ ព្រមទាំងតម្រូវការក្នុងការអភិវឌ្ឍមូលធនមនុស្ស និងជំនាញឌីជីថល ដើម្បីឆ្លើយតបទៅនឹងការផ្លាស់ប្ដូរនៃពិភពការងារ។ ក្នុងន័យនេះ លោកជំរុញឱ្យយុវជន និងកម្លាំងពលកម្មកម្ពុជា ពង្រឹងចំណេះដឹង ជំនាញឌីជីថល គំនិតច្នៃប្រឌិត និងភាពបត់បែន ដើម្បីអាចសម្របខ្លួន និងរក្សាបាននូវភាពប្រកួតប្រជែងក្នុងទីផ្សារការងារនាពេលអនាគត។
លោក ហ៊ុន ម៉ានី ថ្លែងថា ការវិវត្តឥតឈប់ឈររបស់ AI បាននិងកំពុងជះឥទ្ធិពលយ៉ាងខ្លាំងលើតួនាទី ដំណើរការការងារ និងគំរូការងារនៅក្នុងវិស័យផ្សេងៗ ដែលទាមទារឱ្យកម្លាំងពលកម្មរបស់កម្ពុជា ត្រូវចេះសម្របខ្លួន និងរៀនសូត្រឱ្យបានរហ័ស។ លោកលើកទឹកចិត្តឱ្យចូលរួមផ្សព្វផ្សាយបន្តអំពីខ្លឹមសារនៃអង្គវេទិកានេះដល់សាធារណជន និងភាគីពាក់ព័ន្ធ សំដៅជំរុញការត្រៀមខ្លួនរបស់កម្លាំងពលកម្មកម្ពុជា ឱ្យអាចបត់បែន សម្របខ្លួន និងរក្សាបាននូវភាពប្រកួតប្រជែងរបស់ខ្លួន។ កិច្ចខិតខំប្រឹងប្រែងរួមគ្នានេះ គឺជាកម្លាំងចលករដ៏មានសារសំខាន់មួយ ក្នុងការកសាងគ្រឹះសេដ្ឋកិច្ច និងសង្គមឌីជីថលនៅកម្ពុជា ដែលជាមូលដ្ឋានក្នុងការជួយជំរុញល្បឿននៃការឈានទៅសម្រេចបានចក្ខុវិស័យវែងឆ្ងាយនៃការអភិវឌ្ឍកម្ពុជា៕
